Library · hlt

Daniel 12

12:1 Te vaeng tue ah mangpa puei Michael pai vetih na pilnam paca te a pai puei ni. Namtom a om lamloh te vaeng tue hil aka om noek pawh citcai tue om ni. Tedae na pilnam khaw cabu dongah daek tangtae a hmuh boeih tah te khohnin ah loeih ni. 12:2 Diklai laipi la aka ip muelh khuikah khaw muep haenghang uh vetih a ngen rhoekTe kumhal hingnah khuila , a ngen tah dungyan koletnah neh kokhahnah khuila om ni. 12:3 Te vaengah lungming rhoek tah bangyai khophaa bangla sae vetih muep aka tang sak tah aisi bangla kumhal due om yoeyah ni. 12:4 Tedae Daniel nang loh a bawtnah tue hil ol he khoem lamtah cabu he catui hnah thil. Muep van thikthuek uh vetih mingnah khaw ping ni. 12:5 Kai Daniel loh ka sawt vaengah , a tloe rhoi tah he kah sokko tuikaeng kah pakhat , ke kah sokko tuikaeng ah pakhat tarha pai rhoi. 12:6 Te vaengah sokko tui sokah takhlawk pueinak aka bai hlang te , “Khobaerhambae a bawtnah me hil lae ?” a ti nah . 12:7 Ka yaak vaengah sokko tui so ah takhlawk pueinak aka bai hlang te khaw a banvoei bantang te vaan la a thueng tih , tingtunnah khoning loengboeng vaengah a boek ham, pilnam cim kah kut a phop vaengah te te boeih a khah ham khaw kumhal kah hingnah neh a toemngam coeng. 12:8 Ka yaak dae ka yakming pawt dongah ka Boeipa te, “A bawtnah he balae ?” ka ti nah . 12:9 Te dongah , “Daniel cet laeh, a bawtnah tue hil ol he khoem lamtah catui hnah thil. 12:10 A meet uh vetih a ngo uh phoeiah muep a picai uh ni. Halang rhoek tah boe uh vetih a halang boeih te yakming uh mahpawh . Tedae lungming rhoek loh a yakming uh ni. 12:11 Sainoek a khoe tue lamloh aka pong rhoek kah sarhingkoi a khueh hil te khohnin la thawngkhat yahnih sawmko lo. 12:12 Khohnin thawngkhat ya thum sawmthum panga a cup hil aka rhing tah a yoethen . 12:13 Tedae nang tah a bawtnah hil cet lamtah na duem bitni. Khohnin a bawtnah dongah tah na hmulung dongah na pai bitni ,” a ti .