Library · hlt

Proverbs 12

12:1 Thuituennah aka lungnah loh mingnah khaw a lungnah tih, toelthamnah aka hmuhuet tah a kotalh. 12:2 Hlang then loh BOEIPA taengkah kolonah a dang tih, tangkhuepnah aka khueh hlang tah a poehlip sak. 12:3 Halangnah lamloh hlang cikngae pawt tih, aka dueng kah a yung tah a tuen sak moenih. 12:4 Tatthai nu tah a boei kah rhuisam la om, tedae yah aka bai tah a rhuh khuiah keet la om. 12:5 Aka dueng tah kopoek tiktam tih, halang kah a niing tah thailatnah la poeh. 12:6 Halang rhoek kah olka loh thii a rhongngol tih, aka thuem kah a ka loh hlang a huul. 12:7 Halang rhoek te a palet nen tah om uh voel pawh, tedae aka dueng rhoek kah im tah pai yoeyah. 12:8 A lungmingnah olka dongah hlang loh a thangthen tih, lungbuei aka paihaeh tah nueihbu la poeh. 12:9 Rhaidaeng mai cakhaw a taengah sal aka khueh tah, thangpom uh tih caak aka nai lakah then. 12:10 Aka dueng long tah a rhamsa kah a hinglu te a ming dae, halang kah haidamnah tah muenying muenyang la om. 12:11 Amah khohmuen aka tawn loh buh a cung sak tih, a lungbuei aka talh long tah a hoenghoep te a hloem. 12:12 Boethae rhoek kah tluum te halang loh a nai dae, aka dueng rhoek kah a yung tah cuen yoeyah. 12:13 Hmuilai kah boekoek dongah boethae kah hlaeh om dae, aka dueng tah citcai lamloh loeih. 12:14 Hlang kah lai thaih loh hnothen a cung sak tih, hlang kut neh a tiing la amah taengah a mael rhoe, a mael pah. 12:15 Aka ang kah longpuei tah a mikhmuh ah thuem dae, aka cueih kah cilsuep te ni a. hnatun. 12:16 Aka ang loh khothaih ah a konoinah te a phoe dae, aka thaai loh yah koi te a dah. 12:17 Uepomnah aka sat loh duengnah a thui tih, a honghi kah laipai tah hlangthai palat ni. 12:18 cunghang kah tingtoehnah bangla aka cal buengrhuet khaw om dae, aka cueih kah a lai tah hoeihnah la om. 12:19 Oltak kah hmuilai tah a yoeyah la cikngae tih, a honghi ol cat ka paa sak. 12:20 Hlangthai palat loh a lungbuei khuikah boethae te a uep tih, rhoepnah ham aka uen loh kohoenah a dang. 12:21 Aka dueng te boethae pakhat long khaw a cuhu thil moenih. Tedae halang rhoek tah boethae neh baetawt uh. 12:22 A honghi kah hmuilai tah BOEIPA kah a tueilaehkoi tih uepomnah aka saii te a kolonah la a khueh. 12:23 Aka thaai hlang long tah mingnah te a tuem tih, aka ang kah lungbuei long tah a anglat te a yan. 12:24 Aka haam kah kut loh a taemrhai vetih palyal te saldong la a om sak ni. 12:25 Lungbuei kah mawnnah loh hlang a bungkawn tih, ol then loh ko a hoe sak. 12:26 Aka dueng long tah a hui te a tlap tih, halang rhoek kah longpuei tah amamih te kho a hmang puei. 12:27 Palyal loh a sakah pataeng a kaeh moenih, tedae hlang haam kah a boeirhaeng tah a phu tlo. 12:28 Duengnah caehlong ah hingnah om tih, a hawn longpuei khaw dueknah moenih.