Library · hlt

2 Samuel 22

22:1 A thunkha cungkuem kut lamkah oe, Saul kut lamkah BOEIPA loh anih a huul hnin vaengah, David loh BOEIPA taengah hekah laa lung he a thui. 22:2 Te vaengah, “BOEIPA tah ka thaelpang neh ka rhalvong neh kai ham tah kai aka hlawt la om. 22:3 Ka lungpang Pathen amah dongah ni ka ying, ka photling neh khangnah ki, ka imsang neh ka thuhaelnah, khangkung loh kai he kuthlahnah lamloh nan khang. 22:4 Thangthen ham tueng BOEIPA te ka khue dongah ka thunkha rhoek taeng lamloh ng'khang. 22:5 Dueknah tuiphu loh kai n'li tih, aka muen soklong loh n'sak he. 22:6 Saelkhui kah rhui loh kai m'ven tih, dueknah hlaeh loh kai m'mah. 22:7 Ka kho a bing vaengah BOEIPA te ka khue tih ka Pathen taengah ka pang.Te vaengah ka pang ol Te a bawkim lamloh a hna neh a yaak. 22:8 Te vaengah diklai te tuen la tuen tih hinghuen. Anih taengah a sai dongah vaan kah a yung Te tlai tih tuen. 22:9 A hnarhong lamkah hmaikhu thoeng tih, a ka lamkah hmai loh a laeh vaengah hmai-alh khaw tak. 22:10 Te phoeiah vaan a koiloep tih, a suntlak vaengah yinnah tah a kho hmuila pawk. 22:11 Cherub dongah ngol bal tih a ding vaengah khohli phae sola phoe. 22:12 A kaepvai khohmuep neh khomong khomai dongkah tui tun Te dungtlungim la a khueh. 22:13 Amah hmaikah a aa loh a hmai-alh te a dom. 22:14 BOEIPA Te vaan lamloh a kawk vaengah Khohni loh a ol a huel. 22:15 Thaltang a kah tih amih te a taekyak phoeiah, amih Te rhaek neh a khawkkhek la a khawkkhek. 22:16 BOEIPA kah tluungnah neh a hiil dongkah a thintoek yilh loh lunglai kah yung hoep tih sokca tuipuei khaw tueng. 22:17 A sang lamloh yueng uh tih tui dueng khui lamkah kai he n'tuuk tih n'doek. 22:18 Kai ham tah tlung uh dae ka thunkha hlangtlung neh ka lunguet taeng lamkah kai n'huul. 22:19 Ka rhainah hnin ah kai m'mah uh cakhaw BOEIPA tah kai ham tukcawt longkhawn la om. 22:20 Kai khuiah a naep dongah kai he hoengpoeknah la kai n'khuen tih n'pumcum sak. 22:21 Ka duengnah bangla BOEIPA loh kai n'thung tih, ka kut kah a cimcaihnah vanbangla kamah taengla ham mael coeng. 22:22 BOEIPA kah longpuei te ka ngaithuen tih ka Pathen taeng lamloh ka poehlip van pawh. 22:23 Amah kah laitloeknah boeih te tah a laitloeknah bangla ka hmaiah ka khueh tih a khosing lamloh ka phael pawh. 22:24 A hmaiah cuemthuek la ka om tih ka thaesainah lamkah khaw ka cue uh. 22:25 A mikhmuh kah ka duengnah, ka cimcaihnah vanbangla BOEIPA loh ka taengah han thuung coeng. 22:26 Hingcim taengah uepom la na om tih, cuemthuek hlangrhalh taengah na cungkuem coeng. 22:27 Aka meet uh taengah na meet uh tih, voeldak te tah na hnueih. 22:28 Pilnam mangdaeng te na khang tih, na mikhmuh kah aka pomsang rhoek te na kunyun sak. 22:29 BOEIPA namah tah ka hmaithoi la na om tih, ka hmaisuep khaw BOEIPA loh a tue coeng. 22:30 Namah nen tah caem khaw ka poeng tih, ka Pathen nen tah pangbueng khaw ka poe thai. 22:31 Pathen tah a longpuei khangmai tih, BOEIPA kah olthui a cimcaih dongah anih khuiah aka ying boeih ham tah photling la a om pah. 22:32 BOEIPA phoeikah Pathen Te unim? Mamih kah Pathen phoeiah tah unim lungpang bal? 22:33 Ka lunghim Pathen tah ka thadueng la om tih, amah kah longpuei Te ka longpuei ham a khangmai la khueh. 22:34 Ka kho sayuk kho bangla a khueh tih, ka hmuensang ah kai m'pai sak. 22:35 Ka kut he caemtloek ham a cang tih ka ban loh rhohum lii khaw a phuk thai. 22:36 Namah kah daemnah photling Te ka taengah nam paek tih, namah kah kodonah neh kai nan ping sak. 22:37 Ka kungdak kah ka kholaeh khaw na aeh dongah ka kho paloe pawh. 22:38 Ka thunkha rhoek te ka hloem tih, ka mitmoeng sak vaengah amih ka khah hlanah ka balkhong moenih. 22:39 Amih te ka khah tih ka phop daengah ni thoo uh thai pawt tih ka kho tangah a bakop uh. 22:40 Caemtloek ham khaw kai he thadueng nan vah sak tih, kai aka tlai thil rhoekTe kamah hmuila na koisu. 22:41 Te dongah ka thunkha rhoekTe kai taengah a rhawn na duen sak tih, ka lunguet khaw ka biit. 22:42 BOEIPA taengah khaw pang uh coeng dae khang voel pawt tih, amih Te doo voel pawh. 22:43 Te dongah amih Te diklai laipi bangla ka neet tih, long kah tangnong bangla ka tip sak phoeiah ka nulh. 22:44 Ka pilnam kah tuituknah khui lamkah khaw kai nan hlawt. Namtom kah a lu la kai nan hloe dongah ming pawt pilnam loh kai taengah thotat. 22:45 Kholong ca rhoek loh kai taengah mai a tum uh tih, a hna neh a yaak hamla ka ol a hnatun uh. 22:46 Kholong ca rhoek loh tahah uh tih, a vongtung khui lamloh yingyet uh. 22:47 BOEIPA kah hingnah dongah ka lungpang tah a yoethen pai tih, kai ham daemnah lungpang Pathen tah pomsang pai saeh. 22:48 Pathen loh kai hamla tawnlohnah a paek tih, pilnam Te kai kungdak la a suntlak sak. 22:49 Ka thunkha rhoek taeng lamkah kai nan poh, kai aka tlai thil rhoek kah a sola kai nan pomsang bal. Hlang kah kuthlahnah lamkah kai nan huul. 22:50 Te dongah BOEIPA nang Te namtom taengah kan uem vetih na ming te ka tingtoeng ni. 22:51 A manghai kah khangnah imsang tah len pai.Te dongah ni sitlohnah he a koelh taengah khaw, David neh a tiingan taengah khaw kumhal duela a saii pah,” a ti.