Library · hlt

1ES 7

7:1 Te vaengah Coelesyria neh Phoenica kah khoboeih Sisnnes khaw, Sathrabuzanes khaw, a pueipo rhoek khaw, manghai Darius kah opaek te a vai uh. 7:2 Bibi cim te ngaithuen halue la a tungaep uh tih, Judah a hmca rhoek neh bawkim kah boeilu koek rhoek te khaw a talong uh. 7:3 A cim bibi khaw hma song tih tonghma Zekhariah neh Haggai long khaw ol a phong rhoi hatah, 7:4 Israel kah Boeipa Pathen rhang nen ni a coeng uh. Te dongah Persian manghai Cyrus khaw, Darius neh Artaxerxes khaw a kotling uh. 7:5 Im cim te Darius manghai a kum rhuk nah, Adar hla hnin kul hnin thum vaengah a coeng uh. 7:6 Israel pilnam boeih khaw, khosoih rhoek, Levi rhoek khaw, vangsawn lamkah aka mael tih amih taengah aka koep boeih khaw Moses cabu dongah a daek bangla a saii uh. 7:7 Boeipa im nawnnah ham te vaito yakhat, tutal yahnih, tuca yali, 7:8 Israel koca kah a lu hlainit a lo vanbangla, Israel kah tholh boirhaem ham te maetal pum hlai nit a paek uh. 7:9 Khosoih rhoek neh Levi rhoek te amah hui neh, a hnicu te rhongpai la pin pai uh. Moses cabu dongkah bangla Israel Pathen Boeipa bibi ham khaw, vongka boeih kah thohtawt rhoek khaw rhip om uh. 7:10 Vangsawn lamkah aka mael Israel pilnam boeih loh amah kum kah hlakhat hnin hlai li vaengah tah Yoom a caak uh. Amah te tue vaengah khosoih rhoek neh Levi rhoek khaw amamih te ciim uh. 7:11 Amah te vaeng Judah rhoek bueng pawt tih Levi rhoek khaw amah ciim hamla cet uh. 7:12 Levi rhoek loh yoom hmueih te pilnam aka mael boeih ham khaw, khosoih rhoek neh amamih ham khaw a ngawn uh. 7:13 Vangsawn lamkah aka mael Israel ca boeih loh yoom hmueih te a caak uh. Khohmuen pilanam kah tueilaeh koi lamloh amamih te boeih hoep uh tih Boeipa te a tlap uh. 7:14 Vaidamding khotue te a tuem uh uh tih Boeipa taengah omngaih uh. 7:15 Amih kawng dongah Boeipa loh Assyria manghai kah kopoek khaw a tho sak tih, kholong kut khaw Israel kah Boeipa Pathen bibinah la a khueh.