1 Timothy 4
4:1 Kha Siangtho in a tel taka a genkholh inah, a tawpna hun ciangin,
4:2 amau lungsim uh kisuan’na-ah sik sa tawh ciamtehna a ngah khit uh ciangin, zuauthu a gen thei mite’ simtatna hangin mi kimkhat in upna thu zui nawn loin, a kheem thei khate ahi zongin, dawigilote’ thuhilhna ahi zongin a ngai ding uh a, kiteen’ loh nading ahi zongin, thuman thutak um-a a thei mite in hehpihna phat-a a neek ding uh Pasian’ bawlsa an pawl pawlte tan’ ding ahi zongin, a kham ding uh hi.
4:4 Pasian’ bawlsa khempeuh a pha hi a, hehpihna phatin a kisan’ leh, bangmah tan’ ding a om kei hi.
4:5 Bang hang hiam cih leh, Pasian’ thu tawh ahi zongin, thungetna tawh ahi zongin a kisiangthosaksa ahi hi.
4:6 Hih nate nang in ute naute kiangah na hilh leh, upna thu leh tu dongin nang na zuih thuhilhna a hoih tawh kivakin, Khazih Zeisu’ nasem hoihpa na hi ding hi.
4:7 Numei teekte in a gen theih uh ahi mawkna tangthute paaikhia in. Pasian biakna lamah nuamsa a, na om nadingin na kiseksak in.
4:8 Bang hang hiam cih leh, pumpi ading kiseksakna in phattuamna tawmkha a pia thei hi; Pasian biakna lamah nopsakna in tu laitak nuntakna leh tu nung ciangin a piang ding nuntakna tawh kipawl thu kiciamna ngah a, na khempeuhah phattuamna hong pia thei hi,
4:9 a cihna kam in thuman thutak hi a, a vekpi-in san’ ding a kilawm kam zong ahi hi.
4:10 Tua ahih ciangin mi khempeuh Gumpa ahi, a um mite a man takpi a gum, a nungta Pasian, eite in muangin i um a, hahkatin semin, simmawhna zong i thuak hi.
4:11 Hih thute vaikhak in la, hilh in.
4:12 Khangno lai na hih hanginah kuamah kisimmawhsak kei in. Thugenna, gamtat ngaihsutna, midang itna, upna, siangthona sung pan a um mite ading limpha na suak in.
4:13 Ka hong pai matengin Lai Siangtho simin, mi hansuahna leh thuhilhnate hahkatin om in.
4:14 Genkholhna tawh, pawlpi upate’ khutngakna tawh nang hong kipia thupha letsong zang loin om kei in.
4:15 Na khan’tohna mi khempeuh mai-ah a kilat nadingin hih nate deihpha in la, hahkat in.
4:16 Nangmah ahi zongin, na thuhilhna ahi zongin, kikeem in la, na om in. Hih nate-ah na kip tawntung in. Tua bang na hih leh, nangmah ahi zongin, na thu a ngaite ahi zongin gupna na ngahsak ding hi.