Library · hlt

Mark 3

3:1 Te phoeiah tunim la koep a kun hatah, kut a koh la aka om hlang pakhat tapkhoeh om. 3:2 Te vaengah anih te Sabbath ah a hoeih sak atah paelnaeh hamla Jesuh te a dawn uh. 3:3 Te vaengah Jesuh loh kut a koh la aka om hlang te, “ A laklung ah pai lah,” a ti nah. 3:4 Te phoeiah amih te, “ Sabbath ah hno then saii ham pawt atah thae ham, hinglu hlawt ham pawt atah ngawn ham a? a ngaih?” a ti nah. Tedae amih loh a hil a phah uh. 3:5 Te dongah amih te thintoek neh a sawt. Amih thinko kah thinthahnah soah a kothae. Tekah hlang te, “ Na kut te yueng lah,” a ti nah. A yueng tangloeng tih a kut khaw hoeih. 3:6 Tedae Pharisee rhoek tah Herod kah hlang rhoek taengla tlek cet uh tih Jesuh poci ham dawtletnah a khueh thil uh. 3:7 Jesuh tah a hnukbang rhoek neh tuili la a caeh uh hatah Galilee rhaengpuei loh muep a vai uh. 3:8 Te vaengah Judea lamkah, Jerusalem kah, Idumea kah, Jordan rhalvangan, Tyre taengvai neh Sidon lamkah rhaengpuei boeih nehabisaii boeih te aka ya rhoek loh a taeng la ha pawk uh. 3:9 Tedae a hnukbang rhoek te, “ Amah ham lawng mah khuituk, hlangping te a khuiah thet pawt nim,” a ti nah. 3:10 Te vaengah hlang muep a hoeih sak dongah tloh aka khueh boeih loh Jesuh te taek sak ham amah te a nan uh. 3:11 Rhalawt mueihla loh anih a hmuh uh vaengah a bakop thil uh tih a pang doela, “Nang tah Pathen Capa ni,” a ti uh. 3:12 Tedae amah te kawng te mingpha la ng'khue pawt ham amih te khak a uen. 3:13 Te phoeiah Jesuh tlang la luei hang tih a ngaih rhoek te a khue dongah a taengla cet uh. 3:14 Te vaengah hlainit a tuek tih amih te caeltueih la a khue bal. Te daengah ni amah taengah om uh vetih olthangthen aka hoe la, 3:15 saithainah aka khueh la, rhaithae aka haek la amih te a tueih pai eh. 3:16 Te vaengkah Simon la ming aka pae Peter, 3:17 Zebedee kah capa James neh James kah manuca Johan amih rhoi te Boanerges ming a paek. Te tah rhaek capa rhoi ni. 3:18 Andrew, Philip, Bartholomew, Matthai, Thomas, Alphaeus capa James, Taddaeus, neh Kanaan Simon, 3:19 amah aka voei Judah Iskariot tila hlainit te a tuek. 3:20 Te phoeiah im khuila a caeh hatah hlangping loh koep a tingtun pah. Te dongah amamih khaw coeng thai pawt tih buh ca uh pawh. 3:21 A taengkah rhoek loh a yaak uh vaengah, “Limlum coeng,” a ti uh tih amah te tuuk hamla cet uh. 3:22 Te vaengah cadaek rhoek tah Jerusalem lamloh suntla u tih, “Beezebul a khueh dongah ni rhaithae boei rhangneh rhaithae te a haek,” a ti uh. 3:23 Tedae amih te a khue tih nuettahnah neh amih taengah, “ Satan loh Satan te a haek ham coeng thai aya te? 3:24 Ram pakhat tah amah te a paekboe coeng atah tekah ram te a pai thai moenih. 3:25 Te phoeiah im khaw amah a paekboe koinih tekah im te pai thai mahpawh. 3:26 Satan loh amah te pai thil tih paekboe koinih pai thai pawt vetih a palthamnah la om ni ta. 3:27 Tedae Hlang tlung te lamhma la a pin pawt atah hlang tlung kah im ah hnopai te muk ham a kun thai loeng loeng moenih. A pin phoei daengah ni a im te a muk pa eh. 3:28 Nangmih taengah rhep kan thui, tholhsainah neh soehsalnah neh aka soehsal uh hlang ca rhoek te tah boeih a hlah ni. 3:29 Tedae Mueihla Cim taengah aka soehsal te tah kumhal duela khodawkngainah om mahpawh,” a ti nah. 3:30 Tedae, “Rhalawt mueihla a kaem,” a ti uh dongah dungyan tholhsainah om kuekluek coeng. 3:31 Te vaengah a manu neh a mana rhoek te ha pawk uh. Tedae poengben ah pai uh tih Jesuh aka khue ham te a tueih uh. 3:32 Te dongah a taengkah kah aka ngol hlangping loh , “Na nu, na mana rhoek neh na ngannu rhoek loh poengben ah nang n'toem uh ke,” a ti nah. 3:33 Tedae amih te a doo tih, “ Kai manu neh kai manuca rhoek te unim? unim manuca rhoek la aka om?” a ti nah. 3:34 Te phoeiah a taengvai ah aka ngol rhoek te a sawt tih, “ Ka manu neh ka manuca rhoek la he, 3:35 Pathen kah kongaih aka saii rhoek te tah ka manuca, ka ngannu neh ka manu la om,” a ti nah.