Library · ctd

Colossians 2

2:1 Note leh Laodikia khuamite-a kipan kei maitang mu ngei lo mi a om khempeuhte in, ki-itna tawh kipawlin Khazih ahi Pasian’ thu thukpi thei-in up khialhna om lo pilna hauhnate tawh dimin, lungsim kihehnep nadingin bang zaha lian kidemna, kidona ka thuak thu note ka hong theisak nuam hi. 2:3 Tua Khazih sungah pilna sum, theihna sum a om khempeuh kiseelin om hi. 2:4 Kuamah in kheemna kam tawh note hong kheem zawh loh nadingin hih thu ka hong gen hi. 2:5 Keima pumpi in note tawh kikhenin ka om hangin, ka lungsim note tawh omkhawm a, note in a ngeina bangin na bawl theihna uh ahi zongin, Khazih sungah upna kipin na om uh ahi zongin ka muh ciangin ka lung a dam hi. 2:6 Tua ahih ciangin Khazih Zeisu, Topa-a na san’ khit uh ciangin tua Topa sungah gamta-in, zung kha-in, kilamin omin, kihilhna na ngah khit uh mah bangin upna-ah kipin, hehpihna phatna tawh upna khangin kicingin om un. 2:8 Khazih thu zui lo mite’ tangthu leh leitung thungeek zui-in, leitung pilna leh mawkna khempeuh hangin note kuamah in hong sut, hong bawlsiat theih loh nadingin kikem un. 2:9 Bang hang hiam na cih uh leh, Pasian’ lim tawh a dim khempeuh in Khazih’ pum sungah kilangin a om hi. 2:10 Ukna thu leh vangliatna thu a uk Topa sungah note in kicingin na om uh hi. 2:11 Khazih’ sungah vunatna hangin ci-le-sa pumpi paaikhia-in, khut tawh kibawl lo vunatna Topa tawh na ngah uh baptaizna hangin, amah tawh na kivui khawm uh hi. Khazih sihna pan a thosak Pasian’ vangliatna na upna uh hangin baptaizna ngahin tua Topa tawh thawhkikna na ngah uh hi. 2:13 Mawhna-ah ahi zongin, pumpi vunatna ngah lohna-ah ahi zongin si-in a om note, Khazih tawh kibangin hong hingsak a, eite khialhna khempeuh a hong maisak hi. 2:14 Eite lang khatah kilem lo-a a om ngeina tawh kipawl kiciamna lai sumangin, singlamteh tungah khen a, eite kikal sung pan a paaimang hi. 2:15 A sangbel vangliatna leh uknate a laksak khit ciangin, kitel takin lak a, singlamteh hangin zawhna pawi a khaam hi. 2:16 Tua ahih ciangin annek tuidawn ahi zongin, pawikham ni, kha det ni, Nipi ni tawh kipawl thute ahi zongin, note kuamah in kidongin thu kikhensak kei un. 2:17 Tua nate in a nung ciangin a hong piang ding lim hi a, pumpi ahih leh, Khazih ahi hi. 2:18 Lutang suang loin, pumpi ci-le-sa tawh kipawl ama lungsim tawh kisathei mawkin, ama theih loh a muh loh thute kantelin lungsim kiniamsakna-ah ahi zongin, vantungmi biakna-ah ahi zongin, nuamsa-a a om mi khat nangawn note lungdamna kisutsak kei un. 2:19 Lu tung pan pumpi khempeuh in a guh a taang tawh a kipawlnate hangin thahatna piangin, Pasian’ deihna tawh kituakin a khang thei hi. 2:20 Note in leitung thungeek pan Khazih tawh na sikhawm uh ahih leh, bang hangin tua leitungah a om lai bangin na gamta uh hiam? Khatvei zatna tawh a muat pak thei nate ahi, mihing ngeina banga kihilhna leh kikhalna lel ahi—‘Len kei in,’ ‘Ciam kei in,’ Lawng kei in,’ kici thute bang hangin mangin na om uh hiam? 2:22 Tua nate khempeuh zatna hangin muat nading a piang ding hi. 2:23 Tua bang ngeina in ut thu biakna, lung kiniamsakna, pumpi bawlsiatna tawh kipawl pilna a nei bangin a om hangin, pumpi deihna zuih loh nading, khaam nadingin a kiman’na khat beek a om kei hi.