Lamentations 3
3:1 Kai tah a thinpom caitueng dongkah phacipphabaem aka hmu hlang ni.
3:2 Kai te m'hmaithawn tih hmaisuep ah n'caeh sak vaengah vangnah om pawh.
3:3 Kai taengah a tloeng tangloeng tih khohnin yung ah a kut a hluem.
3:4 Ka vin neh ka saa a hmawn sak tih ka rhuh a paep sak.
3:5 Kai he rhahalung n'suem thil tih sue neh bongboepnah te m'ven thil.
3:6 Ka khosak he khosuen kah aka duek bangla khohmuep ah ka om.
3:7 Kai taengah khoep a biing tih ka rhohum loh n'nan he ka loeih pawh.
3:8 Ka khue tih ka pang vaengah pataeng ka thangthuinah te a toeng.
3:9 Lungrhaih neh ka longpuei a biing tih ka hawn a paihaeh sak.
3:10 Kai taengah tah vom neh sathueng pataeng a huephael kah sathueng bangla amah rhongngol coeng.
3:11 Ka longpuei ah m'phaelh sak tih kai n'soek dongah kai aka pong la n'khueh.
3:12 A lii a phuk tih thaltang ham kutnoek la kai n'tai.
3:13 Anih kah liva ca loh ka kuel khuila pawlh.
3:14 Ka pilnam pum kah nueihbu neh khohnin yung ah amih kah rhotoeng la ka poeh.
3:15 Ankhaa te kai ng'kum sak tih pantong neh kai m'hmilhmal sak.
3:16 Ka no he lungcang neh a mawth tih hmaiphu khuiah kai m'vuei.
3:17 Ka hinglu he ngaimongnah lamloh a hlahpham tih a then khaw ka hnilh.
3:18 Te dongah kai kah hmailong neh BOEIPA lamkah ka ngaiuepnah khaw paltham coeng ka ti.
3:19 Kai kah phaiphabaem neh ka airhoeng khaw, ka pantong neh ka anrhat khaw poek lah.
3:20 A poek a poek vaengah ka khuikah ka hinglu tah tlayae la tlayae coeng.
3:21 He he ka ngaiuep dongah ni ka lungbuei he ka mael puei.
3:22 BOEIPA kah sitlohnah tah bawt pawt tih a haidamnah khaw muei pawh.
3:23 Mincang ah na uepomnah thai khaw ping.
3:24 Ka hinglu loh, “BOEIPA tah ka khoyo ni,” a ti dongah amah te ka ngaiuep van.
3:25 BOEIPA tah amah aka lamtawn ham neh amah aka toem hinglu ham a then pah.
3:26 BOEIPA kah loeihnah dongah tah rhingoel ngolsut ham khaw then.
3:27 A camoe vaengah hnamkun a phueih te ni hlang ham khaw then.
3:28 Amah soah a poeh bangla amah bueng khosa saeh lamtah kuemsuem saeh.
3:29 A ka te laipi khuiah vuei saeh lamtah ngaiuepnah a om khaming.
3:30 Amah aka ngawn ham a kam duen pah saeh lamtah kokhahnah neh kum saeh.
3:31 Ka Boeipa loh kumhal duela a hlahpham ngawn moenih.
3:32 Pae sak bal mai cakhaw a sitlohnah dongkah sitlohnah a khawk vanbangla a haidam bitni.
3:33 Hlang ca te a lungbuei a phaep pah tih a pae sak bal moenih.
3:34 Khohmuen kah thongtla boeih te a kho hmuiah a phop ham,
3:35 Khohni kah mikhmuh ah hlang kah tiktamnah hnawt ham,
3:36 A tuituknah neh hlang a khun sak ham khaw ka Boeipa loh a hmuh ngaih moenih.
3:37 Ka Boeipa loh a uen pawt te om ni tila unim aka thui thai.
3:38 A thae neh a then khaw Khohni ka lamloh thoeng pawt nim.
3:39 A tholhnah sokah a tholhnah yuvat ah balae tih tongpa hlang hing loh a kohuet mai eh.
3:40 Mamih kah longpuei he phuelhthaih tih n'khe phoeiah BOEIPA taengla mael uh sih.
3:41 Mamih kah thinko neh kut he vaan kah Pathen taengah phuel uh sih.
3:42 Kaimih kah boekoek neh nang kan koek uh te khodawk nan ngai uh moenih.
3:43 Thintoek neh na cun uh vaengah kaimih nan hloem tih lungma ti kolla nan ngawn.
3:44 Thangthuinah neh paan ham khaw namah te cingmai neh na cun uh.
3:45 Kaimih he pilnam lakli ah yun-aek neh kawnhnawt la nan khueh.
3:46 Ka thunkha boeih loh kaimih taengah a ka a ang uh.
3:47 Birhihnah neh rhom khaw kaimih taengah omdamnah neh pocinah la thoeng.
3:48 Ka pilnam nu kah a pocinah dongah ka mik he sokca tui la long.
3:49 Ka mik loh a hawk vetih a bawtnah om pawt hil kak mahpawh.
3:50 A dan neh BOEIPA loh vaan lamkah a hmuh duela.
3:51 Ka khopuei tanu boeih kongah ka mik loh ka hinglu he a poelyoe.
3:52 Lunglilungla maila kai he ka thunkha rhoek loh vaa bangla m'mae khaw m'mae uh mai.
3:53 Ka hingnah te tangrhom ah a det uh kai taengah lungto a omtoem thil.
3:54 Ka lu he tui loh a et vaengah tah n'tuiphih muema ka ti.
3:55 BOEIPA na ming te tangrhom laedil lamloh kang khue.
3:56 Ka hilhoemnah ham ka pang te hna na buem pawt dongah ka ol na yaak coeng.
3:57 Namah kang khue khohnin ah na mop tih, “Rhih boeh,” na ti.
3:58 Ka hinglu kah tuituknah khaw ka Boeipa loh na rhoe tih ka hingnah na tlan.
3:59 BOEIPA aw ka lolhmaihnah na hmuh cakhaw ka laitloeknah dongah n'tang sak lah.
3:60 Kai soah amih kah tawnlohnah boeih neh amih kah kopoek boeih te na hmuh.
3:61 BOEIPA aw kai soah amih kah kokhahnah neh amih kah kopoek boeih te na yaak coeng.
3:62 Khohnin yung ah a phungding ol neh kamah taengah kai m'pai thil uh.
3:63 A hoepnah neh a painah ah, amih kah hnaelnah ni ka paelki.
3:64 BOEIPA aw, amih kut dongkah khoboe neh a tiing la amih te thuung lah.
3:65 Amih te lungbuei kotalh la khueh lamtah na tapvoepnah te amih soah thoeng sak.
3:66 BOEIPA aw thintoek te na hloem dongah ni amih te vaan hmui lamloh na mitmoeng sak.