Luke 7
7:1 Zeisu in thu khempeuh mihonpite zak dingin a hilh khit ciangin, Kapernaum khua-ah a lut hi.
7:2 Galkap mangpa khat in a it mahmah nasempa khat nei a, tua nasempa cina-in a si dek tak hi.
7:3 Galkap mangpa in Zeisu thu a galzak ciangin, Judah upate a kiangah va sawl a, Topa hong pai-in tua nasempa a damsak nadingin a ngensak hi.
7:4 Tua upate in Zeisu kiang a tun’ uh ciangin, “Tua thu ama ading na hih nadingin tua pa a kilawm hi.
7:5 Bang hang hiam na cih leh, amah in ei pawl hong it a, eite kikhopna inn a lamsak hi,” ci-in a va thuumsak uh hi.
7:6 Zeisu in amaute tawh a paikhawm hi. Galkap mangpa’ inn hong naih uh ciangin, galkap mangpa in a lawmte khat sawlin “Topa aw, na kigimsak kei in. Keima inn khum nuai-ah nong lut dingin ka kilawm kei hi.
7:7 Tua mah bangin Topa kiangah kong pai ding kilawm ka sa kei hi. Na kamin thu pia leteh, ka nasempa a dam ding hi.
7:8 Bang hang hiam na cih leh, keimah in zong mangza-ah hong kikoih hi. Ka nuai-ah zong galkapte a om hi. Tua galkapte khat kiangah, ‘Pai in,’ ka cih ciangin a pai hi. Adang khat kiangah, ‘Hong pai in,’ ka cih ciangin a hong pai hi,” ci-in a gensak hi.
7:9 Zeisu in tua thu a zak ciangin lamdang sa a, ama nung a zui mihonte kiangah kihei a, “Ke’n kong cih-inah, hih zah tak upna Israel mipawlte lakah ka mu ngei kei hi,” ci-in a gen hi.
7:10 A sawltakte in inn a tun’ uh ciangin nasempa damin a om a mu uh hi.
7:11 A sawt loin Zeisu in Nain kici khua khatah pai a, a nungzuite leh mihonpite in amah tawh a pai khawm uh hi.
7:12 Khua kongpi kiang a tun’ uh ciangin, numei in ta khat bek a neih si a, a luang a puakkhiat lai tak uh ahi hi. Tua numei in meigong hi a, khuapihte tampi amah tawh a paikhawm uh hi.
7:13 Zeisu in tua numei a muh ciangin hehpihhuaisa a, “Kap kei in,” a ci hi.
7:14 A khut tawh lang lawng a, a puate a khawlsak hi. Zeisu in, “Tangvalpa aw, tho in ci-in nangma kiangah kong ci hi,” a cih leh,
7:15 misipa tho a, thu a gen hi.
7:16 Zeisu in tua pa a nu kiangah a pia hi. Mi khempeuh in lau uh a, “A lian mahmah kamsangpa in eite lakah hong piang zo hi. Pasian in ama mipawlte kiangah hong hawh zo hi,” ci-in Pasian’ min a phat uh hi.
7:17 Tua thu in Judah gam khempeuh akipan a kimkot gam sung khempeuh ah a kizeel khin hi.
7:18 Johan’ nungzuite in hih thu a vekpi-in ama kiangah a gen uh hi.
7:19 Johan in ama nungzuite nih sam a, Topa kiangah sawlin, “Nangmah in hong pai dingpa taktak na hi hiam? A hih kei leh midang khat ka lamen lai ding uh hiam?” ci-in a dongsak hi.
7:20 Tuate in Zeisu kiang a tun’ uh ciangin, “Nangmah in hong pai dingpa taktak na hi hiam? Ahih kei leh, midang ka lamen lai ding uh hiam? ci-in baptaizpa Johan in nangma kiangah kote hong dongsak hi,” a ci uh hi.
7:21 Tua hun lai takin Zeisu in cinatna, zawngkhalna leh, dawi gilo a vei mi tampi damsak a, mittaw tampite zong khua a musak thei hi.
7:22 Tua ciangin, “Note pai un la, na zaksa, na muhsa uh thute Johan kiangah va gen un. Mittawte in khua mukik thei uh hi. Khebaite in lam a pai thei uh hi. Phakte in damna a ngah kik uh hi. Bengngongte in khua a za thei uh hi. Misite in hin’na a ngah kik uh hi. Mizawngte kiangah Lungdamna Thu kihilh hi.
7:23 Keimah hangin pukna a ngah lo peuhmah in thupha a ngah ding hi,” a ci hi.
7:24 Johan’ kamtaite a paikhiat khit uh ciangin, Zeisu in mihonte kiangah Johan thu a gen-inah, “Note in bang en dingin gampa lakah paikhia na hi uh hiam? Huih mut a, a vuang pumpeeng en ding paikhia na hi uh hiam?
7:25 Bang en ding paikhia na hi uh hiam? Puanneel silhte en dingin paikhia na hi uh hiam? En un, puan hoih tawh kizeem a, mi nuamsate in kumpite’ inn sungah a om uh hi.
7:26 Ahih kei leh, bang en dingin paikhia na hi uh hiam? Kamsangpa en dingin paikhia na hi uh hiam? Ahi mah hi. Pasian’ kamsangpa sang in a lianzaw hi kong ci hi.
7:27 Lai Siangtho sungah a kigelh bangin: ‘En in, na pai nading lam sial ding, Na mai-ah ka sawltakpa ka paisak hi,’ a cihna in, tua mipa a cihna ahi hi.
7:28 Ke’n kong cih-inah, numei sung pan a suakte lakah Johan sangin a lianzaw khat beek a om kei hi. Ahih hangin, Vantung Gam sungah mi neupen in tuapa sangin a lianzaw hi,” a ci hi.
7:29 Siahdongte akipan mite khempeuh in hih thu a zak uh ciangin, Johan’ baptaizna a ngah manun Pasian dik a sa uh hi.
7:30 Ahih hangin, Farisaite leh laitheite in amau noptuam nadingin Pasian’ deihna a nial uh a, Johan’ baptaizna a sang kei uh hi.
7:31 Zeisu in, “Tulai khang mite bang tawh ka genteh ding hiam? Kua mi tawh kibang ahi uh hiam?
7:32 Sumbukah tu-a a om naupangte in khat leh khat kiko-inah, ‘Tamngai ka tum uh hangin, na laam kei uh hi. Ka thuum uh hangin na kap kei uh hi.’ A kici naupangte tawh kibang uh hi.
7:33 Bang hang hiam na cih uh leh, baptaizpa Johan in an lum ne lo, leenggahtui dawn loin hong pai a, note in, ‘Hihpa dawilawm nei hi,’ na ci uh hi.
7:34 Mihing Tapa in an ne tui dawnin hong pai a, note in, ‘Hihpa in an hai zu haipa hi. Siahdongte leh migilote tawh zawlin a kiman hi,’ na ci uh hi.
7:35 Lungpilna in a tate khempeuh tung panin diksakna a ngah hi,” ci-in a gen hi.
7:36 Tua lai takin Farisaite khat in an vak dingin Zeisu a sap khit ciangin, tua Farisaipa’ inn sungah lutin an a ne hi.
7:37 Tua khua sungah numei gilo khat a om hi. Amah in Farisaipa’ innah Zeisu in an ne, ci-in a theih ciangin paknamtui suangngo thawl khat paipih a,
7:38 a nung lam pan a khe kiangah ding-in kap a, a khe khitui tawh kawtsakin, a sam tawh a nul hi. Ama khe zong nam a, paknamtui tawh a zut hi.
7:39 Zeisu an a vak Farisaipa in a muh ciangin, “Hih mi in Pasian’ kamsangpa ahih takpi leh, a lawng hih numei in bang mi ahi, a gilo numei hi, ci-in a thei ding hi,” ci-in a lungsim sungah a gen hi.
7:40 Zeisu in zong, “Simon aw, nangma kiangah kong gen ding khat a om hi,” a cih ciangin amah in, “Sia aw, hong gen in,” a ci hi.
7:41 Zeisu in, “Sum neipa khat in leiba mi nih a nei hi. Khat in dangka zanga, khat in dangka sawmnga a ba hi.
7:42 Amaute in leiba loh nading a neih loh uh ciangin sum neipa in, tuate gel’ leiba a maisak hi. Tua bang ahih leh, tua nihte lakah kua pen in sum neipa a it zaw ding hiam?” ci-in a dong hi.
7:43 Simon in, “A maisakna tam zaw a ngah mi in it zaw-in ka um hi,” a ci hi. Zeisu in, “Na up bang a man hi,” ci-in a gen hi.
7:44 Tua ciangin numei lam kihei a, “Nang in hih numei na mu hiam? Na innah kong lut lai-in khe sil nading tui nong pia kei hi. Hih numei in ka khe khitui tawh kawtsak a, a sam tawh a nul zo hi.
7:45 Na hong nam kei hi. Amah in ahih leh, inn kong lut khit phet akipan ka khe a nam tawntung hi.
7:46 Ka lu sathau nong nilhsak kei hi. Amah in ahih leh, ka khe paknamtui tawh hong nilhsak hi.
7:47 Tua ahih ciangin, ke’n kong cih-inah ama mawhna tam napi-in a kimaisak hi. Bang hang hiam na cih leh, amah in tampi-in a it hi. A tawmno khat mawhna a kimaisak mi in tawmkha-in a it thei hi,” ci-in Simon kiangah a gen hi.
7:48 Numei kiangah, “Na mawhna kimaisak zo hi,” a ci hi.
7:49 Amah tawh an ne khawmte in, “Mawhna teng a maisak hih pa in kua mi ahi hiam?” ci a, amau lungsim sung uh ah a gen uh hi.
7:50 Zeisu in,”Na upna in nang hong gum zo hi. Nuam in la, pai in,” ci-in numei thu a pia hi.