Library · hlt

Exodus 25

25:1 BOEIPA loh Moses te a voek tih, 25:2 Israel ca rhoek te thui pah lamtah hlang boeih lamkah khosaa te kai taengla hang khuen uh saeh. A lungbuei kah a puhlu bangla kai kah khosaa te doe pah. 25:3 Khosaa he amih taeng lamkah sui neh cak neh rhohum khaw, 25:4 Hlampai a thim, daidi, a lingdik khaw, hnitang neh maae mul khaw, 25:5 Tutal pho thimyum neh saham pho khaw rhining thing khaw, 25:6 Botui hmaivang ham neh koelhnah situi ham neh botui bo-ul ham situi khaw. 25:7 Hnisui neh rhangpho dongkah ham oitha lung neh saboi lung khaw coi laeh. 25:8 Te phoeiah kai ham rhokso saii uh lamtah a khui ah ka om eh. 25:9 Kai loh nang boeih kan tueng vanbangla dungtlungim muei neh a hnopai boeih kah muei te khaw saii tangloeng. 25:10 Rhining thing te thingkawng a yun dong nit neh tintan, a daang dong khat neh a tintan, a sang dong khat neh tintan ah saii uh. 25:11 Te phoeiah a khui ah sui cilh ben lamtah a hman ah khaw ben. A sokah a kong te a kaep ah sui neh saii pah. 25:12 Te phoeiah sui te a kutcaeng pali la hlawn lamtah a kho pali te buen pah. Te vaengah khat ben kah a vae dongah kutcaeng panit, pabae kah a vae dongah kutcaeng panit buen pah. 25:13 Te phoeiah rhining thing te a cung la saii lamtah sui ben thil. 25:14 A cung te thingkawng vae kah a kutcaeng khuila rholh lamtah te nen te thingkawng kawt saeh. 25:15 Thingkawng kutcaeng dongah a cung om saeh lamtah te lamloh dul boel saeh. 25:16 Te phoeiah nang taengah kam paek ham laipainah te thingkawng khuiah khueh. 25:17 A tlaeng khaw sui cilh neh a yun dong nit tintan neh a daang dong khat tintan ah saii. 25:18 Sui cakhli te cherubim rhoi la saii bal lamtah te rhoi te thingkawng tlaeng kah a hmoi rhoi ah khueh. 25:19 Cherub pakhat te he kah a hmoi ah, cherub pakhat tekhat ben kah a hmoi ah khueh lamtah a tlaeng te a hmoi rhoi ah cherubim te saii pah. 25:20 Cherubim aka om rhoi loh a phae te a so la phuel saeh lamah a phae neh thingkawng tlaeng soah khu rhoi saeh. Te vaengah pakhat loh a manuca taengah a maelhmai hmaitoh saeh lamtah cherubim maelhmai te tingkawng tlaeng taengah mael saeh. 25:21 A tlaeng te thingkawng soah a so la tloeng lamtah nang taengah olphong kam paek te thingkawng khuiah khueh. 25:22 Teah te nang kan tuentah vetih Israel ca rhoek ham nang kang uen olphong cungkuem te thingkawng tlaeng so lamkah cherubim rhoi laklo lamloh nang taengah kan thui ni. 25:23 Rhining thing te caboei a yun dong nit, a daang dong khat, a sang dong khat tintan la saii. 25:24 Te te sui cilh neh ben thil lamtah te ham te a kaepvai kah a kong te sui neh saii pah. 25:25 A kae ham te a kaep ah kutsom pakhat khueh lamtah a kae dongkah a kaep ah a kong te sui neh saii. 25:26 Te ham te sui kutcaeng pali saii lamtah kutcaeng te a kho pali dongkah a kil pali ah bang pah. 25:27 Kutcaeng rhoek te a kae voeivang ah caboei aka kawt ham a cung rholhnah la om saeh. 25:28 A cung te rhining thing saii bal lamtah sui ben thil. Te nen te caboei kawt saeh. 25:29 Bael neh yakbu neh tui-um neh tuisi-am khaw saii. Sui cilh neh te rhoek te saii lamtah te rhoek nen te tuisi doeng saeh. 25:30 Ka mikhmuh kah a hmai buh te caboei soah khueh yoeyah. 25:31 Hmaitung te sui cilh cakben neh saii bal. Hmaitung kah a hlit neh, a kong, a bunang, a paimuem khaw saii pah lamtah te lamloh a rhaiphuelh te om saeh. 25:32 Hmaitung te a kaep lamloh a kong parhuk cawn saeh. A vae khat lamloh hmaitung kong pathum neh a vae pabae lamloh hmaitung a kong pathum cawn saeh. 25:33 A kong pakhat dongah rhaimuem rhaiphuelh neh noepai bunang pathum, a kong pakhat dongah khaw rhaimuem rhaiphuelh neh noepai bunang pathum om saeh lamtah hmaitung lamkah aka cawn aka kong parhuk dongah khaw om tangloeng saeh. 25:34 Te dongah hmaitung dongkah rhaimuem rhaiphuelh neh noepai bunang he pali lo saeh. 25:35 Hmaitung lamloh a kong parhu a thoeng dongah te lamkah a kong rhoi hmuiah rhaimuem pakhat, a kong panit hmui bal ah rhaimuem pakhat, a kong panit hmuiah khaw rhaimuem pakhat om bal saeh. 25:36 Te lamkah a rhaimuem neh a kong te a pum la sui cilh cakben neh pakhat la om saeh. 25:37 Hmaithoi parhih saii bal lamtah hmaithoi te tok pah. Te vaengah a hmai rhalvang ah khaw tue saeh. 25:38 A paitaeh neh a baelphaih khaw sui cilh saeh. 25:39 He hnopai boeih he amah sui cilh talent khat he saii saeh. 25:40 Tedae so lamtah tlang ah nang a muei kan tueng bangla saii,” a ti nah.