Library · hlt

Hebrews 10

10:1 Olkhueng tah aka lo ham hno then kah mueihlip la om tih anih te hno taktak kah muei moenih. Kum takuem ah hmueih te amah la a nawn uh dae a soep la phat paan sak thai pawh. 10:2 Te koinih hmueih a nawn te bawt tlaih mahpawh. Te dongah vaikhat thothueng neh a cim sak te tholhnah dongah mingcimnah khueh voel mahpawh. 10:3 Tedae kum takuem tholh poekkoepnah amih ah aka om te, 10:4 vaito neh maae thii loh tholh a khoe tloel dongah ni. 10:5 Te dongah Diklai la aka kun loh , “Hmueih neh nawnnah na ngaih moenih. Tedae namah pum te kai ham na hmoel. 10:6 Tholh dongah hmaihlutnah khaw na lungtlun uh pawh. 10:7 Te vaengah, 'Ka pawk coeng ne, Pathen na kongaih saii hamla kai kawng te cayol awn dongah a daek,’ ka ti nah. 10:8 A sokah hmueih khaw nawnnah hmaihlutnah khaw tholh kongah na ngaih pawt tih na lungtlun pawh tila ka thui. Te te olkhueng bangla a nawn rhoek ni,” a ti. 10:9 Te phoeiah, “Namah kongaih saii ham ka pawk coeng he,” a ti. Lamhma te a thup daengah ni a. pabae te a thoh pai eh. 10:10 A kongaih loh Jesuh Khrih kah pum te a nawn bangtlang dongah a ciim la n'om uh. 10:11 Te phoeiah khosoih boeih loh hnin takuem pai tih tho a thueng vaengah amah la hmueih a nawn taitu dae te long te tholh a khoe thai moenih. 10:12 Tedae amah loh tholhnah yueng vaikhat la hmueih a nawn tih Pathen kah bantang ah kumhal la ngol coeng. 10:13 Te lamkah a tloihsoi ah a rhal te a kho kah khotloeng la a khueh duela a rhing. 10:14 Vaikhat la nawnnah lamloh te rhoek te kumhal due rhuemtuet la a ciim sak. 10:15 Te dongah Mueihla Cim long khaw mamih taengah a phong. 10:16 Te phoeiah, “He paipi tah te khohnin phoeiah ni amih taengah ka hal eh?,” a ti. Boeipa loh , “Ka olkhueng he amih thinko ah ka paek coeng tih amih kopoek ah ka daek ni. 10:17 Te phoeiah amih kah tholh neh olaeknah te ka poek khuep voel mahpawh,” a ti. 10:18 Amih kah khodawkngainah tah melae? Tholh ham hmueih a om pawt ah. 10:19 Te dongah, manuca rhoek , Jesuh thii rhang neh hmuencim ah kunnah ham sayalh la om coeng. 10:20 Tekah hniyan lamloh mamih ham aka hing longpuei thai a ong coeng. Te tah amah pum ni a thui. 10:21 Te phoeiah Pathen im kah khosoih puei n'khueh uh coeng. 10:22 Tangnah kah ngaikhueknah dongah thinko oltak neh paan uh sih. A thae la mingcimnah thinko te haek uh sih lamtah pum te tui cil neh tuihlu uh sih. 10:23 Ol aka caeng kung te a uepom dongah aka cak ngaiuepnah dongkah olphoei mah pom uh sih. 10:24 Te phoeiah lungnah, bibi then dongah umyanah ham khat neh khat hmat uh thae sih. 10:25 Mamih kah humtunnah he pakhat kah khosing bangla phap uh boel lamtah hloep uh thae. Heyet khaw khohnin a yoei te boeih na hmuh ngai coeng. 10:26 Oltak kah mingnah te n'dang phoeiah mamih he kalthalh la n'tholh he tholh hlah ham hmueih a om moenih. 10:27 Tedae laitloeknah mueirhih neh aka kingkalh te dolh ham aka cai kosi hmai pakhat ni a. lamtawnnah coeng. 10:28 Khat khat loh Moses kah olkhueng te a aal vaengah sitlohnah om kolla panit pathum kah laipai neh duek. 10:29 Pathen capa aka suntlae rhoek loh tholhphu a thae la muep a yook ham te na poek uh nim. Te nen la a ciim dae, paipi dongah thii te rhalawt la a poek dongah lungvatnah Mueihla ni a hnael. 10:30 “Kutthungnah he kai kah, ka sah bitni,” a ti khaw m'ming. Te phoeiah Boeipa loh a pilnam te lai a tloek pueng ni. 10:31 Aka hing Pathen kut ah cungku te mueirhih la om. 10:32 Te dongah hnukbuet kah a tue te thoelh uh. Te vaengkah loehlangnah muep aka hmuh loh patangnah te ueh uh. 10:33 A ngen vaengah hnaelcoenah neh phacip phabaem neh a yan uh. A ngen vaengah tebang khosa rhoek kah pueipo la na om uh. 10:34 Thongtla rhoek te khaw na rhen uh. Nangmih kah khuehtawn te halhkanah neh aka rhawt khaw omngaihnah neh na doe uh. Khuehtawn then neh aka kuei amah a om te na ming uh. 10:35 Te dongah na sayalhnah te voei uh boeh. Te long te taphu a len a khueh. 10:36 Uehnah uh ham he a ngoe. Te daengah ni Pathen kah kongaih aka saii loh olkhueh te na dang uh eh. 10:37 Kolkalh pueng ah aka pawk long tah boeih boeih ha pawk vetih koe mahpawh. 10:38 Tedae ka hlang dueng tah tangnah neh hing ni. Te vaengah tonga koinih anih soah ka hinglu loh a lungtlun mahpawh. 10:39 Mamih tah pocinah ham tonganah pawt tih hinglu dangnah ham tangnah n'khueh uh.