Library · ctd

Psalms 89

89:1 Topa aw, na itna kip, la-in ka sa tawntung ding a, na thutakna, a tawntungin ka gengen ding hi. 89:2 Bang hang hiam cih leh na itna kip kho tawntung a, na thutakna, vantung bangin kip tawntung hi. 89:3 Nangmah in, “Ka teelpa tawh thuciamna khat ka bawl zo a, ka nasem David tungah thu ka ciam zo hi: 89:4 Na suan na khakte kumpi-in ka kipsak suak ding a, na kumpi gam, khang tawntungin ka kipsak ding hi,” na ci khin hi. 89:5 Topa aw, na nasepna lamdangte pen vantungte phatsak in la, mi siangthote kikhopna sungah na thumanna phatsak in. 89:6 Bang hang hiam cih leh Topa pen vantung-a kua tawh kiteh thei ding ahi hiam? Misiangthote kikhopna sungah a kizahtak Pasian, ama kim-a omte khempeuh tungah lian-in a zahtakhuai Topa pen vanmite lakah kua pen tawh kibang ahi hiam? 89:8 Mi honte Topa Pasian aw, na khempeuh ah na thutak a, nangmah banga vanglian kua om ahi hiam? Topa aw. 89:9 Nangmah in tuipi khang na uk a, a tuihualte a saan’ ciangin na daisak hi. 89:10 Nangmah in a kithatsa luanghawm khat bangin ganhing golpi Rahab na sugawp a, na thahatna tawh na galte na zogawp hi. 89:11 Vantungte nangma’ aa hi a, leitung zong nangma’ aa ahi hi; leitung leh a sunga omte khempeuh nangma phuhsa ahi hi. 89:12 Saklam leh khanglamte nangma bawlsa hi a, Tabor mual leh Hermon mual in lungdamna tawh na min hong phat uh hi. 89:13 Nangma vang lian mahmah a, na thahatna kigen thei lo hi. 89:14 Thumanna leh thutan’na tawh na kumpi gam na phut a, itna kip leh thumanna tawh na khempeuh na sem hi. 89:15 Topa aw, lungdam-a lasakna tawh nang hong bia a, na migitna khuavak sungah a nungta, nangma hangin sun thapai-in lungdam a, nangma hoihna hong phat mi in mi nuamsa ahi hi. 89:17 Bang hang hiam cih leh nangmah in gualzawhna lianpi kote nong ngah sak a, nangma angvanna tawh kote nong gualzo sak hi. 89:18 Kote kihutna in Topa kiang pan hi a, Israelte’ Siangtho Pa, nangmah in ka kumpipa uh nong pia hi. 89:19 Hunlui lai-in na thuman mipa tungah mang sungah thu genin hih bangin na ci hi: A vanglian khatpa tungah lukhu ka koih zo a, mite lak panin a kitengkhia mi khat ka liansak zo hi. 89:20 Ka nasempa David ka mu zo hi; ka khut tawh amah a om ngitnget theih nading, ka baan in zong amah a thakhauhsak theih nadingin ka sathau siangtho tawh amah ka nilh khin hi. 89:22 Galte in amah khem zo ngei lo ding a, migilote in amah zo ngei lo ding uh hi. 89:23 Ama mai-ah a galte ka sugawp ding a, amah a mudahte ka satpuk ding hi. 89:24 Amah it tawntungin, ama tungah ka thutak ding a, amah, ka gualzosak tawntung ding hi. 89:25 Mediterranean Tuipi-a kipan Eufrates Gunpi dong amah ka uksak ding hi. 89:26 Amah in kei kiangah, ‘Nangmah in keima Pa, ka Pasian leh ka kihotkhiatna Suangpi na hi hi,’ hong ci ding hi. 89:27 Keimah in amah pen tacil leh leitung kumpite lakah a sang penin ka bawl ding hi. 89:28 Amah ka itna, ka kipsak tawntung ding a, ama tungah ka thuciamna kip tawntung ding hi. 89:29 Ama suan-le-khakte, kumpi ka hisak ngitnget ding a, a kumpigam, vantung bangin ka kipsak ding hi. 89:30 Ama tate in ka thukham nusia-in, ka biakna kip omte bangin a gamtat kei uh a, amaute in ka ngeina sia sakin ka thupiaknate a zuih kei uh leh, tua ciangin keimah in amaute’ thu-palsatna hangin ciang tawh ka daantat ding a, amau mawhnate satna tawh ka daantat ding hi; 89:33 ahih hangin amah ka itna ka khiam kei ding a, ka thuciamna ka kipelhsak kei ding hi. 89:34 Ka thuciamna siasak loin, ka muk pan-a paikhia thute ka khel kei ding hi. 89:35 A tawntung-a dingin ka siangthona tawh khatvei ka kiciam khin hi; David tungah ka zuau kei ding hi. 89:36 Ama suan-le-khakte kizom paisuak ding a, van-a ni a taan’lai teng, a kumpigam ka kip sak ding hi. 89:37 Khapi bangin tua pen kip paisuak ding a, vantung a om lai teng kip ding hi." 89:38 Ahih hangin tu-in nangmah in amah lawnkhia-in na nial a, na sathau nilhpa tungah hehna tawh na kidim hi. 89:39 Na nasempa tawh na thuciamna na pelh khin a, leivui lakah ama kumpi lukhu na paihsak hi. 89:40 Nangmah in ama kulhte khempeuh na sukham khin a, ama gal panmunkipte a sia na suah khin hi. 89:41 A pai khempeuh in ama nate sutgawp uh a, amah pen a vengte’ nuihsat a suak hi. 89:42 Nangmah in ama galte na gualzosak a, ama galte khempeuh na lungdam sak khin hi. 89:43 Hi hi, ama galhiamte a mawkna na suak sak a, gal kidona-ah amah na guallel sak hi. 89:44 Nangmah in ama khut panin a kumpi ciangkhut na lakhia a, a kumpi tokhom, leilak na den’na hi. 89:45 Nangmah in ama tangval a thahat hun na tomsak a, maizumna tawh amah na kidimsak hi. 89:46 Topa aw, nang bang tanvei bucip den ding na hi hiam? Na hehna bang tanvei mei bangin kuang ding ahi hiam? 89:47 Topa aw, nuntak hun bang zahin tom cih hong phawk in; mihingte a mawkna dingin bawl na hi hiam? 89:48 A si thei lo mi kua om ahi hiam? Sihna hankhuk panin kua suakta zo ahi hiam? 89:49 Topa aw, na thumanna tawh David na thuciamna, hunlui lai-a na itna kip koi-ah om ta ahi hiam? 89:50 Topa aw, na nasempa bangzah tak-a hong kithusim lohna, mihingte’ zahpihna ka sungah ka thuakna, na galte in phinna-a hong neihna, Topa aw, amaute in na sathau nilhpa’ paina khempeuh a hong nuihsatna uh hong phawk in. 89:52 Topa in thupha ngah tawntung ta hen; Amen, Amen.