Library · hlt

1MA 11

11:1 Egypt manghai loh a rhalkap te tuikaeng kah laivin yet la muep a coi tih sangpho khaw muep a lo pah. A thailainah rhangneh Alexander kah ram te amah ram khuiah det hamla cai. 11:2 Syria taengah khaw rhoepnah ol ni a pat. Te vaengah khopuei pilnam loh anih hamla vongka a ong pah tih anih te hmuh hamla cet uh. Anih tah a napa Alexander kah a masae la a om dongah manghai Alexander loh anih doe ham te ol a paek. 11:3 Tedae khopuei khuila a kun vaengah tah khotakuem ah rhaltawt boeih a khueh. 11:4 Azotus a pah vaengah Dagon bawkim kah hloi khaw, Azotus neh a kaepvai kah imrhong te khaw, hlang rhok a hmoeng uh te khaw a tueng uh. Te kah rhok te tah rhalvaengah Jonathan loh a hoeng tih long taengah muep a hmoek. 11:5 Jonathan loh a saii te manghai taengah a thui uh a thet uh dae manghai te duem ngam. 11:6 Jonathan loh manghai te Joppa ah omthen la a doe. Kat neh uem uh rhoi te hlaem at pahoi rhaeh. 11:7 Te phoeiah Jonathan loh manghai Eleutherus tuiva duela a thak tih Jerusalme la mael. 11:8 Manghai Ptolemy loh tuitunli kah Selucia duela tuikaeng khopuei boeih kah uknah te a loh tih, Alexander te a khoboe thae neh a taeng. 11:9 Manghai Demetrius taengla laipai tuei tih, “Halo, khat neh moi bop pawn sih, Alexandr loh a yunah ka canu ke nang kan pae eh, na pa kah ram ah manghai la om laeh. 11:10 Ka canu te anih taengah ka paek, tedae kai ngawn hamla n'taeng dongah ka yut coeng,” a ti nah. 11:11 A ram te a nai pa dongah Alexander kah a thae te a thui. 11:12 Te dongah a canu te anih taeng lamloh a lat tih Demetrius taengla a paek. Alexander taeng lamloh suesa uh coeng dongah a rhal la om te a phoe. 11:13 Ptolemy te Antiok la kun tih Asia kah rhuisam te a khuem. Te dongah anih tah a lu dongah rhuisam la, Egypt neh Aisa kah rhuisam te a khuem. 11:14 Te vaengah Te pingpang kah pilnam tah boe a koek uh dongah. manghai Alexander tah Cilicia om. 11:15 Te te Alexander loh a yaak vaengah anih te caem neh a paan. Ptolemy khaw anih te hum uh ham rhalkap a yet te a paan a tloek. 11:16 Te dongah Alexander tah Arabia la yong tih tungaepnah a tlap. Te dongah manghai Ptolemy loh caemthang a rhuk. 11:17 Arab kah Zbdiel loh Alexander kah a lu te a rhaih pah tih Ptolemy taengla a pat. 11:18 Tedae manghai Ptolemy tah a hnin thum dongah pahoi duek. Te dognah hmuencak khuikah rhalkap rhoek te hmuencak kaepvai kah loh boeih a ngawn. 11:19 Te phoeiah tah Demetrius te kum ya sawmrhuk kum rhih vaengah manghai la pahoi om. 11:20 Te khohnin ah tah Jerusalem kah rhalmah im te loh hamla Judea rhoek te a coi. Caemtloeknah seh khaw muep a khueh thil. 11:21 Tedae a namtu kah a thinah hnukpoh rhoek long tah manghai taengla cet uh tih, “Jonathan loh rhalmahhmuen te dum coeng,” a ti nah uh. 11:22 Te te a yaak vaengah a thintoek. Te dongah a yaak van te pahoi hlah uh tih Ptolemais la cet. Jonathan taengah khaw rhalmah im dum voel pawt ham, a coeng thai khuila Ptolemaih kah ngoltunnah dongah tlek hum uh ham ca a pat. 11:23 Jonathan loh a yaak vaengah phat a dum hamla ol a paek. Israel khuikah a hamca rhoek neh khosoih rhoek khaw a tuek tih amah te duek la hmoel uh. 11:24 Manghai taengla a caeh ham te cak neh sui khaw, himbai khaw, a tloe kut doe khaw muep a khuen pah. Te dongah anih loh maelhmaithen lat a dang. 11:25 A namtu taengkah hnukpoh rhoek loh anih te manghai taengah Jonathan kah te kamkainah a khueh uh. 11:26 Tedae manghai loh a voemtoieh vaengah khaw boei tangtae bangla a voemtoei. A paya boeih kah mikhmuh ah anih te a thangpom. 11:27 Anih kah khosoih boei a binah khaw lahma kah muep a thangpom bangla koep a cak sak. Anih te paya khuikah a tanglue pakhat la koep a khueh. 11:28 Jonathan loh Judea neh Samaria peng kah tah mangmu loeih sak tih tangka talent yathum dawk paek ham khaw manghai taengah a bih. 11:29 Manghai long khaw a ngai pah van dongah he kah olka boeih dongah he Jonathan ham a dangkah bangla ca a daek pah. 11:30 Mangha Demetrius loh a manuca Jonathan neh Judah namtu boeih te kut kan tuuk. 11:31 Hekah catlaep dongah he ka hui Lasthenes taengah nangmih khaw na ka pat te ni nangmih ham khawn kan daek. 11:32 Manghai Demetrius loh a napa Lasthenes te kut kan tuuk. 11:33 Judah namtu taengah hnothen saii ham te ka poek. Amih tah mah paya la om tih mamih olrhi dongah khaw uepom la om uh. Mamih taengah kopoek then ni a tueng sak uh. 11:34 Amih kah khoyo la aka om Judea neh Aphairma peng neh Lydda khaw Ramthaim khaw amih hut la koep ka cak sak. 11:35 A tloe paek hamla aka om mamih taengah thoh ham parhapakhat khaw, mangmu khaw, lungkae rhom, rhuisam mangmu khaw mamih taengah a thoh ham pa boeih te amih ka loeih sak coeng. 11:36 Ka loeih sak tangtae he tah tahae lamloh a voelvai duela koep rhi lat boel saeh. 11:37 Te dongah hekah catlaep he a then la ngaithuen. Jonathan taengah khaw ka paek coeng tih hmuencim kah miklaw ah tai saeh,” a ti nah. 11:38 Manghai Demetrius loh a sawt vaengah khohmuen amah hlan kah lakah mong tih anih aka tloelh khaw om pawh. Te dongah rhalkap te boeih a paa sak tih a im la boeih mael uh. Namtom sanglak lamkah a loh rhalkap rhoek bueng te dawk a om sak. Te vaengah a khuui la rhalkap aka bi rhoek long tah anih te a thinah uh. 11:39 Lamhma ah Alexandr aka bomkung la aka om hlang pakhat Trypho he om van. Rhalkap boeih loh Demetrius taengah a kohuet te anih loh a hm uh. Te dongah Alexander capa a noe Antiokus aka khut tih Arab Imalkue taengla cet. 11:40 Antiokus te a napa yueng manghai la om sak ham a kut dognah hlah pah mai tila Trypho loh Imalkue taengah tlal a bih. Demertius kah a saii boeih te Imalkue taengah a puen pah tih, Demetrius kah rhalkap rhoek a kohuetnah khaw a thui pah. Te dongah khohnin a sen puet om. 11:41 Te vaengah Jerusalem rhalmah hmuen kah rhalkap khaw, hmuencak kah rhalkap khaw boeih khoe hamla Jonathan loh manghai Demetrius taengah a bih. Amih loh Israel ni mat a ngawn uh hae. 11:42 Te dongah Demetrius loh Jonathan taengla ol koep a voeih tih, “Nang neh na namtu hamla he bueng he ka saii pawt vetih, a tuethen ni ka dang atah nang neh na namtu te thangpomnah muep kan paek bitni. 11:43 Tahae ah kai aka bom la hlang bet han tueih mai dae, ka rhalkap rhoek loh kai boeih n'tloelh uh coeng,” a ti nah. 11:44 Te dongah Jonathan hlang rhalh thawngthum te anih ham Antiok la a tueih pah. Amih te manghai taengla a pha vaengah amih a pha te manghai loh a uem. 11:45 Te vaengah khopuei khuikah pilnam rhoek te tingtun uh tih hlangmi la thawng yakhat thawngkul lo uh. 11:46 Tedae manghai te im khuila vik yong. Te vaengah khopuei pilnam loh khopuei kah longpuei caehtung te boeih a huul uh tih a muk uh. 11:47 Te dongah amah aka bomkung la Judah rhoek te a khue tih amih loh a kaepvai ah boeih a thingthung uh. Te phoeiah khopuei khuiah khaw boeih yaal uh. Hnin at kho ah hlang thawng yakhat tluk a ngawn uh. 11:48 Khopuei te hmai duel a hla uh dongah te khohnin ah kutbuem muep a dang uh tih manghai te khaw a hlawt uh. 11:49 Judah rhoek loh khopuei a loh tih a ngaih bangla a saii te pilnam loh a hmuh vaengah a thiomnah khaw yawk uh sumsoek tih manghai taengah rhenbihnah neh pang uh. 11:50 “Kaimih he rhalmongnah m'pae laeh, Judah rhoek loh kaimih neh khopuei a ngawn te paa laeh saeh,” a ti uh. 11:51 Te dongah a kut a voeih uh tih rhoepnah a saii uh. Te vaengah Judah rhoek tah manghai neh ram khuikah pilnam mikhmuh thangpomnah a dang. Te phoeiah amih te Jerusalem la kutbuem neh muep mael uh. 11:52 Manghai Demetrius te a ram kah ngolkhoel dongah ngol tih kho hmuen khaw anih a om hlankah lakah mong. 11:53 Tedae a olkhuenah dongkah olka te boeih a phae. Jonathan te vik a hlakhla tak tih, a bisai te kolonah a khueh kolla Jonathan te a tloh ngai la a phaep. 11:54 He phoeiah tah Trypho te a taeng cadong ca Antiokus neh mael tih a manghai sak phoeiah rhuisam a khuem sak. 11:55 Te vaengah Demetrius loh a hnawt rhalkap boeih loh anih te ven uh tih Demetrius te a tloelh uh. Te dongah anih te yong tih ki mael. 11:56 Trypho loh vuei neh Antioch taemrhainah te khaw a loh pah. 11:57 Te phoeiah cadong Antiokus loh Jonathan te ca a pat tih, “Kai loh nang te khosoih boei la kan pom tih, paeng pali soah nang kang ngol sak. Nang tah manghai paya la na om,” a ti nah. 11:58 Anih ham te sui baelphaih neh caboei dongkah hnopai khaw a paek. Sui boengloeng dongah a ok ham khaw hamsum a paek. Daidi himbai neh sui hnisui khaw a vah sak. 11:59 Jonathan mana Simon te Tyre Ladder lamloh Egypt khorhi hil kah khoboei la a khueh. 11:60 Jonathan te tuiva rhalvang neh khopuei rhoek la cet. Te vaengah Syria rhalkap boeih te anih taengah huitai la boeih tingtun uh. Askalon a pha vaengah tah khopuei pilnam loh a doe tih hinyahnah a paek uh. 11:61 Te lamloh Gaza la a caeh vaengah tah Gaza loh imthoh a khaih pah. Te dongah a dum tih a khaepdan khaw hmai neh a hoeh phoeiah a poel ay yoe. 11:62 Te daengah Gaza pilnam loh Jonathan te a hloep tih amih neh rhoepnah a saii. Te vaengah a khoboei kah a ca rhoek te tamna la a tuuk tih amih te Jerusalem la a thak. Anih loh a khohmuen te Damasku hil khaw a pha. 11:63 Demertius kah a sal rhoek loh Galile kah Kadesth ah caem neh muep cetih anih a boeinah lamloh khoe ham a caii te Jonathan loh a yaak. 11:64 Te dongah amih doe ham Jonathan cet tih a man Simon tah a mah kho a caeh tak. 11:65 Simon te Bethzur imdan ah rhaeh. Te khohnin a sen tloek tih khoep a tlaeng. 11:66 Te phoeiah tah a hloep uh tih rhoepnah ol a thui uh dongah a ngai pah. Te lamloh amih te a khoe tih khopuei a khohrhang te loh phoeiah rhaltawt a khueh pah. 11:67 Jonathan neh a rhalkap rhoek tah Gennesaret tui taengah rhaeh uh. Min cang ah amih te Hazor kolvan la yue cet uh. 11:68 Te kolvan ah kholong rhalkap loh anih ana mah. Amih loh tlang ah rhongngol khaw a khueh ngawn dae anih neh a maelhmai rhoi hum uh. 11:69 Te vaengah rhongngol hlang rhoek te amah hmuen lamloh puk cu uh tih caemtloek dongah thum uh. 11:70 Jonathan kah hlang boeih te vik yong uh. Abslom capa Mattahias, Chapli capa Judas, caempuei rhalkap kah rhalboei rhoek bueng te dawk om. 11:71 Jonathan loh a himbai te a phen tih a lu dongah laipi a phul tih thangthui. 11:72 Te phoeiah tah a rhal rhoek taengah caemtloeknah la koep cet. Amih te a cawh vaengah tah yong uh. 11:73 Aka yong hlang rhoek a hmuh vaengah anih taengla mae uh. Koep thum uh tih Kadesh kah a rhaehhmuen duela a hloem uh phoeih pah pahoi rhaeh uh. 11:74 Te khohnin ah kholong te thawng thum hil muep duek uh. Te phoeiah Jonathan te Jerusalem la mael.