Library · hlt

JDT 7

7:1 A vuen ah tah Holofernes loh a caem boeih neh anih taengla aka kap huitai boeih te, rhaehhmuen lamloh paek uh tih Bethulia thoeih ham, tlang naeng te loh Israel soah caemtloeknah khueh ham ol a paek. 7:2 Te dongah a caemtloek rhoek khaw khong uh. Te vaengah rhalkap thawng yakhat, marhang caem thawng halinit, hnophuei rhamsa neh te te aka dawn rhoei, a kho neh a hnuk aka vai rhoek neh caempuei caempa la cet uh. 7:3 Amih te Bethulia kol kah sok taengah rhaeh uh tih Dothan ah te Balbaim duela yaal uh. A sen loh Esdrealon rhaldan kah Bethulia lamoh Cyamon duela a pha. 7:4 Israel ca rhoek loh hangmi te muep a hmuh vaengah tah lakueng neh thuen uh. Te dongah a hui taengah khaw, “Khohmuen pum he boeih a hlih uh pawn ni. Tlang sang khaw, tuikol khaw, mol khaw a rhih te noeng mahpawh,” a ti uh. 7:5 A pumcumnah te rhip a pom uh tih hmaithoi hmai neh khoyin khing a tawt uh. 7:6 A hnin bae dongah tah Holofernes loh a lambong boeih te a khuen tih Bethulia kah Israel hmuhnah boeih te a sawt. 7:7 Khopuei la aka pawk naeng neh tui a lohnah sok te khaw a hip. Te te boeih a loh te aka tawt rhalkap a khueh phoeiah a caem taengla mael. 7:8 Te dongah Edom kah a hamca boeih khaw, Moab neh tuikaeng rhalboei boeih khaw anih taengla cet uh tih a taengah, 7:9 “Ka boeipa aw, kaimih kah ka thui he hnatun lah, na caem long hmatanah khaw yook mahpawh. 7:10 Israel pilnam he tah a cai dongah hangdang uh pawt tih a om nah tlang sang dongah ni a pangtung uh. Tlang som duela pha ham khaw a yoei moenih. 7:11 Te dongah ka boeipa aw, a noek kah bangla amih te tloek boeh. Te daengah ni na hlang pakhat khaw a cungku pawt eh. 7:12 Na rhaehhmuen ah om lamtah na taengkah na hlang caem rhoek te khoembael. Na tueihyoeih rhoek loh tlang yung kah sok he kan lo bitni. 7:13 He kah tui ni Bethulia kah pilnam pum loh a than. Tui a halh uh vaengah amih te n'thup vetih a khopuei te khaw han tloeng bitni. Kaimih khaw ka pilnam neh mol la noenoe ka luei uh saeh lamtah khopuei lamloh pakhat khaw a coe thai pawt ham tlang hlaep lamloh kan dawn eh. 7:14 A yuu neh a ca rhoek ngawn tah cunghang loh a ben hlanah mah lamlum loh a khah uh vetih a om nah longpuei ah rha uh bitni. 7:15 He tlam nih amih te a thae la na thuung thai eh, boe a koek uh tih nang kah rhoepnah ol ne a doe uh moenih,” a ti na uh. 7:16 Hekah ol he Holofernes neh a boeihlum boeih loh a ngaih. Te dongah amih kah a thui bangla saii ham ol a paek. 7:17 Te dongah Ammon caem tah Assyria hlang thawng nga neh huek thoeih uh. Te phoeiah kol ah rhaeh uh tih Israel ca kah tui a than nah sok te a loh uh. 7:18 Edom neh Ammon te khaw ce tih Dothan rhaldan kah tlang ah rhaeh uh. Te vaengah hlang vang te tuithim neh khothoeng la, Egrebeh la a tueih uh. Te tah tuihang Mokhmui kaep kah Khushi neh yoei coeng. A tloe rhoek tah kol kah Assyria caem rhaehhmuen ah om tih diklai hman boeih a thing uh. Te dap neh a leng khaw a hlangmi a yet la khawk yal uh, hlangping la muep bop uh. 7:19 Israel ca rhoek a sarhi yawk uh tih Boeipa Pathen taengah pang uh. A thunkha boeih loh amih a dum dongah amih hamla loeihnah longpuei om voel pawh. 7:20 Assyria caem boeih neh rhalkap long khaw, leng long khaw, lambong long khaw amih te khohnin sawmli a vael. Bethulia kaepvai tuitungnah dongkah tui khaw a hong la boei om coeng. 7:21 A tuito khaw boeih kak tih ok tui a rhoeh la a khueh nah khohnin ti he om pawh. Tui te yenyen ah ni a tael uh coeng. 7:22 A ca rhoek khaw yaai uh coeng tih tui a koek uh dongah huta neh camoe tah khopuei vongka neh longpuei ah ni a sop uh coeng. A thaa rhoe khaw om voel pawh. 7:23 Te dongah huta neh camoe boeih ta Uzziah neh khopuei mawtkung rhoek taengah tingtun uh tih bungbung pang uh. 7:24 A hamca rhoek taengah te, “Nangmih neh kaimih laklo ah Pathen loh laitloek nawn saeh. Assyria neh rhoepnah na saii pawt dongah kaimih ham nganboh muep nan saii uh coeng. 7:25 Mamih aka bom he pakhat khaw a om moenih. 7:26 Te dongah khue uh lamtah khopuei pum he Holofernes kah caem neh a rhalkap boeih taengah maehham la tloeng laeh. 7:27 Amih loh n'sol te ni a then palueng pawn eh. Sal la n'om uh sitoe cakhaw mamih kah hingnah sueng vetih mamih mikhmuh kah a dikhnawn khaw, n'yuu rhoek khaw, a ca rhoek kah a mal hong a pat khaw m'hmuh pawt eh. 7:28 Vaan neh diklai kah Pathen, a pa rhoek kah Boeipa ni laipai la ka khue uh coeng. Mamih kah tholhnah neh a pa rhoek kah tholhnah kongah ni n'phaep coeng. Ka thui uh bangla tihnin ah saii laeh,” a ti uh. 7:29 Te vaengah hlangping lakli lamloh rhangpuei kah rhungrhah te a len la rhup rhup cai. Amih te Pathen taengah ol pakhat huphup pang uh. 7:30 Tedae Uzziah loh amih te, “Kamanuca rhoek neh ka ngannu rhoek, namning sak uh. Hnin nga mah rhing dae sih. Te khohnin ah mamih Boeipa Pathen loh mamih taengah rhennah a tueng sak bitni. Amah loh mamih he n'hnoo tangkik aih mah pawh. 7:31 Tedae te khohnin ni a poeng tih mamih hamla bomnah a thoeng pawt oeh a tah, na thui bangla ka saii bitni,” a ti nah. 7:32 Te phoeiah tah pilnam te amah hmuen la cet uh tih a khopuei kah imsang so neh vongtung dongla luei uh. Huta camoe tah im la a tueih uh. Tedae khopuei tah ngaihmang khobing tangkik la om sut.