Luke 2
2:1 Tua lai takin leitung mi khempeuh a kisim nadingin, Kaisar kumpipa Augustas in thu a pia hi.
2:2 Kurinias in Siria gam menzi ahih lai takin hih kisimna a masa pen ahi hi.
2:3 Mi khempeuhte in kisim dingin amau khua ciatah a pai uh hi.
2:4 Josef in zong David’ suan ahih ciangin, a kidongsa a lawmnu Mari tawh kisim dingin, Galile gam Nazareth khua panin Judah gam Bethlehem kici David’ khua-ah a pai uh hi.
2:5 Tua Mari a gai zawh a sawt zo hi.
2:6 Amau Bethlehem khua-ah a om lai takun a suah hun tung a;
2:7 a ta cil suak a, puanin a tun khit ciangin zin tun’na innah omna ding om lo ahih ciangin, bawng ankuang sungah naungeek a sial hi.
2:8 Tua gamah tuucingte in gam lakah giakin amau tuu honte zanin a cing uh hi.
2:9 Topa’ vantungmi khat in amaute kiangah ding a, a kiimkot ah Pasian’ vang tang a, amaute in a kihta mahmah uh hi.
2:10 Ahih hangin vantungmi in, “Lau kei un. Bang hang hiam na cih uh leh, mi khempeuh ading nakpi nuamna thu note kong zasak ding hi.
2:11 Tuni-in, David’ khua-ah Topa Khazih ahi hong Gumpa in note adingin a suak zo hi.
2:12 Note in, ‘Bang limin thei ding ka hi uh hiam?’ na cih uh leh naungeek puanin kitun a, bawng an nekna kuang sungah kisialin a om na mu ding uh hi,” a ci hi.
2:13 Tua khit ciangin vantungmi tawh vantung galkap tampite in thakhatin hong kikhawm uh a,
2:14 “Van a sang belna-ah Pasian minthang ta hen. Leitung a deih mite tungah nopna om ta hen,” ci-in Pasian a phat uh hi.
2:15 Vantungmite in vantungah a ciah khit uh ciangin tuucingte in, “Eite Bethlehem khua-ah pai-in, Pasian hong lah hih a piangsa thu va en ni,” ci-in khat leh khat a kihopih uh hi.
2:16 Manlangin pai uh a, Mari, Josef leh bawng an nekna kuang sungah kisial a, om naungeek a mu uh hi.
2:17 A muh khit uh ciangin, amau kiangah naungeek thu kigensa thu teng a zasak uh hi.
2:18 Tuucingte’ thugenna zate khempeuh in lamdang a sa uh hi.
2:19 Mari in ahih leh, tua thute khempeuh ciamteh a, a lungsim sungah a lungngai hi.
2:20 Tuucingte in amau kiangah a gensa mah bangin, a zaksa a muhsa uh khempeuhte hangin Pasian’ min phatna lasa-in a ciah uh hi.
2:21 Tua naungeek’ vunat nading ni giat a cin’ khit ciangin, a gai ma-a vantungmi in a phuah kholh mah bangin a min Zeisu a phuak uh hi.
2:22 Tua nung ciangin Moses’ Thukham bangin, amau kisian’thosak nading ni a cin’ ciangin, amaute in naungeek Jerusalem khuapi ah a paipih uh hi.
2:23 “A ta upa pasal khempeuh in Topa ading a siangtho hi, a kici ding hi,” ci-in Topa’ Thukhamna lai sungah a kigelh bangin,
2:24 Topa kiangah a piak khit uh ciangin, “Vakhu nupa kop ahi zongin, kawl vakhu neu ahi zongin,” ci-in Topa’ Thukhamna lai sungah a kigelh bangin biakna a pia uh hi.
2:25 Tua lai takin Simeon kici mi khat Jerusalem khuapi ah a om hi. Tua pa dik a, Pasian zahtak a, Israel mipawlte’ nopsak nading a lamen hi. Kha Siangtho in ama tungah a om hi.
2:26 “Topa Khazih na muh matengin na si kei ding hi,” ci-in Kha Siangtho in a hilh zo hi.
2:27 Tua lai takin amah in Kha Siangtho tawh biakna innpi-ah pai a, a nu leh pate in naungeek Zeisu hangah Thukham ngeina bang hih dingin a paipih lai takun,
2:28 Simeon in Zeisu a ang-ah pomin Pasian a phat-inah”
2:29 “Topa aw, na genkholh mah bangin, Na sal in nopsakna tawh a pai nadingin thu hong pia in.
2:30 Bang hang hiam na cih leh, na mipawl Israelte’ minthan’na ahi zongin Gentailte tungah khuavak nading ahi zongin,
2:31 Mipawl khempeuhte mai-ah na bawl gupna,
2:32 Ka mitin ka mu zo hi,” a ci hi.
2:33 A nu leh pate in naungeek a genna thu lamdang a sa uh hi.
2:34 Simeon in amaute thupha a piak khit ciangin a nu Mari kiangah, “Hih naungeek in Israel mi tampite kipuk nading ahi zongin, thawh nading ahi zongin, mi tampi a lungngaihna a kilat nading ahi zongin, nialna a thuak nading lim a pian’ nading ahi zongin a kikoih hi.
2:35 Ahi hi. Namsau in nangma lungsim hong sun ding hi,” a ci hi.
2:36 Tua lai takin Asher pawl ahi, Fanuel’ tanu Anna min nei numei kamsang khat a om hi. Amah teek a, a nungak lai pan akipanin kum sagih bek pasal tawh a teen’ khit ciangin,
2:37 kum sawmgiat leh kum li dong meigong a, thungetna leh an tan’na tawh sun tawh zan tawh pelh loin bia-in biakna innpi lawi loin a om hi.
2:38 Amah tua lai takin tunga Pasian hehpihna phatin, Jerusalem khuapi suahtak nading a lamen mi khempeuhte kiangah tua naungeek thu teng a gen hi.
2:39 Amaute in Topa’ Thukhamna bangin na khempeuh a bawl khit uh ciangin, Galile gam amau khua Nazareth-ah a ciah uh hi.
2:40 Naupang khangto a, a thahatna khang a, lungpilna tawh a kidim hi. Pasian’ hehpihna thupha zong ama tungah a om hi.
2:41 A nu leh pate in kum simin Paisan pawikhamna Jerusalem khua ah a pai uh hi.
2:42 Zeisu kum sawm leh kum nih a phak ciangin, ngeina bangin Paisan pawikhamna-ah a paito uh hi.
2:43 Pawikham ni a cin’ khit ciangin, a nu leh pate a ciah lai takin naupang Zeisu in Jerusalem khua-ah a om lai hi.
2:44 A nu leh pate in thei loin a lawmte tawh naupang ton hi ci-in um-in ni khat lam a pai uh hi. Tua ciangin a behte a meeltheihte lakah a zong uh a;
2:45 a muh loh uh ciangin Jerusalem khua-ah nungkikin a zong uh hi.
2:46 Ni thum khit ciangin, naupang biakna innpi sungah thuhilhte lai zangah tu a, amaute thu ngai a, amaute kiangah thu dongin a om a mu uh hi.
2:47 Ama thu a za khempeuhte in a pilna leh a dawn’ kiknate lamdang a sa uh hi.
2:48 A nu leh pate in amah a muh uh ciangin lungmang uh a, a nu in, “Ka ta aw, bang hangin kote tungah hih bangin hong bawl na hi hiam? Na pa leh keimah in dahna lungsim tawh kong zong uh hi,” a ci hi.
2:49 Naupang in, “Bang hangin kei hong zong na hi uh hiam? Ka Pa innah om ka hih lam thei lo na hi uh hiam?” a ci hi.
2:50 Amau kiangah a genna thu amaute in a thei kei uh hi.
2:51 Amah in amaute tawh ciahsuk khawm a, Nazareth khua-ah tungin amaute thu mangin a om hi. A nu in hih thu khempeuh a lungsim sungah a ciamteh hi.
2:52 Zeisu’ lungpilna leh pumpi khang semsem a, Pasian mai leh mite mai-ah maipha a ngah semsem hi.