Library · hlt

Numbers 13

13:1 BOEIPA loh Moses te a voek tih, 13:2 “Namah kah hlang rhoek te tueih lamtah Kanaan kho te yaam uh saeh. Te te Israel ca rhoek taengah ka paek coeng. A napa rhoek koca lamloh hlang pakhat, hlang pakhat tah amamih kah lamkah khoboei la boeih tueih,” a ti nah. 13:3 Te dongah BOEIPA kah olka bangla Moses loh amih te Paran khosoek lamloh a tueih. Amih tah Israel ca rhoek kah a lu hlang boeih ni. 13:4 Te rhoek khuiah a ming la Reuben koca lamloh kah Zakkuur capa Shammua, 13:5 Simeon koca lamloh Khori capa Shaphat, 13:6 Judah koca lamloh Jephunneh capa Kaleb, 13:7 Issakhar koca lamloh Joseph capa Igal, 13:8 Ephraim koca lamloh Nun capa Hosea, 13:9 Benjamin koca lamloh Raphu capa Palti, 13:10 Zebulun koca lamloh Sodi capa Gaddi, 13:11 Joseph koca lamloh Manasseh koca, Susi capa Gaddiel, 13:12 Dan koca lamloh Gemalli capa Ammiel, 13:13 Asher koca lamloh Michael capa Sethur, 13:14 Naphtali koca lamloh Vophsi capa Nahbi, 13:15 Gad koca lamloh Makhi capa Geuel, 13:16 Te kah hlang rhoek te a ming Moses loh khohmuen yaam ham a tueih. Te vaengah Moses loh Nun capa Hosea te Joshua la a khue. 13:17 Moses loh amih te Kanaan khohmuen yaam ham a tueih. Te vaengah amih te tuithim lamloh pahoi cet uh lamtah tlang la yoeng uh. 13:18 Khohmuen neh a khuikah khosa pilnam te so uh. Aka tlungluen nim, aka kha nim, yol nim, yet nim? 13:19 A khuiah kho a sak te mebang khohmuen nim? Then nim, thae nim? A khuiah kho a sak khopuei rhoek te rhaehhmuen nen nim, hmuencak nen nim? 13:20 Diklai te ul nim, caep nim? A khuiah thing om nim, om pawt nim? Moem uh thae lamtah khohmuen thaihtae te hang khuen uh. A tue khaw misur thaihcuek tue coeng ni,” a ti nah. 13:21 Te dongah cet uh tih khohmuen te Zin khosoek lamloh Lebokhamath Rehob duela a yaam uh. 13:22 Te dongah tuithim longah cet uh tih Hebron la pawk uh. Te vaengah Anakim cahlah Sheshai Ahiman neh Talmai ana om coeng. Hebron he Egypt Zoan mikhmuh ah kum rhih khuiah a thoh. 13:23 Eshkol soklong la a pawk uh vaengah thingluei te a saih uh tih misur a su pakhat te panit loh cunghloeng dongah a koh. Te vaengah tale thaih neh thaibu thaih te a khuen uh. 13:24 Israel ca rhoek loh te lamkah thaihsu te a haih uh kawng dongah te hmuen te Eshkol soklong a sui. 13:25 Khohnin likip a thok vaengah khohmuen aka yaam lamloh mael uh. 13:26 Cet tih Moses taeng neh Aaron taengah khaw, Kadesh Paran khosoek kah Israel ca rhaengpuei boeih taengla pawk. Amih taengah olka a khuen uh tih rhaengpuei boeih taengah khohmuen thingthaih te a tueng uh. 13:27 A taengla a puen uh vaengah, “Kaimih nan tueih nah khohmuen la ka pawk uh , suktui neh khoitui khaw long ngawn tih he he a thaih ni. 13:28 Lungli lungla la, khohmuen kah khosa pilnam khaw tlung tih khopuei vong cak khaw, bahoeng khangmai. Te phoeiah Anakim cahlah rhoek pataeng hnap ka hmuh uh. 13:29 Amalek loh tuithim khohmuen ah kho a sak, Khitti neh Jebusi neh Amori loh tlang ah kho a sak, Kanaan loh tuipuei taeng neh Jordan tuikaeng ah kho a sak,” a ti uh. 13:30 Tedae Kaleb loh pilnam te Moses mikhmuh ah a sim tih, “Cet rhoe cet uh sih lamtah te te pang uh sih, te te coeng rhoe coeng ta,” a ti. 13:31 Te vaengah amah neh aka cet hlang rhoek loh , “Mamihs lakah tlungluen coeng tih pilnam te paan ham coeng pawh,” a ti uh. 13:32 Khohmuen a yaam uh te theetnah la a khuen uh tih Israel ca rhoek taengah, “Khohmuen te yaam ham te longah ka paan uh , khohmuen tah amah khosa rhoek loh a yoop tih a khui kah pilnam te cungkui hlang la boeih ka hmuh uh. 13:33 Teah te Anakim koca Nephilim te ka hmuh uh. Nephilim lamkah phoeiah tah kaimih mik ah tangku bangla kai om uh coeng tih amih mik ah khaw ka om van,” a ti uh.