EPJ 1
1:1 Jeremiah kah ca he Babylon manghai loh saldong la Babylon ah a khueh rhoek taengah, Pathen loh amah a uen te olthang la a pat.
1:2 Pathen hmaiah tholhnah na saii uh dongah, Babylon mangah Nebukhadnezzar loh Babylon ah tamna la n'khuen uh.
1:3 Te dongah Babylon na pha uh vetih, kum a yet, a tue a sen hlang cadil a khong parhih hil na om uh ni. Te phoeiah ngaimong la koep kan mael puei uh bit ni.
1:4 Babylon ah cak neh, sui neh, thing neh a sai pathen khaw na hmuh uh ni. Te a pilnam loh a laengpang ah a koh uh tih pathen aka ming mueh rhoek loh a rhih uh.
1:5 Te dongah ngaithuen uh ne. Kholong hlang bangla na om uh vetih, he bang pathen te na khueh uh van ve.
1:6 A hnuk a hmai ah te te aka bawk te na hmuh uh vaengah khaw, na thinko long tah, Boeipa nang ni kan bawk eh,” na ti ve.
1:7 Ka puencawn he nangmih taengah om tih anih long na khosaknah han dawn bitni.
1:8 A hmuila te kutthai loh a picai pah, a soah sui neh cak neh a boh thil. Tedae te rhoek te a hong ni, a cal thai moenih.
1:9 Pilnam loh a pathen lu dongkah hamla sui a loh tih rhuisam te a lungah huta ham bangla a saii pa uh.
1:10 A lak vaengah khosoih loh a pathen kah sui neh cak neh a huep la a loh tih amah ham a hnonah.
1:11 Impuep kah pumyoi taengah khaw a paek uh. A pathen rhoek teh hlang bangla imbai a phaih pa uh. He boeih he cak, sui, thing nen ni a saii.
1:12 Amamih pataeng a khawt neh a tui-aek lamloh a khang uh thai moenih.
1:13 Daidi himbai te a bai sak phoeiah tah a soah aka tla bawkim kah laivai te a rhih dongah himbai neh a cun uh.
1:14 Pakhat loh paeng kah laitloek kung bangla mancai a pom. Teda amah aka phae te hnueih ham pakhat khaw a saii thai moenih.
1:15 Pa khat loh bantang kut ah tumcaca neh haica a pom. Tedae amah khaw caemrhal neh dingca kut lamloh a hoeptlang uh thai moenih.
1:16 He boeih long te rhoek te pathen moenih tila a mingpha sak, te dongah amih te rhih boeh.
1:17 Um am te a rhek coeng atah a phu a om pawt banghui pawn ni.
1:18 A pathen te bawkim ah a khueh uh. Kunnah lamloh aka kun rhoek boeih laivai a khu sak tih a mik mawk a daeng pah. Manghai a tloelh tih dueknah ham lai a tloek pah hlang bangla vongka te khoep a tlaeng uh., khosoih loh a bawkim te thohkhaih khaw, thohkalh khaw, khaihlong khaw, khak a buen pah. Te daeng man dingca loh a poelyoe pawt loel sue.
1:19 Amamih ham lakah te ham te hmai muep a vang uh, pakhat khaw a hmuh thai van pawt mai ah.
1:20 Bawkim kah thingpang bangla a coeng ah a thinko nen tah, “Diklai lamkah mulhing aka yuel loh a caak tih, a himbai boeih a yop pah coeng,” a ti uh.
1:21 A mael hmai te bawkim kah hmai khu loh a mu sak te khaw ming uh pawh.
1:22 Pumphak, pumpi ne mimboei khaw a pum neh a lu dongah a ngaih bangla om uh.
1:23 He lam long tah te pathen moenih tila ming uh. Te dongah amih te rhih boeh.
1:24 Sui neh a then la a khuk uh ngawn dae ta, a khen te hlang loh a met pah pawt atah ngo tlaih mahpawh. Te te a tui la a hlawn vaengah khaw a yaknga moenih.
1:25 A phu tae lekmueh nen khaw a lai uh dae hil a khueh moenih.
1:26 Kho a khueh pawt dongah hlang tloe long ni a laeng neh a koh. Te dongah a hong ni tite hlanghing taengah tueng coeng. Tekah a taengah thothueng khaw a yah om.
1:27 Te kah pathen te lai la a bung vaengah amah a thoh ham om dae ta. Hlang loh sut hang koinih amah thoeih thai voel pawh. A haeh la a om vaengah a dueng la koep pai thai voel pawh. Hlangduek hmai kah khueh banghui la a hmai ah kutdoe a tloeng pa uh
1:28 Te pathen taengkah a nawn hmueih te khosoih loh a yoih tih amah ham tangka a hnonah. A yuu rhoek loh maeh te a loh thih lung neh amah hamla a kaeh uh. Khodaeng neh hnarhah tah pae uh pawh.
1:29 Amih kah hmueih te pumom neh cacun nu long khaw a taek mailai mai. He boeih nen he amih te pathen moenih tila ming uh. Te dongah amih te rhih uh boeh.
1:30 Metlam lae te te pathne na ti thai? Huta loh cak neh, sui neh, thing pathen ham caak a tawn pah mai.
1:31 A bawkim kah khosoih rhoek khaw a himbai pawn neh, a lu te malak la a vok tih a lu a dah kolla ngol uh.
1:32 Amih te rhok buh a saii bangla a pathen taengah vuek uh tih pang uh.
1:33 Khosoih loh a pathen kah himbai te a ngen a loh tih a yuu a ca a paek.
1:34 Hlang loh a thae a then a saii khaw thung haipa voel pawh. Te rhoek manghai khaw khueh thai pawt tih khoe thai bal pawh.
1:35 Te phoeiah khuehtawn neh tangka khaw pae thai haipa pawh. a taengah ol a hlo te khoem cakhaw, khoem pawt cakaw a cawh moenih.
1:36 Hlang te dueknah khui lamloh khang thai pawt tih, thahnoeng neh thaom kut lamloh hlawt thai bal pawh.
1:37 Mikdael te koep tueng sak thai pawt tih, ngaihmangnah khui kah hlang te khaw hlawt thai pawh.
1:38 Nu hmai te lungma ti pawt tih, cadah ham a then saii thai pawh.
1:39 He boeih he thing ni a saii. Tlang kah lungto bangla sui neh cak ni a boh thil. Te rhoek taengah tho aka thueng tah yah a poh ni.
1:40 Te bang te metlam lae pathen la a poek uh vetih pathen ni a ti uh eh? Te phoeiah Khalden khaw amamih poeih uh coeng. Ol aka cal thai pawt te a hmuh uh vaengah, Bel taengla a khuen uh. Te vaengah Bel loh a yaming a ti bangla olmueh cal sak sak ham thangthui uh.
1:41 Yakhuetnah aka om pawt he hnawt hamla om ti khaw hmuming uh voel pawh.
1:42 Huta rhoek loh himbai neh yen uh, caehlong ah ngol uh tih cakik te botui la a hlut uh.
1:43 Amih khuikah pakhat te aka cet paitai loh koe a mawt tih a thingkong dongah a ih puei. Te vaengah a hnukah huta te ngawn tah a mah bangla hlang hloeih thai pawt a ti dongah a nueih nah.
1:44 He tlam a om mueirhol ngawn tah a hong ni. Metlam lae hlang loh pathen ni tila a poek vetih pathen la a khue eh?
1:45 Te te kutthai neh sui ka saii long ni a saii. Kut thai loh a saii soah pakhat khaw a saii thai moenih.
1:46 Te te aka saii rhoek khaw a hinglung bahoeng sen mahpawh.
1:47 Me tlam lae te bang hnopai te pathen la a poek sak thai? Laithae te a caehtak vetih lamhuk loh a khotohnah ham ni a om coeng.
1:48 Rhal a tlung tih citcai loh a pai thil vaengah tah, khosoih rhoek te dawt uh thae tih amamih neh a pathen metlam n'thuh eh,” a ti uh.
1:49 Amah te caemrhal neh citcai lamloh aka khang thai pawt te pathen moenih tila u long lae a pom pawt pai eh?
1:50 Thing a saii tih cui neh cak a boh thil parhi te a hong coeng ni tila a ming bitni.
1:51 Namtom manghai boeih taengah khaw phoe bitni. Te rhoek te pathen moenih hlang kut kah a saii ni. Te rhoek dongah Pathen kah bibi khaw a nuen moenih.
1:52 Tete pathen moenih tila u long a ming mueh la a om eh.
1:53 Te long te ram ah manghai khaw khueh thai pawt tih pilnam aka manghai thil khaw pae thai pawh.
1:54 Saithainah a khueh pawt dongah, amah kah lai te khaw tloek thai pawt tih aka tholdalh te khaw hlawt thai pawh.
1:55 Te rhoek te vaan neh diklai laklo kah vangak banghui mai ni. Bawkim te hmai puek koinih a khosoih rhoek tah yong uh vetih loeih ni. Sui neh cak a boh thil a pathen tah thingpang bangla tlum ni.
1:56 Te phoeiah manghai neh rhal taengah tungaepnah a paek thai moeni. Balae tih hlang loh te te pathen ni tila a khueh mai eh?
1:57 Thing a saii tih cak neh sui a boh thil pathen he hlanghuen neh dingca kut lamloh amah pataeng a hlawt uh thai moenih.
1:58 Hlang loh sui neh cak te a khong pa vetih, himbai te khaw a pit pah. Tete kubuem la a khuen vaengah amah a bom uh ham khaw coeng mahpawh.
1:59 Te dongah a hong pathen la om lakah tah, a rhalthennah aka khueh manghai la om neh, imkhui ah imkung kah a ngoengaihnah aka doo baelyak la om te then ngai. A hong pathen lakah tah ngaikhuek la aka thung im thohkhaih he then ngai. A hong pathen lakah tah im tung thipang la om he then ngai.
1:60 Khomik khaw, hla khaw, aisi khaw vang van. Tedae amah bibi la a tueih vaengah tah boe a ngai.
1:61 Khophaa neh kho-aa khaw a ngaih la tueng tih khohli khaw kho tom ah hli van.
1:62 Pathen loh khomong te ol a paek tih diklai pum ah cet uh. Te vaengah a olpaek te a khuen uh. so lamkah hmai a tueih vaengah tah a uen bangla tlang neh dup khaw boeih ung. Tedae mueirhol te bang mueimae thaomnah neh thuidoek ham a om moenih.
1:64 Tedong pakhat long khaw mueirhol te pathen la poek boel saeh. Pathen lam khaw khue boel saeh. Lai pakhat khaw thui thai pawt tih pakhat ham khaw a then a saii moenih.
1:65 Tete pathen moenih tila na ming lamlong tah amih te rhih boeh.
1:66 Te rhoek loh manghai te tapvoep thai pawt tih yoethennah pae thai pawh,
1:67 namtom hamla vaan ah miknoek khaw tueng sak thai pawh. khoming bangla sae thai pawt tih hla bangla vang thai pawh.
1:68 amih lakah tah khohong rhamsa te then bet. Rhamsa tah a hlip la yong thai, amah khaw bom uh thai.
1:69 Te rhoek te pathen ni tila mingpha nah a om moenih, te dongah amih te rhih boeh.
1:70 Uitang lo kah vataih bangla a hong ni a tawt uh coeng. Amih kah pathen te thing ni sui neh cak a boh thil uh.
1:71 Amih kah thing pathen te sui neh cak a boh thil. Lohma kah hlingpup bangla vaa loh a cuk nah. rhok bangla a hmuep khuiah ni a voeih uh.
1:72 A pum dongkah daidi neh hnitang te a keet na hmuh vaengah te rhoek te pathen moenih tila na ming uh bitni. A hnukkhueng ah hmawn vetih khohmuen kokhahnah la oieh ni.
1:73 Te dongah a thuem la aka om tih mueirhol a khueh pawt he then. Te kah hlang tah khotohnah lamloh hla pawn ni.