Library · hlt

JDT 16

16:1 Te vaengah Judith loh, Ka Pathen hamla kamrhing neh laa thoh uh lamtah, Ka Boeipa te tlaklak nen khaw hlai uh lah. Amah taengah tingtoenglung a thai la sa lah, Amah pomsang lamtah a ming te khue uh lah. 16:2 Boeipa tah caemrhal aka phae Pathen la om tih, A pilnam lakliah rhaehhmuen khaw a khueh coeng, Kai aka hloem kut dong lamkah kai he amah loh n'hlawt coeng. 16:3 Assyria he tlangpuei tlang lamloh ha suntla A hlangrhal a thawng a sang neh ha pawk A hlangmih loh tuihang sok khaw a khaih tih A lambong loh tlang khaw a thing. 16:4 Ka khorhi he hlup hamla hoem tih Ka ca tongpa rhoek cunghang neh a ngawn Ka ca cahmang rhoek te diklai a phop tih, Camoe te kubuem la a tuuk phoeiah hutaca te maeham la a khuen 16:5 Tedae tlungthang Boeipa loh amih te, Huta kut dongah a tongtah sak, 16:6 A hlangtlung khaw cadong tongpa rhoek kut ah cungku pawt tih, Kaipoeh ca rhoek loh anih te a boh bal moenih. Anih te hlang sang pumlen loh a nan bal moenih. Tedae Merari nu Judith kah lungsak hlangthen loh anih te a ngawn coeng. 16:7 Israel khuikah a hnaemtaek rhoek te dangrhoek ham, A nuhmai himbai khaw a pit coeng tih, A maelhmai he botui a hluk. 16:8 A sam te sampoirhui te a poi tih Anih thainah hamla hnin then a bai 16:9 A khokhom loh a mik a let sak tih A hlang then loh a lungbuei a yoek pah. Te dongah a rhawn ah cunghang neh a rhaih. 16:10 A thinomnah te Persian khaw thuen tih, A rhalthen dongah Median khaw hit coeng. 16:11 Te dognah a hnaemtaek ka pilnam khaw tamhoe pai, A ol a huel uh tih rhal rhoek khaw balkhong uh coeng. 16:12 Amih te salnu ca loh a thun tih boekoek ca rhoek bangla amih te hmalaem uh tih, Amih tah ka Boeipa kah caempuei hmai ah po uh coeng. 16:13 Ka Pathen taengah laa thai mah ka sa eh, Boeipa nang tah, lennah, rhuepomnah neh na om. 16:14 Na saihluen boeih loh namah m'bongyong saeh Na thui bangla amih te na saii coeng. Mueihla na tueih tih amih na hlin na saii coeng. Na ol aka oel thai he a om tlaih moenih 16:15 Tlang rhoek khaw a khoengim hil tui neh hinghuen saeh, Na hmai aa hmaiah tah lungnu khaw khoirhat bangla tlae mai. Tedae nang aka hinyah rhoek ham tah sitlohnah na tueng sak. 16:16 Botui la hmueihhlutnah boeih he hno yit la om cakhaw, Hmaihlutnah pum kah a tha te na taengah yit koek cakhaw, Boeipa aka rhih ham tah len yoeyah. 16:17 Anunae, ka pilnam aka tlai thil namtom aih ke, Laitloeknah hnin ah tah Boeipa Tlungthang loh Amih soah phulohnah a khueh ni. A saa khui ha hmaai neh a rhit a tueih pa vetih, tlohnah neh kumhal duela rhap uh ni,” a ti. 16:18 Jerusalem a pha uh vaengah Pathen a bawk uh. Pilnam khaw koe cilpoe uh tih hmaihlutnah hmueih, moeihoeih paek neh kutdoe te a nawn uh. 16:19 Judith long khaw Holofrenes kah khohrhang boeih, pilnam loh amah a paek te khaw, Pathen taengah a paek. Amah loh imkhan imbang a loh te khaw olkamnah la a paek. 16:20 Pilnam loh Jerusalem kah rhokso hmai ah hlathum khui khotue a saii uh tih Judtih khaw amih taengah kho a sak. 16:21 Te phoeiah tah amih te im la mael uh tih a khohrhang te a paan uh. Judith khaw Bethulia la ce tih amah im ah kho a sak. Amah hing tuei khuiah tah anih paeng pum loh a thangpom. 16:22 A va Manasseh duek tih a pilnam taengla a khoem uh parhi te, anih yunah ham aka ngaih khaw muep om dae, a hing khuiah tah a pum te hlang taengah a paek moenih. 16:23 Anih te mingthang la ta-oe ta-oe om tih a va im ah a patong puei. Anih he kum yakhat phoeiah kum nga hing. A salnu khaw loeihnah a paek. Anih he Bethulia duek tih a Manasseh kah phuel ah a up uh. 16:24 Anih he Israel imkhui lah hnin rhih a rhah uh. A koe boeih khaw a hinng vaengah a va Manasseh kah huiko, rhep aka yoei uh taengah a paek. 16:25 Judtih a hing khui neh, a dueknah hnuk ah khaw kum a sen Israel khuiah he boethae puek voel pawh.