JDT 14
14:1 Te phoeiah Judith loh amih te, “Ka hui rhoek, ka ol hnatun uh lah. A lu he khuen uh lamtah na pangbueng dongkah yael ah tai uh.
14:2 Khothai a pha tih diklai ah khomik a thoeng vaengah na pumcumnah te rhip muk uh. A pum aka noeng boeih longtah a boei khat ah khueh uh lamtah khopuei lamloh coe uh. Assyria caem dankah kolnen ah aka cet koemboei la om uh lamtah, cet uh boeh.
14:3 Te vaengah a lungpok haica a pom uh vetih Assyria caem rhalboei te haeng hamla a rhaehhmuen a paan uh ni. Holofernes kah dap te a muk uh suidae hmu uh mahpawh. Te vaengah rhihnah loh amih te a thing vetih amih khaw nangmih mikhmuh ah yong uh ni.
14:4 Te vaengah Israel kho khuikah aka om nangmih boeih loh amih te hloem uh lamtah a namtlak ah amih te tloek uh.
14:5 Tedae he he na saii uh hlanah Ammon Achior te hang khuen uh. Te daengah ni a hmuh vetih Israel imkhui a hnaep te khaw, a dueknah hamla mamih taengah han tueih te khaw a hmat eh.
14:6 Te dongah Achior te Uzziah im lamloh a khue uh. A pha vaengah tah pilnam rhaengpuei laklikah hlang kut dongah Holofernes kah a lu te a hm uh. Te dongah a maelhmai a tal la cungku sut.
14:7 Anih te a thoh uh vaengah tah Judith kah kho kung ah kut yalh tih hinyahnah a paek. Te phoeiah, “Judah dap khui boeih ah na yoethen pai. Namtom boeih khaw, nang ming aka ya boeih tah let ni.
14:8 Tihnin ah na sai boeih te kai taengah thui lah,” a ti nah. Te dongah amih taeng lamloh nong hamla a thui khohnin lamloh a saii boeih pilnam kah mikhmuh ah anih ham te a thui pah.
14:9 A thui te a khah vaengah pilnam loh tamlung ol a huel uh tih a khopuei te omngaihnah ol loh a khuk.
14:10 Pathen loh Israel ham a saii pah te Achior loh a hmuh vaengah tah yahhmui te a rhet. Israel imkhui la kun ti tihnin hil kho a sak van.
14:11 A suntlak uh van neh Holofernes kah a lu te pangbueng dongah a tai uh. Te phoeiah a pumcumnah te boeih a muk uh tih hlangping te tlang hlaep la suntla uh.
14:12 Amih te Assyria rhoek loh a hmuh vaengah tah a rhalboei taengla ol a pat uh. Te dongah rhalboei khaw, mawtkung khaw, khoboei rhoek khaw suntla uh.
14:13 Holofernes kah dap a pha uh vaengah tah amh taengah aka thotar Bagoas te, “Mamih kah boei te haeng laeh, sal rhoek loh amamih a pocinah rhungla mamih taengah caemtloeh rhal then neh ha suntla uh coeng,” a ti nah.
14:14 Te dongah Bagoas te dap thohka taengla cet tih a khoek pah. Amah long ngawn tah Judith neh ip rhoi coini tila a poek.
14:15 Pakhat long khaw a doo pawt vaengah tah a ong tih imkhui la kun. Te vaengah Holofernes tah a lu om kolla cirhong dongah a rha uh sut te a hm uh.
14:16 Te dongah a ol te tha-ue la a huel tih a rhung a rhah neh pang, a himbai te khaw a phen.
14:17 Te phoeiah Judith a om nah dap lam te koe cet dae hmu pawh. Te dongah pilnam taengla puk cu tih pang coeng.
14:18 “Salnu loh mamih n'thainah coeng. Hebru nu pakhat loh manghai Nebukhadnezzar imkhui ah rhun a khuen coeng. Holofernes he a lu a om kolla diklai ah sut yalh coeng,” a ti.
14:19 Assyria caem kah a lu rhoek loh te te a yaak vaengah a hnidung te a phen uh tih mat lakueng uh. Te dongah a pang ol neh rhaehmuen ah kho a lawk uh.