Exodus 37
37:1 Bezalel in singkha sing tawh singkuang bawl hi; a dung tong nih leh khap, a vai tong khat leh khap, a san’na tong khat leh khap ahi hi.
37:2 Amah in kham citak tawh a sung leh a pua zutin a kimkotah kham geihual khat bawl hi.
37:3 Amah in a kiu lite’ adingin kham kual li, a pang khatah kual nih, a pang lang khat adingin kual nih sung hi.
37:4 Amah in singkha sing zawlte bawl a, tuate kham tawh zutin,
37:5 singkuang puak nadingin singkuang pang-a kualte' sungah zawlte khum hi.
37:6 Amah in kham citak tawh hehpihna tokhom khat bawl hi; a dung tong nih leh khap, a vai tong khat leh khap ahi hi.
37:7 Amah in sek tawh a kiseek kham tawh kherub nih bawl hi; hehpihna tokhom mong tuak-ah tuate bawl hi,
37:8 kherub khat mong khatah, kherub khat a mong lang khatah om hi; amah in a mong nihte-ah hehpihna tokhom tawh sakhatin kherubte bawl hi.
37:9 Kherubte in a khate uh a tungah zalin, amau’ khate tawh hehpihna tokhom liim sunin, amaute khat leh khat kimaingat uh hi; hehpihna tokhom lamah kherubte’ mai nga hi.
37:10 Amah in singkha sing tawh sabuai zong bawl hi; a dung tong nih, a vai tong khat, a san’na tong khat leh khap ahi hi;
37:11 amah in kham citak tawh zut a, a kimkotah kham tawh a geihual khat bawl hi.
37:12 Amah in khut peek cia a pha zawl khat a kimkotah bawl a, a zawl kimkotah kham geihual khat bawl hi.
37:13 Amah in tua sabuai adingin kham kual li sungin, a kiu li, a khe lite-ah a kualte gak hi.
37:14 Sabuai puak nading zawlte a len dingin a zawl gei-ah a kualte om hi.
37:15 Amah in sabuai puak nadingin singkha sing zawlte bawl a, tuate kham tawh zut hi.
37:16 Amah in sabuai tunga om ding beel leh kuangte, paknamtui’ adingin kuangdaite leh pakante, tui-buah nadingin kuang-ukte leh thawl gongbakte kham citak tawh bawl hi.
37:17 Amah in kham citak tawh meivakkhuam zong bawl hi. Meivakkhuam a bul leh a kungte in a kiseek nate tawh kibawl hi; a haite, a nunte leh a pakte in tua tawh sakhat ahi hi.
37:18 A pangte panin hiang guk meengkhia a, a pang khatah meivakkhuam hiang thumte omin a pang lang khatah meivakkhuam hiang thumte om hi;
37:19 hiang khat ciat tungah a nun leh a pak a om, almond gah tawh a kibang hai thum leh a dang hiang khat ciat tungah a nun leh a pak a om, almond gah tawh a kibang hai thum mah kibawl hi—tua ahih ciangin a hiang gukte meivakkhuam panin meengkhia hi.
37:20 A meivakkhuam tung mahmah-ah a nun leh a pak tawh a om, almond gah bangin a kibawl hai li omin,
37:21 meivakkhuam panin hiang guk a kopte’ bul-ah tua tawh sakhat ahi mun khat om hi.
37:22 Amau’ nunte leh a hiangte in tua tawh sakhat ahi hi; a buppi-in kham citak a kiseek sakhat ahi hi.
37:23 Amah in a meivak sagihte leh a taitehte leh a kuangte kham citak bawl hi.
37:24 Amah in kham citak talen khat tawh tua leh a nazatte khempeuh bawl hi.
37:25 Amah in singkha sing tawh paknamtui biakna tau bawl hi; a dung tong khat, a vai tong khat ahi hi; tua pen a ning kikim a, a san’na tong nih ahi hi; a kite in tua tawh sakhat ahi hi.
37:26 Amah in a tung zang, a kimkotah a pangte leh a kite kham citak tawh zut hi; amah in a kimkotah kham geihual khat
37:27 leh a puak nadingin zawlte a len dingin a pang lang tuak, a geihual nuai tak-ah kham kual nih bawl hi.
37:28 Amah in singkha sing tawh zawlte bawlin, tuate kham tawh zut hi.
37:29 Amah in paknamtui bawlte’ gawm bangin a siangtho nilh sathau leh a siangtho a namtui paknamtui zong bawl hi.