Library · ctd

Psalms 102

102:1 Topa aw, ka thungetna hong za in la, ka hong thuumna hong ngai in. 102:2 Ka cihmawh hunin kei kiang panin bu kei in! Keima lam hong nga in la, kong sap ciangin hong dawng pah in! 102:3 Bang hang hiam cih leh keima nuntakna, meikhu bangin beimang a, ka pumpi, meikuang bangin a sa hi. 102:4 Lungkham lua-in lopa bangin ka keutum a, an nangawn ka ne zo kei hi. 102:5 A ging-in ka tautauna hangin ka guh guakin ka om hi. 102:6 Gamlak-a om musane leh mun kolhna-a om simbu tawh ka kibang hi; 102:7 ihmu thei loin ka om a, innkhum dawn-a vasa khatguak om tawh ka kibang hi. 102:8 Sun nilohin ka galte in kei hong zahko a, kei hong simmawhte in ciamsiatna-in ka min zang uh hi. 102:9 Bang hang hiam cih leh ka annek in vutte hi a, nangma thangpaihna leh hehna hangin ka tui dawnte khitui tawh kihel hi; bang hang hiam cih leh nang hehna in kei hong domto napi-in nong khiasuk kik hi. 102:11 Keima nuntakna in nitak lam-a liim om tawh kibang a, lopa bangin kei ka vulgawp hi. 102:12 Ahih hangin Topa aw, nang na kip ngitnget a, khang tawntungin nangmah hong kiphawkna a kip hi. 102:13 Nangmah tho-in Zion khua na hehpih ding hi; amah na angvan hun ding hi ta hi; a kiciangtansa hun hong tung khin hi. 102:14 Bang hang hiam cih leh na nasemte in tua khua suangtumte itin a leivuite nangawn pammaih sa uh hi. 102:15 Minamte in Topa hong zahtak-in, leitung kumpi khempeuh in nangma minthan’na hong zahtak ding uh hi. 102:16 Bang hang hiam cih leh Topa in Zion khua lam ding a, ama minthan’na hong kilang ding hi; 102:17 amah in, mi cimawhte’ thungetna kin-in, amau’ thuumna simmawh lo ding hi. 102:18 A suak nai lo mite in Topa a phat theih nadingun, hong tung ding khang mite’ adingin hih thu kiciamteh hen: 102:19 Mihingte, kumpi gamte, Topa bia dingin a kikaikhop uh ciangin, mite in Zion khua sungah Topa ’ min leh, Jerusalem khua-ah amah phatna a pulak theih nadingun, thongkiate’ taunate za ding leh a si dinga kisehte a khahkhia dingin amah in a sangna ama siangtho mun panin hong ensukin, vantung panin Topa in leitung hong en hi. 102:23 Amah in, kei a khangtung kimlai ka thahatna hong suktat sak a, ka hunte hong khiapsak khin hi. 102:24 Keimah in, “Khang tawntungin a kip ka Pasian aw, kei hong khan’sih sak kei in!” ka ci hi. 102:25 Tanglai hunin nangmah in leitung bulpi na koih a, vantungte zong nangma khut tawh na bawlsa ahi hi. 102:26 Amaute sia ding a, ahih hangin nang na kip hi; amaute pen puan bangin paatkhia ding hi. Nangmah in amaute pen puan bangin na kheek a, amaute maimang uh hi; 102:27 ahih hangin nang na kibang ngitnget a, na nuntak kumte in mong nei lo hi. 102:28 Na nasemte’ tate, lungmuangin om ding uh a, amau suan-le-khakte nangma mai-ah kip ding uh hi.