Library · hlt

BAR 5

5:1 Cueihnah tah Pathen kah olpaek cabu la om, te olkhueng tah a yoeyah la cak. Cueihnah te khak aka tu tah hing vetih, aka hnawt hlang tah duek ni. 5:2 Jakob aw, mael lamtah cueinah te lo laeh, a vangnah khosae dongah pongpa laeh. 5:3 Na thangpomnah te a tloe taengah pae boeh, na banhmannah khaw kholong pilnam pae boeh. 5:4 Israel aw, mamih tah n'yoethen uh, Pathen kah kolonah khaw m'ming uh. 5:5 Ka pilnam aw, na thahlue sak uh, amah Israel ming tah a khuui la om coeng. 5:6 Te tah pocinah ham moenih, nang te namtom taengla n'yoih uh coeng, tedae nang tah na thunkha kut n'tloeng he, na Pathen na veet uh dongah ni. 5:7 Amah te sungrhai neh Pathen mueh taengah, hmueih na nawn uh tih thin na toek sak uh. 5:8 Nangmih aka khuen dungyan Pathen na hnilh uh tih, nangmih aka cun Jerusalem te khaw na rhah sak uh. 5:9 Te dongah Pathen lamkah kosi te nang soah tla. a thui vanbangla, nangmih Zion imben rhoek hnatun lah, Pathen loh mamih soah kothaenah a len a tlak sak coeng. 5:10 Ka capa ka canu rhoek kah vangsawn khaw ka hmuh coeng, Tetah amih soah a yoeyah la om coeng. 5:11 Amih te omngaih ka khut dae ta, rhah neh kothae doela ka tueih mai. 5:12 Kai soah omngainah om boel saeh, nuhmai neh hnarhah muep yet coeng. 5:13 A oltloek te poek uh pawt tih, Pathen kah olpaek dongah pongpa uh pawh. A duengnah namtlak a tueng te khaw thuih uh pawh. 5:14 Zion neh a imben rhoek halo saeh, ka canu neh ka capa rhoek a tuuk te poek, Te te amih soah dungyan la tla coeng. 5:15 Amih te khohla namtu taengla, ngukngak namtom neh ol aka lang taengla a khuen. amih loh patong khaw hinyah uh paw tih, camoe khaw lungma ti uh pawh. 5:16 Nuhmai kah a lungnah capa te a khuen pah tih, a canu huta te oiloeng hnarhah la a khueh. 5:17 Tedae kai tah oe, metlam nang kan bom eh? 5:18 Amah loh citcai he nang soah a khueh coeng dongah, na thunkha kut lamlong khaw nang te n'khang bitni. 5:19 Cet laeh ka ca aw cet laeh, kai tah hlang pong la n'khueh oeh coeng. 5:20 Ka ngaimongnah himbai te ka dul tih, ka huithuinah hamla tlamhni ni ka bai coeng. Ka hing khui dungyan duela ka rhap mai eh. 5:21 Ka ca aw, rhalthen sak, Pathen te khue, amah loh saithainah neh rhal kut lamkah n'hlawt bitni. 5:22 Nang khang ham dungyan ngaiuepnah neh, kai ham omngaihnah halo ham khaw, A cim Pathen taengah ngaiuepnah ka khueh. Amah kah rhennah te dungyan khangkung taeng lamloh nang taengla ha pai kuekluek pawn ni. 5:23 Nangmih te kothae neh rhahnah neh kan tueih, Tedae a yoeyah omngaih kohoe la kai taengah na mael ham Pathen loh m'paek bitni. 5:24 Nangmih n'tuuk te Zion kah a kaepvai loh a hmuh bangla Pathen kah khangnah khaw na hmuh uh pawn ni. Nangmih taengah thangpomnah a len koek, dungyan rhuepomnah te ha pai bitni. 5:25 Pathen kah kosi te nang soah a pai vaengah, Ka ca aw thinsennah neh ueh mai dae, Na thunkha loh nang n'poe mai cakhaw, a cungkunah te na hmuh bitni. Te vaengah a rhawn kungla na luei bitni. 5:26 Ka ca yongdik rhoek tah caehthae longpuei ah cet, amih te boiva bangla rhal loh a tuuk tih a khuen. 5:27 Ka ca aw na rhal then sak tah Pathen mah khue, nang soah he bang aka pai sak loh nang te m'poek bitni. 5:28 Pathen taeng lamloh a phaelh na cet tih, Khohmang la na om vanbangla, Amah tlap ham te kocuknah a pueh parha neh mael laeh. 5:29 Nangmih soah hebang citcai aka pai sakkung loh, Nang khangnah te dungyan omngaihnah he hang khueng bitni. 5:30 Jerusalem aw na rhalthen sak laeh, na ming aka sui loh nang n'hloep pawn ni. 5:31 Nang aka phaep tih, na cungku vaengah, aka uem rhoek te khaw poci pawn ni. 5:32 Na sal rhoek sal la aka tueih khopuei khaw poci vetih, na ca rhoek sal aka doe khopuei rhoek khaw poci ni. 5:33 Na cungku vaengah a omngaih uh bangla, na rhawp vaengah a ko a hoe bangla amah a cungku vaengah pae uh bitni. 5:34 A hlangmi a ping dongah a oekhlawnnah te ka loh vetih, a boethae te a nguekcoinah la ka khueh bitni. 5:35 Kum a sen hlang amih soah dungyan hmaitak tla vetih, a tue a sen hlang te rhaithae nen ni kho a sak eh. 5:36 Aw Jerusalem khothoeng benla mael lah, Pathen taeng lamloh nang ham aka thoeng, omngaihnah ke so lah. 5:37 Na ca rhoek a mael ke so lah, amih te na tueih coeng dae ta, Khocuk khotlak lamloh tingtun uh tih, ha mael uh coeng ke. A Cim Koek kah ol bangla, Pathen kah thangpomnah dongah omngaih lah.