Luke 17
17:1 Tua lai takin Zeisu in a nungzuite kiangah, “Puk nading om loh na’ng thu a om kei hi. Ahih hangin a puksakpa in gimna a thuak ding hi.
17:2 Hih naupangte khatpeuh a puksakpa in a ngawngah an-gawina suang khihin tuipi thuk sungah tumcip leh, ama ading a hoih zaw ding hi.
17:3 Note na kikem un. Na u na nau in a khialh leh, thu hilhin na taai in. A kisik kik leh, a mawhna na maisak in.
17:4 Ni khatin na tungah sagih vei hong khialh khit ciangin hong kihei a, sagih vei dongin, ‘Ka kisikkik hi,’ hong cih leh, ama khialhna na maisak in,” a ci hi.
17:5 Sawltakte in, “Komau’ upna khangsak ta in,” ci-in Topa kiangah a gen uh hi.
17:6 Topa in, “Note in ankamtang khat cia bang upna nei le-uhteh hih theikung kiangah, ‘Zung tawh kibotkhia-in tuipi sungah na po in,’ na cih uh leh, na thu uh a mang ding hi.”
17:7 “Note in nasem khat nei-in, lo kuanin ahi zongin, tuu cingin ahi zongin hong ciah ciangin ama kiangah, ‘Thakhatin hong pai in la, an nekna sabuai ah hong tu in,’ a ci ding no lakah kua ahi hiam?
17:8 ‘Keima an nek ding hong bawl in; an ka nek tui ka dawn khit matengin kawnggak in la, an hong pia in. Tua nung ciangin nangin an ne-in tui na dawn ding hi,’ ci-in nasempa kiangah gen ding hilo ahi hiam?
17:9 Nasempa in a topa thupiak bangin a hih maninah a topa in a phat hiam?
17:10 Tuamah bangin note in zong thu khempeuh hong piak bang na hih khit uh ciangin, ‘Kote in a pha bawl lo nasemte ka hi uh hi. Nasemte ka hih uh ciangin a kituak bek ka hih zo uh hi,’ na ci ding uh hi,” ci-in a gen hi.
17:11 Zeisu in Jerusalem khuapi lamah a pai lai takin, Samaria gam leh Galile gam a paisuak hi.
17:12 Khua khat sungah a lut lai takin miphak sawm in amah dawn uh a, a gamla pan ding-in,
17:13 “Topa Zeisu aw, kote hong hehpih in,” ci-in a kiko uh hi.
17:14 Zeisu in tuate a muh ciangin, “Pai un la, Pasian’ siampi kiangah va kilak un,” ci-in thu a pia hi. Amaute a pai lai takun damna a ngah uh hi.
17:15 Amaute lakah khat in damna a ngah a theih ciangin pai kik a, aw lianpi tawh Pasian phat a;
17:16 Zeisu khe kiangah bokin hehpihna a phat hi. Tua pa in Samaria mi ahi hi.
17:17 Zeisu in, “Mi sawmte in damna ngah hilo ahi hiam? Adang kua teng koiah om ahi uh hiam?
17:18 Hih mi namdangpa khat sim loh hong paikik a, Pasian a phat kuamah om lo ahi hiam?
17:19 Nang ding in la, pai in. Na thu upna in nang hong damsak zo hi,” a ci hi.
17:20 Farisaite in, “Pasian’ Gam in cik ciangin hong tung ding hiam?” ci-in a dot ciangun Zeisu in, “Pasian’ Gam in mittangin kimu loin a hong tung hi.
17:21 ‘En in, hih san takah om hi; hua san takah om hi,’ a kici thei kei hi. Bang hang hiam na cih uh leh, Pasian’ Gam in note sungah a om hi,” a ci hi.
17:22 Zeisu in khatvei a nungzuite kiangah, “Note in Mihing Tapa’ hun leh nite khat na muh nop hun uh a hong tung ding hi; ahih hangin na mu kei ding uh hi.
17:23 Mite in, ‘En un, hih lai takah a om hi. En un, hua lai takah a om hi,’ ci-in note kiangah hong gen uh hangin na paikhia kei un la, amau nung na zui kei un.
17:24 Bang hang hiam na cih uh leh, khuaphialep in van mongkhat panin phia a, van mongkhat dongin a taan’ mah bangin, Mihing Tapa’ ni ciangin a hong tung ding hi.
17:25 Ahih hangin a masa-in amah in gimna tampi thuakin, hih khang mite in hong nial ding uh hi.
17:26 Noah khan’ lai bangin Mihing Tapa’ ni ciangin zong a hong piang ding hi.
17:27 Noah in teembaw sungah a lut ni dongin mite in an ne tui dawnin, kipi kiteengsakin a om uh a, tuiciin a tun’ ciangin amaute khempeuh kisia uh hi.
17:28 Tua mah bangin, Lot a khan’ lai takin amaute in an ne tui dawn, sum lei sum zuak, an tuh inn lamin a om uh hi.
17:29 Ahih hangin Lot in Sodom khua sung pan a taikhiat ni-in, vantung panin mei leh kat guah bangin hong zu a, amaute khempeuh kang gawp hi.
17:30 Mihing Tapa a kilat ni ciangin tua tawh kibangin a piang ding hi.
17:31 Tua ni-in inn khum tungah a om mi in inn sunga a sum koih la dingin kumsuk kei hen. Lo lai-ah a omte in tua mah bangin ciahkik kei hen.
17:32 Lot’ zi na lungngai un.
17:33 Ama nuntakna a gum nuam peuhmah in nuntakna a mangthangsak ding hi. A nuntakna a mangthangsak peuhmah in nuntakna a gum ding hi.
17:34 Ke’n kong cih-inah, tua zanin lupna tungah a omkhawm mi nih in, khat kila-in khat kinusia ding hi.
17:35 An gawi khawm numei nih in khat kila-in khat kinusia ding hi;
17:36 lo lai-a nasem khawm mi khat kila-in khat kinusia ding hi,” ci-in thu a hilh hi.
17:37 Amaute in, “Topa aw, koi lai takah tua bangin a piang ding hiam?” ci-in a dot uh ciangin, Zeisu in, “Sapul omna peuhah musanete zong hong kikhawm ding uh hi,” ci-in a gen hi.