ESG 9
9:1 Hla hlainit nah Adar ni hlai thum vaengah manghai loh oltloek a daek te pai.
9:2 Amah te khohnin ah Judah rhoek a thunkha rhoek tah poci uh. Amih te a rhih dongah pakhat long khaw thung voel pawh.
9:3 Khohmuen khoboei long khaw, mangpa long khaw, boei capa long khaw, manghai cadaek rhoek long khaw Judah rhoek te hinyahnah a paek uh.
9:4 Mordekai rhihnah long khaw amih te a nan coeng.
9:5 Manghai kah oltloek dongah Mordekai ming he ram pum loh hinyanah khueh saeh a ti.
9:6 Te khohnin ah Judah rhoek loh Susa ah hlang ya nga a ngawn.
9:7 Te vaengah Pharsannestain, Delphon, Phasga,
9:8 Pharadatha, Barea, Sarbacha
9:9 Marmasima, Aruphaeus, Arsaeus, Zabutheus,
9:10 Hammedatha koca Haman capa hlang parha, Judah rhoek kah thunkha Bougean khaw, kutbuem neh amah pang aka dok rhoek khaw a ngawn uh.
9:11 Susa ah a ngawn rhoek hlangmi te amah khohnin rhoe ah manghai taengla a yaak sak uh.
9:12 Manghai loh Esther te, “Susa khopuei he Judah rhoek loh hlang yanga a thup coeng. A khaepdan kah a saii te metlam na poek,” a ti nah.
9:13 Te dongah Esther loh manghai, “Thangvuen ah khaw Judah rhoek amah tlam he saii dae saeh. Hamman ca rhoek kah rhok khaw kui-ok sak saeh,” a ti nah.
9:14 Te dongah a saii sak tangloeng tih Haman ca rhoek kah rhok te khaw kui-ok sak ham khopuei kah Judah rhoek taengah a paek.
9:15 Susa kah Judah hoek khaw hnin hlai li vaengah tingtun uh tih hlang yathum a ngawn uh. Tedae poelyoe uh pawh.
9:16 Ram pum kah Judah rhoek tah tingtun uh amamih te a tungaep uh dongah a thunkha kut lamloh loeihnah a dang uh.
9:17 A hnin hlaili dongah amah te khohnin te duemnah hnin la a kueh uh tih omngaih kohoe la khotue a saii uh.
9:18 Susa khopuei kah Judah rhoek khaw hnin hlai li dongah tingtun uh dae duem uh pawh. A hnin hlai nga dongah omngaih kohoe la khotue a saii uh.
9:19 He kawng dongah Susa ram kaepvai khaepdan ah aka taekyak Judah rhoek long Adar hla hnin hlai li te omngaih neh duemnah hnin la a khueh uh. A huiko taengah buh thak uh thae. Khopuei kah aka om rhoek long tah Adar hnin hlai nga omngaih neh duemnah hnin la a kueh uh tih a hui taengah buh thak uh thae.
9:20 He olka he Mordekai loh cabu dongah a khoem tih Artaxerxes ram a yoei a hla kah Judah rhoek taengla boeih a pat.
9:21 Amih te Adar hla hnin hlai li neh hlai nga tah a yaeh hamla a thui pah.
9:22 Te khohnin ah Judah rhoek tah a thunkha kut lamloh loeih. A ming la Adar hla khuiah tah amih kah khosak te kothae lamloh kohoe la, patang lamloh duemnah khohnin la, khotue sainah khohnin la a om pah. Te vaengah buh neh kutdoe te a hui taeng neh khodaeng taengah a thak uh.
9:23 Mordekai loh amih taengah a pat bangla Judah rhoek loh a doe uh.
9:24 Hammedatha capa Haman loh amih metla a vathoh tih amih phae ham oltloek metla a saii khaw, hmulung a naan khaw,
9:25 Manghai taengah metla a caeh tih Mordekai kui-ok sak ham a thui khaw. Halang loh Judah soah hmulung a naan dae amah soah ni a thoeng. Te dongah amah neh a ca rhoek khaw a kuiok sak.
9:26 Amih ham hmulung a naan hnin la a om dongah Purim hnin a ti uh. (Amih ol lamtah hmulung ke purim a ti uh). He cabu dongah a daek tih he hno dongah a tong hno khaw, amih a cungku uh khaw a daek. Te dongah Mordekai loh he khotue he a phueng pah.
9:27 Judah rhoek loh amamih ham khaw, a cadil rhoek ham khaw, amih taengah aka kibaeng rhoek ham khaw daal mueh la a khueh uh. Purim hnin he poekkoepnah a khueh uh tih cadilcahma lamloh cadilcahma hil, khopuei takuem, imkhui takuem, ram takuem ah a tuem uh.
9:28 Purim hnin he a yoeyah poekkoepnah la a tuem uh a cadilcahma long paa sak tlaih pawh.
9:29 Amindab canu boeinu Esther neh Judah hoel Mordekai loh boei a daek phoeiah tah Purim kawng neh saithainah te rhep a paek.
9:31 Mordekai neh manghainu Esther loh he oltloek he amah bibi pakhat la a pai sak tih a mangtaengnah a then neh a bih.
9:32 Esther loh kumhal kah oltloek la a cak sak tih poekkoepnah la a daek.