Library · hlt

Daniel 10

10:1 Persia manghai Cyrus kah kum thum dongah , a ming Belteshazzar la a khue Daniel taengah ol a phoe pah .Te dongah oltak ol neh caempuei a len kah la om dae ol te a yakming tih a hmuethma khaw yakmingnah a khueh . 10:2 Te vaeng khohnin ah kai Daniel tah khohnin la yalh thum Te nguekcoi neh ka om . 10:3 Buh tui athenla ka ca pawt tih maeh neh misurtui khaw ka ka khuiah kun pawh . Khohnin yalh thum a cup hil situi ka hluk rhoe ka hluk pawh. 10:4 Lamhmacuek hla kah hnin kul neh hnin li vaengah tah kai khaw Khiddekel tuiva puei kah langkaeng ah ka om . 10:5 Ka mik te ka huel tih ka sawt vaengah hlang pakhat takhlawk pueinak neh tarha om tih a cinghen Te Uphaz sui a nak . 10:6 A pum tah timsuih bangla om tih a maelhmai tah rhaek kah a mueimae bangla om. A mik tah hmaithoi hmai bangla om tih a ban neh a kho tah rhohum ngo kah a pang bangla om. A olthui ol tah hlangping ol bangla om. 10:7 Kai Daniel kamah bueng long ni mangthui te ka hmuh . Tedae ka taengah aka om hlang rhoek loh mangthui te a hmuh uh moenih . Tedae amih te thuennah loh muep a tlak thil tih thuh hamla yong uh . 10:8 Kai khaw kamah bueng la ka cul tih mangthui a len he ka hmuh vaengah tah ka khuikah thadueng loh sueng voel pawh .Te vaengah ka mueithennah he kai taengah kutcaihnah la poeh tih thadueng nuen voel pawh . 10:9 A olthui ol te ka yaak tih a olthui ol te ka yaak . Kai khaw ka om dae ka mik ip tih ka maelhmai diklai la ka khueh. 10:10 Te vaengah kutvang loh kai te tarha m'ben tih ka khuklu neh ka kut kutbom ah kai n'hlinghloek . 10:11 Te vaengah kai te , “Tongpa sanaep Daniel , nang taengah ka thui bangla ol te yakming lamtah namah paihmuen ah pai . Nang taengah kai n'tueih coeng he. He ol he kai taengah a thui vaengah ka pai tih ka thuen . 10:12 Te phoeiah kai te , “Daniel rhih boeh , lamhmacuek khohnin lamloh yakming ham neh na Pathen mikhmuh ah yalh hamla na lungbuei te na paek . Na ol a yaak uh dongah kai khaw nang ol bangla ka lo coeng,” a ti . 10:13 Tedae Persia ram kah mangpa tah kai hmai ah hnin kul hnin khat pai . Persia manghai rhoek taengah kamah la hnap ka cul dongah kai bom hamla mangpa lamhma rhoek khuikah pakhat Michael Te tarha ha pai . 10:14 A khohnin kah mangthui a om pueng dongah hmailong tue ah na pilnam taengah aka thoeng ham te nang yakming sak ham ka lo . 10:15 Kai taengah a thui vaengah he ol bangla ka maelhmai diklai la ka khueh tih ka tum uh . 10:16 Te dongah hlang ca rhoek kah mueiloh bangla ka hmuilai te tarha ham ben . Ka ka ka ang tih ka thui vaengah ka hmai ah aka pai te , “Ka boeipa aw, mangthui rhangneh kai soah ka tloh la poeh tih ka thadueng sai pawh . 10:17 Ka boeipa taengah thui ham he ka boeipa kah sal loh metlam a noeng eh? Kai khaw tahae lamkah he ka khuiah thadueng thoo voel pawt tih ka khuikah ka hiil sueng voel pawh ,” ka ti nah . 10:18 Te phoeiah a khoep tih hlang kah a mueimae bangla kai te m'ben tih kai n'thaphoh . 10:19 Te vaengah , “Sanaep hlang aw rhih boeh , nang taengah ngaimongnah om saeh. Moem uh lamtah thaom sak. Kai taengah a thui bangla ka thaom ,” a ti . Tedae “Kai nan thaphoh bangla ka boei loh thui saeh,” a ti . 10:20 Te vaengah , “Na ming a ? Balae tih nang taengla ka lo ? Persia mangpa taengah vathoh hamla ka mael pawn vetih ka caeh neh Javan mangpa ha pai ni te . 10:21 Te cakhaw oltak ca khuikah a hlum te ni na taengah kan thui eh. Nang mangpa Michael bueng phoeiah tah te rhoek te kai taengah aka moem pakhat khaw a om moenih .