Library · ctd

2 Timothy 3

3:1 A nunung bel nite lai takin a haksa hunte a hong piang ding hi ci-in na ciamteh in. 3:2 Bang hang hiam cih leh, mite in amau pumpi uh it mi, sum it mi, a kisathei mi, lungkhauh mi, mi gensia thei mi, a nute a pate thu a mang lo mi, hehpihna a phawk lo mi, a siangtho lo mi, 3:3 ngeina bang itna a nei lo mi, kitotna lungsim nei mi, mi a gendai thei mi, a pumpi kikem zo lo mi, a hangsan mi, a hoih lam a deih lo mi, 3:4 thuciam a siasak mi, thuhilh a ngai nuam lo mi, kisaktheihna tawh a hai thei mi, Pasian sangin leitung nopsakna a it zaw mi, 3:5 Pasian biakna puatham teng zui uh a, ahih hangin a vangliatna a nial mi ahi ding uh hi. Tua bang mite na peel in. 3:6 Tua mite lakah simtatin innte sungah a lut khit uh ciangin, deihgawhna atuam atuam zui-in, 3:7 a kihilh niloh hangin cikmah hunin thuman thutak a thei thei lo numei haite’ thuzawh mite a om uh hi. 3:8 Zannes leh Zabres in Moses a nial uh mah bangin tua mite in zong thuman thutak a nial uh hi. Amaute a lungsim uh kisia-in upna thu-ah thudotna a thuak zo lo mi ahi uh hi. 3:9 Tua mi nihte’ haina in mi khempeuh mai-ah a kilang mah bangin, hih mite’ haina zong kilang ding a, amaute in sotto khangto thei lo ding uh hi. 3:10 Nang na hih leh, keima thu hilhna, ka gamtatna, ka hanciamna, ka upna, ka lungduaina, ka itna, ka zawhna, ka thuak bawlsiatna leh gimna-a kipan, 3:11 Antiok khua, Ikonium khua leh Listra khuate-ah ka thuak gimna na thei hi. Tua thu khempeuhte pan Topa in kei hong gumkhia hi. 3:12 Ahi hi. Khazih Zeisu sungah kipin a nungta nuam mi khempeuhte in zong bawlsiatna a thuak ding uh hi. 3:13 A gilo leh mi kheem thei mite a hih uh leh, gilo semsem ding uh a, midangte kheemin, amau mahmah zong a kikheem ding uh hi. 3:14 Nang na hih leh, na sinsa thu leh na lungsim sunga na san’sa thu-ah ahi zongin, Khazih Zeisu sunga upna tungtawn a, gupkhiatna na ngah nadingin lungpilna a hong pia thei Lai Siangtho, na neu lai-a kipanin na theihsa thu ahi zongin, ciamteh in la, tua na sinsa, na upsa thute-ah kipin om in. 3:16 Pasian in ama humopna tawh hong piak Lai Siangtho-a om khempeuh in, Pasian’ mi in kicing a, ahoih na apawlpawlte a sep theih nading a, a kigingkhol mi a suah nadingin, thu hilh ding, mawhna lak ding, diktat nading thu hilh ding, leh thuman thutak hilh nadingin thupha a bawl hi.