Library · ctd

Ephesians 3

3:1 Tua thu hangin note phattuam nadingin ngaihsunin, keimah a hong piak Pasian’ hehpihna thupha note in na zak uh leh, Gentail mi ahi note hangin Khazih Zeisu’ thongkiapa kei Paul in, 3:3 nidang lai-inah thu tawm ka gelh mah bangin, Pasian’ thupiak kholhna hangin thuthuk hong kilang sak hi. 3:4 Tua thute na sim le-uh teh, Khazih’ thuthukte ka theih note in na thei ding uh hi. 3:5 Tua thuthukte in a siangtho sawltakte leh Pasian’ kamsangte kiangah tu lai taka Kha Siangtho hangin a kilat mah bangin, nidang lai-inah mihingte kiangah a kilang ngei kei hi. 3:6 Tua thuthuk in: Gentailte in Lungdamna Thu hangin Judah mite tawh a luah khawm mi, pumpi khat’nate suak khawmin Khazih Zeisu tawh kipawl thuciamna a zomkhawm mi a suak uh hi. 3:7 A vangliatna-a bawlphatna bangin keimah hong piak Pasian’ hehpihna ka ngah mah bangin, tua Lungdamna Thu a hilh nasem ka suak zo hi. A kizong khia khin zo lo Khazih hauhna thu Gentailte kiangah hilh dingin ahi zongin, 3:9 na khempeuh a bawl Pasian sungah tanglai tawntungin kiseelin a om thuthuk tawh kipawl thu in bang ci bang ahi cih mi khempeuh a theih sak nading ahi zongin Pasian mite lakah a neu bel mi sangin a neuzaw keimah tua hehpihna thupha hong pia zo hi. 3:10 Tua ahih ciangin i Topa Khazih Zeisu sungah Pasian’ tawntung ngimna omsa bangin vantungah a om ukna leh vangliatnate in pawlpi hangin, a lamdang Pasian’ lungpilna a kitheih nading ahi hi. 3:12 Tua Topa Zeisu sungah upna hangin eite lungkimin, lau lohna lungsim nei-in, Pasian kiangah tum theihna i ngah hi. 3:13 Tua ahih ciangin note’ minthan’ nading ngaihsunin note ading ka thuak gimna hangin lungkia kei un ci-in kong hanthawn hi. 3:14 Tua ahih ciangin vantung leitungah a om mi khempeuhte’ pianna, Pa Pasian mai-ah khukdin’in thungenin ka om hi. 3:16 Ka thungetna in: Topa in ama Kha Siangtho hangin note sung mi un hatna tawh kip tawntungin, 3:17 upna hangin Khazih in note lung sungah a om nadingin, minthan’na tawh a dim mah bangin note hong pia-in, itna thu-ah zungkha-in, khuam zong kiphut kipin note in, 3:18 misiangthote tawh a dung, a vai, a sang, a niamte khenin na theih khawm nading uh ahi zongin, 3:19 nomau pilna tawh na theih zawh loh uh Khazih’ itna na theih tel nading uh ahi zongin, note in hih thei-in Pasian’ kicin’na a om khempeuh tawh na kidim nading uh thu ka ngen hi. 3:20 Eite tungah hong bawl vangliatna mah bangin, i nget i ngaihsut sangin ahih thei zaw Pasian tungah pawlpi sungah ahi zongin, Zeisu Khazih sungah ahi zongin khan tawntungin minthan’na om tawntung ta hen! Amen.