Library · hlt

Job 36

36:1 Elihu loh koep a cong tih, 36:2 “Kamah taengah bet m'bulbo uh lamtah nangmih te olthui khaw Pathen yueng la koep kan thui eh. 36:3 Ka poeknah he khohla lamloh kam phueih tih duengnah he kai aka saii ham ni ka khueh. 36:4 Ka olthui he a honghi pawt dongah nang taengkah lungming khaw a cuemthuek ham tueng pai. 36:5 Pathen tah khuet tih lungbuei thadueng a khuet te a sit moenih ne. 36:6 Halang te hlun pawt tih mangdaeng te tiktamnah la a paek. 36:7 A mik te hlangdueng taeng lamloh khap pawt tih manghai rhoek te ngolkhoel dongah a ngol sak. Te phoeiah amih a yoeyah la a thuung tih a sang sak. 36:8 Tedae hmaipom neh pin uh tih phacip phabaem rhuihet neh a tuuk uh atah, 36:9 Amih kah bisai neh a boekoeknah dongah a len uh te khaw amih taengah a thui pah. 36:10 Thuituennah hamla amih hna te a vueh pah tih boethae lamloh mael hamla a thui pah. 36:11 A hnatun uh tih tho a thueng koinih a khohnin then neh thok tih a kum te a naepnoi la boeih. 36:12 Tedae a hnatun uh pawt atah pumcumnah neh a paan uh vetih mingnah aka tal bangla pal uh ni. 36:13 Lungbuei lailak rhoek loh thintoek a khueh uh tih amih a khih vaengah pataeng bomnah bih pawh. 36:14 Amih hinglu te camoe la, a hingnah khaw hlanghalh lakli ah duek. 36:15 A phacip phabaem vaengah mangdaeng khaw a pumcum sak tih a hna te nennah neh a toeh. 36:16 Rhal ka lamloh hmuenka la nang m'poh. Te lam te mangdaeng mangtok om pawt tih na caboei dongkah mongnah maehhloi ngang. 36:17 Halang kah dumlai khaw na cung sak tih dumlai neh laitloeknah loh m'moep. 36:18 Kosi loh nang te boeinah neh m'vuet ve ne. Te dongah tlansum cungkuem loh nang m'phaelh boel. 36:19 Rhal khuiah pawt khaw, na bombihnah neh thadueng, thayung boeih loh m'khoembael aya? 36:20 A hmuikah pilnam a khum sak ham khoyin khaw hloem aih boeh. 36:21 Ngaithuen, boethae taengla mael boeh. Te te phacip phabaem lakah te na tuek coeng te. 36:22 Pathen tah amah thadueng neh thaphoh uh coeng ke. Amah bangla unim aka saya? 36:23 Anih ham a longpuei te u long nim a tae pah tih u long nim, 'Dumlai na saii,’ a ti nah. 36:24 Amah kah bisai na rhoeng sak ham te poek. Te ni hlang rhoek loh a hlai uh. 36:25 Hlang boeih loh te te a hmuh uh tih hlanghing loh khohla lamkah a paelki. 36:26 Pathen tah a len dongah a kum tarhing te m'ming uh lek pawt tih khenah lek pawh. 36:27 Tui dongkah aangpi a yoek tih khotlan te a tuihu lamloh a ciil. 36:28 Khomong khaw cip tih hlang soah muep pha. 36:29 Khomai maiyan neh a dungtlungim kah pang ol a yakming mai ngawn. 36:30 A vangnah loh a taengah a kah tih tuitunli yung duela a khuk. 36:31 Te nen te pilnam taengah lai a tloek tih a yet taengah caak a paek. 36:32 A kut dongkah vangnah loh a khuk tih phek a cuuk ham khaw te te a uen. 36:33 A khohum loh amah kawng te a doek tih boiva pataeng thintoek neh cet.