Library · ctd

Titus 2

2:1 Nangmah na hih leh thuhilhna siangtho tawh a kituak thute na hilh in. 2:2 A teek pasalte in a pumpi deihna khaam nading, a khuaval zulhtat loh nading, a lungkip nading, upna lamah a kip nading, itna a neih nading, a thuak zawh nading na hilh in. 2:3 Tua mah bangin numei teekte in zong Pasian’ thu tawh kilawm gamtatna a bawl nading, midangte a gendai loh theih nading, kham lua-a leenggahzu’ sila ahih loh nading, thu hoih a hilh theih nading tham loin, Pasian’ thu in gensiatna a thuak loh nadingin a khangno numeite in a pasal a it ding, a tate a it ding, 2:5 a khuaval zulhtat loh ding, mi siangtho hi ding, a inn sung khempeuh a keem ding, migi ding, a pasal’ ukna a mang ding, thu a hilh theih nadingun na hilh in. 2:6 Tua mah bangin tangvalte in zong khuaval zulhtat loh nading na hilh in. 2:7 Na khempeuh ah gamtatna pha lim, nangmah mah in na pumpi-in na lak in. Thu na hilh ciangin kheemna thu om loin, khuaval zulhtat loin, mawhsakna om lo thu siangtho na hilh in. 2:8 Tua bang na hih leh, lang khatah a om mi in eite hong gensiat nading thu ngah loin a maizum ding hi. 2:9 Silate in eite Honpa Pasian’ thuhilhna khempeuh ah a zep theih nadingun amau tote’ ukna mangin, nial loin, na khempeuh a deihhuai mi hih nading leh gu sim loin na khempeuh ah dikna a kilatsak nadingun, hansuahin zol in. 2:11 Bang hang hiam na cih leh, thupha lametna, a lian Pasian leh eite Honpa Topa Zeisu Khazih, minthan’na tawh hong kilat ding eite in lamenin, Pasian thu tawh kituak lo gamtatna leh deihgawhnate 2:13 nialin; tu lai hunin khuaval zulhtat lohna, thuman gamtatna, Pasian biakna lamah nopsakna bawl nadingin, Pasian’ hehpihna thupha hong kilang a, mi khempeuh kiangah gupna thu hong paipih zo hi. 2:14 Tua Topa in mawhna khempeuh sungpan eite hong tankhia dingin ahi zongin, gamtatna ahoihte ah lungsim utna nei-in, ama hong neihtuam dingin, ama ading siangthosak dingin ahi zongin eite ading ama pumpi a pia hi. 2:15 Hih thute hilhin, hansuahin zol in, thuneihna aana khempeuh tawh amaute na taai in. Kuamah kisimmawhsak kei in.