Library · ctd

Mark 6

6:1 Zeisu in tua mun pan paikhia a, ama khua-ah pai-in a nungzuite in a zui uh hi. 6:2 Nipi ni a tun’ ciangin kikhopna innah thu a hilh hi. Mi tampite in a thu a zak uh ciangin, lamdang a sa uh hi. “Hih pa in hih thute koi pan a ngah hiam? Hih pa kipia pilna in bang pilna ahi hiam? Ama khut tawh hihzah tak nalamdangte bangci a bawl thei hiam? 6:3 Amah in Mari’ ta hilo ahi hiam? Khutsiampa ahi, Jakob, Josef, Judas leh Simon-te’ sanggampa hilo ahi hiam? Ama sanggamnute in i kiangah om hilo ahi uh hiam?” ci-in a gen uh hi. Amaute in ama hangin a lungkia uh hi. 6:4 Zeisu in, “Pasian’ kamsangpa in ama inn, ama khua, ama behte kiangah longal mun dangah minthan’na ngah loin om lo hi,” ci-in amaute kiangah a ci hi. 6:5 Cina tawmte tungah khut nga a, a damsak sim loh, tua santakah nalamdang lian a bawl kei hi. 6:6 Amaute up lohna lamdang a sa hi. Zeisu in khuapite leh khuaneute sungah thuhilhin a vak kawikawi hi. 6:7 Tua lai takin Zeisu in a nungzui sawm-le-nihte a sap khit ciangin, kihhuai dawite a zawh nading thu pia a, nih tek, nih tekin a sawl hi. 6:8 “Note in ciangkhut khat sim loh, lampi ah zat ding a dang bangmah na keng kei un. Khomun, thungip, kawnggak sungah dangkasan na vom kei un. 6:9 Khedap bulh un la, puanak na silh thuah kei un. 6:10 Inn khat peuhah na lut uh leh, tua khua pan na paikhiat matengun tua innah va om un. 6:11 Mun khat peuhah mite in hong nolh a, na thu uh a ngaih kei uh leh, amau omna pan na paikhiat uh ciangin, amau lang khatah teci pang dingin, na khepeek nuai uh ah leivuite na singkhia un,” ci-in thu a pia hi. 6:12 Tuate paikhia uh a, mite mawhna kisik nading thuhilhin, 6:13 dawi tampi hawlkhia uh a, cidam lo mi tampi sathau tawh zutin a damsak uh hi. 6:14 Tua lai takin Herod kumpipa in tua thu za hi. Bang hang hiam i cih leh, Zeisu min a thang hi. “Baptaizpa Johan in sihna pan a thokik zo hi. Tua ahih ciangin, hih vangliatna in ama tungah a kilang hi,” a ci uh hi. 6:15 Mi kimkhat in, “Hih mi in Elijah ahi hi,” a ci uh hi. Midangte in, “Tanglai kamsangte khatpeuh tawh kibang, kamsangpa ahi hi,” a ci hi. 6:16 Ahih hangin Herod in a zak ciangin, “A ngawng ka tansak Johan a thokik zo hi,” a ci hi. 6:17 Herod in a nau Filip’ zi Herodias thu hangin Johan a matsak khit ciangin, thong sungah a hen hi. Bang hang hiam i cih leh, Herod in tua Herodias tawh a kiteen’ ciangin, 6:18 Johan in, “Na nau’ zi teen’pih ding kilawm lo hi,” ci-in Herod kiangah a gen hi. 6:19 Herodias in Johan mudah a, a that nuam hangin that zo lo hi. 6:20 Bang hang hiam i cih leh, Johan in mi thuman, mi siangthopa ahih Herod in thei ahih ciangin, Johan kihta a, amah a kem hi. Amah in Johan thu a zak ciangin lungmang a, lungdamna tawh ama thu a ngai hi. 6:21 Tua nung ciangin a kilawm ni tung a, Herod’ suah ni-in a upate, galkap mangte, leh Galile gam za liante an a vak hi. 6:22 Tua lai takin Herodias’ tanu lutin a laam ciangin, Herod akipan amah tawh an a nekhawmte a nuam uh hi. Herod in, “Na deih peuhpeuh hong ngen in kong pia ding hi,” ci-in numeino thu a pia hi. 6:23 Khatvei, “Na hong nget khempeuh ka gam langkhat dongin kong pia ding hi,” ci-in thu a ciam hi. 6:24 Numeino in paikhia a “Bang ka ngen ding hiam?” ci-in a nu a dot ciangin a nu in, “Baptaizpa Johan’ lutang ngen in,” a ci hi. 6:25 Numeino thakhatin kumpipa kiangah tum a, “Baptaizpa Johan’ lutang dalkuang sungah hong pia le-cin ka ut hi,” a ci hi. 6:26 Kumpipa a dah mahmah hangin, a kiciam zawhna leh sabuai ah a tut khawmpihte a zahtak manin numeino a nial nuam kei hi. 6:27 “Johan’ lutang hong paipih in,” ci-in galkap khat a sawl ciangin tua pa pai a, thong sungah Johan’ ngawng a tan khit ciangin, 6:28 dalkuang sungah a lutang paipih a, tua numeino a piak khit ciangin numeino in a nu a pia hi. 6:29 Johan’ nungzuite in a zak uh ciangin pai uh a, a luang paipihin hankhuk sungah a vui uh hi. 6:30 Sawltakte in Zeisu kiangah kikhawm uh a, a hihna khempeuh leh a thuhilhna khempeuh a zasak uh hi. 6:31 Zeisu in, “Gam daihna-ah hong pai un la, tomkha tawldam na’ngin khawl un,” a ci hi. Bang hangin hih bangin a gen hiam i cih leh, mi tampite in a vak a ciah uh ahih ciangin, amau in an ne man lo zawzenin a om uh hi. 6:32 Tua ahih ciangin, gunkuang tungah tuangin gamlak gam daihna-ah a pai uh hi. 6:33 A pai lai takun mite in mu uh a, kimkhat in amaute ahih lam a theih uh ciangin, khuapi khempeuh panin paikhia uh a, tai-in a tung masa uh hi. 6:34 Zeisu paikhia a, mihonpi a muh ciangin, a cing om lo tuute tawh kibang hi ci-in hehpihhuai sa a, thu tampi a hilh hi. 6:35 Ni a tum dektak ciangin a nungzuite Topa kiangah va pai uh a, “Hih lai tak in gamlak ahi hi. Ni lah a tum zo hi. 6:36 Amaute a kimkot khuaneu leh lo lai-ah pai-in an nek ding lei dingin paisak ta in,” a cih uh leh, 6:37 Zeisu in, “Amau nek ding an note’n na pia ding uh hi,” a ci hi. Amaute in, “Kote pai-in dangka zakhat tawh khomun ka lei khit uh ciangin, amaute nek dingin ka pia ding uh hiam?” ci-in a dong uh hi. 6:38 Zeisu in, “Khomun pum bangzah na nei uh hiam? Pai un la, va en un,” a ci hi. Amaute in a theih khit uh ciangin, “Khomun pum nga leh ngasa tawn nih a om hi,” ci-in a gen uh hi. 6:39 Tua ciangin Zeisu in, “Mi khempeuh lopa hing tungah a pawlpawlin tusak un,” a ci hi. 6:40 Amaute in pawlkhat za, pawlkhat sawmnga, a pawlpawlin a tu uh hi. 6:41 Zeisu in khomun nga leh ngasa tawn nih la a, vantung lam ento-in hehpihna a phat khit ciangin, khomun balnenin mite mai-ah lui dingin a nungzuite a pia hi. Ngasa tawn nih zong amaute khempeuh lakah a hawmsak hi. 6:42 Mi khempeuh in a ne uh a, 6:43 a kham khit uh ciangin khomun leh ngasa, a neng a themte khawm uh a, seeng sawm leh seeng nih dim a ngah uh hi. 6:44 Khomun a ne pasal bek tul nga a pha hi. 6:45 Zeisu in mihonte a paikhiatsak lai takin, a nungzuite gunkuang ah thakhatin tuangsakin, a gal khat Bethsaida khua-ah ama mai-ah a paisak hi. 6:46 Zeisu in mihonpite tawh a kikhen khit ciangin, thungen dingin mual tungah a kahto hi. 6:47 Nitak ciangin gunkuang in tuili lai zangah a om hi. Zeisu ahih leh, lei tungah amah guakin a om hi. 6:48 A deih lohna uh lam panin huih in lehmut ahih ciangin, a nungzuite in gunkuang hot a gim mahmah a om uh Zeisu in mu a, khua vak dektak nai thum ciangin tuili tungah amaute kiangah pai a, a pel ding bangin a pai hi. 6:49 Ahih hangin tuipi tungah a pai amaute in a muh uh ciangin sikha sa-in a kiko uh hi. 6:50 Bang hang hiam i cih leh, amaute khempeuh in Zeisu mu uh a, a lau uh hi. Ahih hangin Zeisu in, “Na lungdam ta un, keimah ka hi hi. Na lau kei un,” a ci pah hi. 6:51 Gunkuang tungah amaute kiangah a kahtoh ciangin huihnung dai hi. Amaute in a lungsim sung uh ah lamdang a sa uh hi. 6:52 Bang hang hiam i cih leh, amau lungsim uh pil lo ahih ciangin khomun thu ciamteh lo uh hi. 6:53 Tui gal khatah a kah khit uh ciangin, Gennesareth gamah a tung uh a, gunkuang tui geiah a khawlsak uh hi. 6:54 Amaute in gunkuang sung pan a paikhiat uh ciangin mite khempeuh in Zeisu’ meel a thei uh hi. 6:55 A kimkot gam khempeuh ah tai-in, koi lai takah a om ci-in a zak uh ciangin tua munah mi cinate lupna tawh a paipih uh hi. 6:56 Khuapi, khuaneu, gamlak, a tun’na khempeuh ah cidam lo mite lam kiangah a koih uh a, ama puan mong teep beek a lawn’ nadingun a ngen uh hi. Amah a lawng khempeuh in cidamna a ngah uh hi.