Genesis 9
9:1 Pasian in Noah leh a tapate thupha pia a, amaute' tungah, “Pung un la, tampi pha-in, leitung dim un.
9:2 Note hong kizahtakna leh note hong kikihtakna pen leitung ganhing khempeuh huih lak vasa khempeuh, lei lak-a a bokvak khempeuh leh tuipi ngasa khempeuh tungah om ding hi; na khut sungah amaute hong kipia hi.
9:3 A nungta a gamtang peuhmah nang adingin an hi ding hi; kung hing khempeuh nang kong piak bangin na khempeuh nang kong pia hi.
9:4 A nuntakna, a sisan pen, a sa tawh na ne khawm kei bek ding hi.
9:5 Mi khatpeuh in nang hong thah leh ama' tungah sihna dan ka pia ding hi. Nang a hong that ganhing peuhmah ka that ding a, a mipihte a that mi peuhmah daan ka pia ding hi.
9:6 Mi a that peuhmahte pen, midangte in amah that ding hi; bang hang hiam cih leh Pasian in ama' lim bangin mi bawl hi.
9:7 Note, pung-in khang un la; leitungah tampi tak piangkhia un la, tampi pha-in khang un,” ci hi.
9:8 Tua ciangin Pasian in Noah leh amah tawh a om a tapate’ kiangah,
9:9 “En un, note leh note’ khit-a na suan-le-khakte uh leh,
9:10 note tawh a om nuntakna a neite peuhmah, vasate, innsate, note tawh a om leitung gamsa peuhmah, teembaw sung pan-a a paikhia zahzah peuhmah tawh ka thuciamna ka kipsak hi.
9:11 Tuiciin tawh nuntakna a nei khempeuh susia kik ngei nawn loin, leitung asusia dingin tuiciin a om kik ngei nawn loh nadingin note tawh ka thuciamna ka kipsak hi,” ci hi.
9:12 Pasian in, “Hih in, kei leh note leh note tawh a om nuntakna a neite khempeuh kikal-ah mai lam khang tawntung adingin thuciamna lim ahi hi.
9:13 Meii sungah ka sakhituihup ka kaisak a, tua in kei leh leitung kikal-ah thuciamna lim hi ding hi.
9:14 Leitung’ tungah meii kong kaisak ciangin meii sungah sakhituihup a kimuh leh,
9:15 kei leh note leh nuntakna a nei khempeuh kikal-ah a om ka thuciamna ka phawk ding hi; tuite pen, nuntakna a nei khempeuh a susia ding tuiciin suak kik ngei nawn lo ding hi.
9:16 Meii sungah sakhituihup a om ciangin keimah in ka en ding a, Pasian leh leitunga a om nuntakna a nei khempeuh kikal-ah tawntung thuciamna ka phawk ding hi,” ci hi.
9:17 Pasian in Noah’ kiangah, “Hih in, kei leh leitunga a om nuntakna a nei khempeuh kikal-ah ka kipsaksa thuciamna lim ahi hi,” ci hi.
9:18 Teembaw sung panin a paikhia Noah’ tapate in Shem, Ham leh Jafeth ahi hi. Ham in Kanaan’ pa ahi hi.
9:19 Hih thumte in Noah’ tapate ahi uh hi; hihte panin leitung buppi ah a kithehthang mite hong piang hi.
9:20 Noah in lokho masa pa ahi hi. Amah in leenggui lo khat bawl hi;
9:21 amah in leenggahzu ne-in kham a, a puanbuk sungah bangmah silh loin lum hi.
9:22 Kanaan’ pa Ham in a pa guaktangin a omna mu a, a pua lam-a om a sanggam nihte kiangah gen hi.
9:23 Tua ciangin Shem leh Jafeth in puan khat la-in amaute gel’ liangko tuak-ah baang uh a, a nung leh lam-un pai-in a pa uh’ guaktang omna khuh uh hi; amaute in maingat lo uh ahih manin a pa uh’ guaktang omna mu lo uh hi.
9:24 Noah a zukhamna pan a pilvan’ ciangin ama' tunga a tapa tum pen’ gamtatna thei a,
9:25 amah in, “Kanaan in ciamsiatna ngah ta hen la, a sanggamte' tungah silate’ sila hita hen,” ci hi.
9:26 Amah in, “ Topa ka Pasian in Shem thupha pia hen la, Kanaan pen Shem’ sila hisak hen.
9:27 Pasian in Jafeth tamsak hen la, Shem’ puanbukte sungah amah teengsak hen; Kanaan ama' sila hisak hen,” zong ci hi.
9:28 Tuiciin tun’ khit ciangin Noah kum zathum leh kum sawmnga nungta hi.
9:29 Noah’ khan sung teng in kum zakua leh kum sawmnga ahi hi; tua ciangin amah si hi.