Library · hlt

Genesis 10

10:1 Te phoeiah hekah he tah Noah ca rhoek Shem, Ham, neh Japheth neh tuilii phoeiah amih loh a sak a ca rhoek kah rhuirhong ni. 10:2 Japheth ca rhoek la Gomer, Magog, Madai, Javan, Tubal, Meshek, neh Tiras om. 10:3 Te phoeiah Gomer ca rhoek la Ashkenaz, Riphath neh Togarmah om. 10:4 Te phoeiah Javan ca rhoek la Elishah, Tarshish, Kittim, neh Dodanim om. 10:5 Amih lamkah ni sanglak kah namtom loh amah khohmuen la amah ol neh amah huiko loh amah namtu khuiah rhip a caeh uh. 10:6 Te phoeiah Ham ca rhoek la Khusah, Mizraim, Put neh Kanaan om. 10:7 Te phoeiah Kusah ca rhoek la Seba, Havilah, Sabtah, Raamah neh Sabteka om tih Raamah ca rhoi la Sheba neh Dedan om. 10:8 Te phoeiah Kusah loh Nimrod te a sak tih anih te diklai hmankah hlangrhalh lamhmacuek la om. 10:9 Anih te BOEIPA mikhmuh ah sayuep hlangrhalh la a om van dongah, “BOEIPA hmai ah sayuep hlangrhalh Nimrod van ni,” a ti. 10:10 Te dongah anih kah khohmuen a tongnah tah Babylon, Erek, Akkad neh Shinar ram Kalneh ni. 10:11 Te khohmuen lamkah Assyria la cet tih Nineveh, Rehobothir, neh Kalah te a thoh. 10:12 Te phoeiah Nineveh laklo neh Kalah laklo kah Resen te tah khopuei len la om. 10:13 Te phoeiah Mizraim loh Ludim khaw, Anamim khaw, Lehabim neh Naptuhim khaw, 10:14 Pathrusim neh Philisti lamkah aka lo Kasluhim neh Kapthorim khaw a sak. 10:15 Kanaan loh a caming la Sidon phoeiah Kheth, 10:16 Jebusi, Amori, Girhashi, 10:17 Khivee, Arkit, Sinih, 10:18 Arvadi, Zemari, neh Hamathiti te a sak tih a hnukah Kanaan koca la taekyak uh. 10:19 Te phoeiah Kanaani kah khorhi aka om te Sidon lamkah Gerar benkah Gaza due na cet ni. Sodom taengkah Gomorrah, Admah, Zeboim neh Lasha due na cet ni. 10:20 Hekah he amah khohmuen ah amah namtu kah ol, amah huiko neh aka om Ham ca rhoek ni. 10:21 A ham Japheth mana, Eber ca rhoek boeih kah a napa Shem long khaw, ca a sak. 10:22 Shem koca ah Elam neh Assyria, Arpaxad, Lud neh Aram om. 10:23 Aram ca rhoek la Uz, Huul, Gether neh Mash om. 10:24 Arphashad long khaw Shelah a sak tih Shelah loh Eber te a sak. 10:25 Eber te ca panit a sak dae anih tue vaengah khohmuen a tael dongah pakhat kah a ming te Palak la om tih a mana ming te Yoktawn la om. 10:26 Yoktawn loh Almodad, Sheleph, Hazarmaveth, Jerah, 10:27 Hadoram, Uzal, Diklah, 10:28 Obal, Abimael, Sheba, 10:29 Ophir, Havilah, neh Jobab a sak. Te rhoek te Yawktawn kah a ca boeih ni. 10:30 Te dongah Mesha lamkah Sephar khothoeng tlang due na caeh vaengah amih kah tolrhum la om. 10:31 Hekah rhoek he amah namtu neh amah khorhi ah amah ol la amah huiko neh aka om Shem ca rhoek ni. 10:32 He tah amah namtu ah amamih kah rhuirhong la aka om Noah ca rhoek kah a huiko rhoek ni. Te dongah tuilii phoeiah he lamkah ni namtom rhoek loh diklai hmanah a yaal uh.