Library · hlt

Genesis 5

5:1 Hekah he Pathen loh hlang a suen tue vaengkah Pathen amah mueiloh la a saii Adam kah rhuirhong cabu ni. 5:2 tongpa neh huta a suen phoeiah amih rhoi te yoethen a paek tih amih rhoi a suen khohnin ah amih kah ming te hlang a sui. 5:3 Adam tah kum yakhat phoeiah sawmthum hing. Te vaengah amah muei la amah mueiloh la te a sak tih a ming te Seth a sui. 5:4 Seth te a sak phoeiah Adam kah a tue khaw kum ya rhet lo coeng dae ca tongpa rhoek neh canu rhoek te a sak. 5:5 Te dongah Adam kah a hing tue te a pum la kum ya ko neh kum sawmthum a lo phoeiah duek. 5:6 Seth khaw kum ya neh kum nga a lo vaengah Enosh te a sak. 5:7 Enosh te a sak phoeiah Seth khaw kum ya rhet neh kum rhih hing tih a canu a capa rhoek te a sak. 5:8 Seth tah a khohnin boeih kum ya ko neh kum hlai nit a lo phoeiah duek. 5:9 Enosh khaw kum sawmko a lo vaengah Kenan te a sak. 5:10 Enosh khaw Kenan te a sak phoeiah kum ya rhet neh kum hlai nga hing tih capa rhoek neh canu rhoek te a sak. 5:11 Te dongah Enosh kah a tue boeih he kum ya ko neh kum nga a lo phoeiah duek. 5:12 Kenan kum sawmrhih a lo vaengah Mahalalel te a sak. 5:13 Kenan loh Mahalalel te a sak tih kum ya rhet neh kum likip a lo phoeiah capa rhoek neh canu rhoek te a sak. 5:14 Te dongah Kenan kah a tue boeih he kum ya ko neh kum rha a lo phoeiah duek. 5:15 Mahalalel kum sawmrhuk neh kum nga a lo vaengah Jared te a sak. 5:16 Mahalalel loh Jared a sak phoeikah kum ya rhet neh kum sawmthum a lo vaengah canu rhoek neh capa rhoek te a sak. 5:17 Te dongah Mahalalel kah a hing tue boeih tah kum ya rhet neh kum sawmko panga a lo phoeiah duek. 5:18 Jared te kum ya neh kum sawmrhuk neh kum hnih a lo vaengah Enok te a sak. 5:19 Jared loh Enok a sak phoeikah kum ya rhet a lo vaengah canu rhoek neh capa rhoek te a sak. 5:20 Te dongah Jared kah khohnin tah a pum boeih la kum ya ko neh kum sawmruk neh kum hnih a lo phoeiah duek. 5:21 Enok te kum sawmrhuk neh kum nga a lo vaengah Methuselah te a sak. 5:22 Enok loh Methuselah te a sak phoeiah Pathen neh kum ya thum hmaih a pongpa rhoi phoeiah capa rhoek neh canu rhoek te a sak. 5:23 Enok kah khohnin tah a pum boeih la kum ya thum neh kum sawmruk neh kum nga lo. 5:24 Enok tah Pathen neh a pongpa dongah Pathen loh a loh tih vik om pawh. 5:25 Methuselah kum ya neh kum sawmrhet kum rhih a lo vaengah Lamek te a sak. 5:26 Methuselah loh Lamek a sak phoeikah kum ya rhih neh kum sawmrhet kum nit a lo vaengah capa rhoek neh canu rhoek te a sak. 5:27 Te dongah Methuselah kah khohnin tah a pum la kum ya ko neh kum sawmruk neh kum ko a lo phoeiah duek. 5:28 Lamek khaw kum ya neh kum sawmrhet neh kum nit a lo vaengah capa pakhat a sak. 5:29 Anih ming te Noah la a khue. Anih he tah BOEIPA loh thae a phoei thil diklai ah mamih kut kah thatlohnah neh bibi dongah mamih aka hloep ham ni,” a ti. 5:30 Lamek khaw Noah a sak phoeikah kum ya nga neh kum sawmko kum nga a lo vaengah capa rhoek neh canu rhoek te a sak. 5:31 Te dongah Lamek kah khohnin he a pum la kum ya rhih neh kum sawmrhih neh kum rhih a lo phoeiah duek. 5:32 A capa Noah khaw kum ya nga a lo vaengah, Noah loh Shem, Hem, neh Japheth te a sak.