Library · ctd

Psalms 98

98:1 Amah in nalamdangte bawl khin ahih manin Topa tungah la thak khat sa un! Ama khut taklam leh ama khut siangthote in amah gualzosak hi. 98:2 Topa in ama gupkhiatna kitheisak khin zo a, amah in minamte muhna-ah ama thumanna lang sak khin hi. 98:3 Amah thutakin, it tawntungna nei ahih manin Israelte' tunga a thuciamna tung sak hi. Leitung mi khempeuh in i Pasian’ gupkhiatna mu khin uh hi. 98:4 Leitung mi khempeuh aw, Topa tungah lungdamin la sa un la, lungdamin awng khia un la phatna la sa un! 98:5 Laiza lasakna tawh Topa tungah phatna late sa un la, laiza lasakna leh langaih tawh phat un! 98:6 Pengkulte leh sa-ki aw tawh Topa, Kumpipa mai-ah lungdamna ging sak un! 98:7 Tuipi leh a sunga omte khempeuh aw, awng un la, leitung leh a tunga teeng khempeuh aw, la sa un. 98:8 Gunte aw, na khut uh beeng un. Mualte aw, Topa mai-ah lungdamin la sa un. Bang hang hiam cih leh leitung a uk dingin amah hong pai ta a, thumanna tawh leitung mite’ thu ahi bangin hong khen ding hi.