Job 1
1:1 Uz gamah Job kici min nei mi khat om hi; tua mipa a paubaang lo, a thutang, Pasian a zahtak mi khat hi a, amah in gamtat hoih lo peuhmah pel hi.
1:2 Amah in tapa sagih leh tanu thum nei hi.
1:3 Amah in tuu tulsagih, kalaoh tulthum, bawngtal kap zanga, leh la a pi zanga, leh nasem tampi tak nei hi; tua ahih manin nisuahna gam sungah Job in a haupen khat ahi hi.
1:4 Ama tapate in inn khat panin inn khatah a ban banin pawi bawlin pai kawikawi uh a, tua pawi siim dingin a sanggam numei thumte uh zong sam uh hi.
1:5 Tua banga a pawi bawl uh vial khat a kikhit ciangin Job in a tapate samin amaute sian’suah a, zingsangin tho baihin a ta phazah tawh kizui-in meihal biakna pia hi; bang hang hiam cih leh Job in, “Ka tate khialin, a lungsim sung uh ah Pasian samsia kha thei ding uh hi,” a ci hi. Hih bangin Job in hih tawntung hi.
1:6 Nikhat ni-in Topa ’ omna-ah vantungmite hong pai uh a, tuate lakah Satan zong hong pai hi.
1:7 Topa in Satan kiangah, “Koi pan-a hong pai na hi uh hiam?” a ci hi. Satan in Topa dawngin, “Leitung khempeuh a lu pan a taw dong vak kawikawi-in ka va pheklekna mun panin kong pai hi,” a ci hi.
1:8 Tua ciangin Topa in Satan kiangah, “Ka nasem Job na phawk kha hiam? A paubaang lo a thutang, Pasian zahtakin gamtat hoih lo a pel, amah tawh a kibang midang leitungah na mu kei ding hi,” a ci hi.
1:9 Tua ciangin Satan in Topa dawngin, “Job in Pasian hong mawk zahtak ahi hiam?
1:10 Amah leh a innkuan leh a neihsate khempeuh na hutna-in a kimkotah dai khan hilo na hi hiam? Ama hihna khempeuh ah thupha na pia a, gen zawh lohin ama neihsa pung hi.
1:11 Ahi zongin na khut zanin ama neihsa khempeuh suksak lecin na maitang mahmah-ah nang hong samsia pah ding hi,” a ci hi.
1:12 Tua ciangin Topa in Satan kiangah, “En in, ama neihsa khempeuh na khut sungah kong ap hi; ahi zongin ama pumpi ahih leh na sukha kei ding hi,” a ci hi. Tua ciangin Topa ’ omna panin Satan paikhia hi.
1:13 Nikhat ni-in a tapate leh a tanute in a u pen uh inn-ah an ne zu ne-in om uh hi;
1:14 kamtai khat Job kiangah hong tungin, “Bawngtalte in lo kho-in, tuate gei-ah late gamta uh hi;
1:15 tua lai takin Seba mite hong pai-in ganhingte hong sut a, namsau tawh gancingte that khin uh hi; hih thu hong zahsak thei dingin kei bek kong suakta hi,” a ci hi.
1:16 Amah in thugen a khit ma-in kamtai dang khat hong tungin, “Vantung panin keek hong kia a, tuute leh tuucingte kha-in kangtum uh hi; hih thu nang kiangah hong ko thei dingin kei bek kong suakta hi,” a ci hi.
1:17 Tuapa in thugen a khit ma-in kamtai dang khat hong tung leuleu-in, “Khaldea mite honthum in kalaohte hong sut a, namsau tawh kalaoh tung tuangte khempeuh that hi; hih thu nang kiangah a ko thei dingin kei bek kong suakta hi,” a ci hi.
1:18 Amah in a thugen a khit ma-in kamtai dang khat hong tung leuleu a, “Na tapate leh na tanute a u pen uh inn-ah an ne zu ne-in om uh hi;
1:19 tua lai takin sehnel gam panin huihpi pingpei hong nungin a inn mut paai-in na tate denglum hi; nang kiangah hih thu a ko thei dingin kei bek kong suakta hi,” a ci hi.
1:20 Hih thu a zak ciangin Job dah lua-in a puan balkek a, tua ciangin a sam met khia-in lei lakah bok sukin Pasian bia hi.
1:21 Tua ciangin amah in, “Ka nu sung panin guaktangin ka suak a, Guaktang mahin ka ciahkik ding hi. Topa in hong pia a, Topa mah in hong lakik hi; Topa ’ min kiphat ta hen,” a ci hi.
1:22 Hih thu khempeuh ah Job khial lo a, Pasian zong mawhsak lo hi.