Job 31
31:1 Paipi te ka mik neh ka saii dongah me tlam lae oila te ka yakming eh?
31:2 A so lamkah Pathen khoyo neh hmuensang lamkah Tlungthang rho te menim?
31:3 Boethae ham rhainah neh boethae aka saii ham yoethaenah moenih a?
31:4 Amah loh ka longpuei a hmuh tih ka khokan boeih he a tae moenih a?
31:5 A poeyoek taengah ka pongpa tih ka kho loh a hlangthai palat taengla a tawn uh atah,
31:6 Duengnah cooi dongah kai n'khiing saeh lamtah Pathen loh ka muelhtuetnah ming saeh.
31:7 Longpuei lamloh ka khokan a buung atah, ka mik hnukah ka lungbuei cet tih ka kut dongah a lolhmaih a kap atah,
31:8 ka soem vaengah a tloe loh ca saeh lamtah ka cadil rhoek te ha uh saeh.
31:9 Huta loh ka lungbuei a hlae tih ka hui kah thohka ah ka rhongngol atah,
31:10 Ka yuu loh a tloe la kuelh saeh lamtah a taengah hlang tloe bakop mai saeh.
31:11 Te dongah te khonuen rhamtat neh te te thaesainah rhokhan ni.
31:12 Te hmai loh Abaddon duela a hlawp tih ka cangvuei te boeih ha.
31:13 Ka salpa neh ka salnu loh kai taengah a tuituk vaengah tiktamnah ka hnawt atah,
31:14 Pathen a thoh vaengah balae ka saii vetih n'hip vaengah amah te metlam ol ka mael eh?
31:15 Bungko khuiah kai aka saii loh anih a saii moenih a? Kaimih he bung khuiah pakhat la n'cuen sak.
31:16 tattloel kah kongaih te ka hloh pah tih nuhmai mik te ka khah sak koinih,
31:17 Kamah buhkam te kamah bueng loh ka caak tih cadah loh ca pawt koinih,
31:18 Ka camoe lamloh napa bangla ka taengah pantai tih nuhmai khaw a nu bung lamloh ka mawt.
31:19 Pueinak mueh tih himbai tling la aka milh khodaeng te ka hmuh mai tih,
31:20 A pumpu, a pumpu ah kai n'uem uh vaengah ka tu mul neh ka hlung pawt mai koinih,
31:21 Vongka ah kai bomkung te ka hmuh vaengah ka kut he cadah soah ka ka thueng atah,
31:22 ka laengpang he a hnuk lamloh rhul saeh lamtah ka ban a cung dong lamloh tlawt mai saeh.
31:23 Pathen taengkah rhainah te kai ham ka birhihnah la a om dongah a boeimangnah te ka noeng moenih.
31:24 Sui te ka uepnah la ka khueh tih sui cilh te ka pangtungnah la ka thui koinih,
31:25 Ka thadueng len tih ka kut loh a khuet la a hmuh dongah ka kokhahnah atah,
31:26 Vangnah dongah a thangthen tih hla vang a thoeih te ka hmuh vaengah,
31:27 ka lungbuei he yinhnuk ah hloih tih ka kut loh ka ka te mok koinih.
31:28 He khaw a so kah Pathen taengah ka basa la om vetih thaesainah lai la om ni.
31:29 Ka lunguet kah yoethaenah dongah ka kohoe tih yoethae loh anih taengla a thoeng te ka haenghang puei atah,
31:30 A hinglu te thaephoeinah neh hoe hamla ka ka he laihmu la ka khueh aih moenih.
31:31 Ka dap kah hlang rhoek loh, “U long nim a maeh te a cung pawt la a paek eh?” a ti uh moenih a?
31:32 Ka thohkhaih kah yinlai te caehlong ka ong pah tih vongvoel ah a rhaeh moenih.
31:33 Hlang bangla ka boekoeknah ka dah tih, kai kathaesainah he ka thindang ah ka det mai akhaw,
31:34 hlangping te yet taengah ka sarhing tih huiko kah nueihbu loh kai n'rhihyawp sak. Te dongah ka kuemsuem tih thohka la ka moe pawh.
31:35 Kai taengkah aka hnatun la kamah taengah u long nim m'paek lah mako? Ka kutha he Tlungthang loh kai n'doo saeh lamtah ka tuituknah he hlang loh cabu la daek saeh.
31:36 Te te ka laengpang ah ka koh vetih te te ka soah rhuisam la ka laikoeinah het mahpawt nim?
31:37 Ka khokan tarhing la a taengah ka puen lah vetih anih te rhaengsang bangla ka paan lah mako.
31:38 Ka khohmuen loh kai m'pang thil tih a kong te rhenten rhap koinih,
31:39 A thadueng te tangka mueh la ka caak tih a kungmah kah hinglu ka yawn sak atah,
31:40 Cang yueng la mutlo hling, cangtun yueng la saeldol khaw poe saeh,” a ti. Job kah ol bawt coeng.