Library · hlt

Proverbs 14

14:1 Hlang cueih nu loh a im a sak dae, anglat long tah a kut neh a koengloeng. 14:2 BOEIPA aka rhih tah a dueng la cet dae, a longpuei kho aka hmang loh BOEIPA a hnaep. 14:3 Hlang ang kah a ka ah hoemnah kuhci om tih, aka cueih rhoek kah hmuilai loh amamih te a ngaithuen sak. 14:4 Saelhung a om pawt vaengah kongduk khaw caih dae, vaito thadueng lamkah canghum cangpai thoeng. 14:5 Oltak rhoek kah laipai tah a laithae moenih. Tedae a honghi kah laipai long tah laithae ni a. sat. 14:6 Hmuiyoi loh cueihnah a tlap dae a hong ni, mingnah he aka yakming ham tah yoeikoek mai. 14:7 Hlang ang te a hmai lamloh caeh tak, mingnah olka te na ming pawt ve. 14:8 Aka thaai kah cueihnah long tah a longpuei te a yakming dae, aka ang kah a anglat tah thailatnah ni. 14:9 Aka ang loh hmaithennah te a hnael dae, aka thuem long tah a laklo ah kolonah a saii. 14:10 A hinglu khahingnah loh lungbuei a ming. Te dongah a kohoenah dongah rhalawt loh boi thil pawh. 14:11 Halang rhoek kah im tah a phae pah vetih aka thuem kah dap tah rhoeng ni. 14:12 Longpuei he hlang kah mikhmuh ah thuem dae a hmailong ah dueknah longpuei la om. 14:13 Nueihbu dongah lungbuei loh thak a khoeih tih, a tloihsoi ah kohoenah khaw pha-ueknah la poeh. 14:14 Lungbuei aka balkhong khaw, hlang then khaw a khosing te amah hah bitni. 14:15 Hlangyoe long tah olka boeih te a tangnah dae, aka thaai long tah a khokan te a yakming. 14:16 Aka cueih long tah a rhih tih boethae te a nong tak. Tedae aka ang long tah a paan tih a omtoem. 14:17 Thintoek bangkek loh a anglat a phoe tih, tangkhuepnah aka khueh hlang khaw a hmuhuet uh. 14:18 Hlangyoe loh anglat a pang tih, aka thaai rhoek loh mingnah te a muei uh. 14:19 Hlang thae rhoek te hlang then rhoek kah mikhmuh ah, halang rhoek te hlang dueng kah vongka ah ngam uh ni. 14:20 Khodaeng te a hui long khaw a hmuhuet tih, hlanglen tah muep a lungnah. 14:21 A hui taengah aka hnoelrhoeng uh tah tholh tih, mangdaeng kodo aka rhen tah a yoethen. 14:22 Boethae aka uep rhoek te kho a hmang uh moenih a? Tedae sitlohnah neh uepomnah long tah hnothen ni a. caai thil. 14:23 Patangnah cungkuem loh kumkonah a om sak. Tedae hmuilai dongkah ol bueng ngawn tah tloelnah la poeh. 14:24 Khuehtawn he aka cueih rhoek kah a rhuisam la om tih, aka ang rhoek tah anglat la anglat coeng. 14:25 Oltak kah laipai loh hinglu a huul tih, hlangthai palat loh laithae a sat. 14:26 BOEIPA hinyahnah dongah pangtungnah sarhi khaw om, te dongah a ca rhoek ham hlipyingnah la om. 14:27 BOEIPA hinyahnah tah hingnah thunsih neh, dueknah hlaeh lamloh aka phaelh sak la om. 14:28 Pilnam kah cangpai dongah ni manghai kah rhuepomnah khaw a om, namtu a om pawt vaengah mangpa kah porhaknah la om. 14:29 Thintoek aka ueh tah bahoeng a lungcuei tih, mueihla bangkek loh anglat ni a. pomsang. 14:30 Lungbuei hoeihnah tah pumsa kah hingnah la om tih, thatlainah khaw rhuh keet la poeh. 14:31 Tattloel aka hnaemtaek loh amah aka saii ni a. veet, BOEIPA aka thangpom long tah khodaeng a rhen. 14:32 Halang tah a boethae ah bung tih, aka dueng tah a dueknah rhangneh ying. 14:33 Aka yakming kah lungbuei ah cueihnah khaw rhaehrhong tih, hlang ang lakli ah khaw ming uh coeng. 14:34 Duengnah loh namtom a pomsang tih, tholhnah loh namtu te rhaidaeng la a khueh. 14:35 Manghai kah kolonah loh sal te a cangbam tih, a thinpom loh yah a bai.