Library · hlt

Proverbs 18

18:1 Hoehhamnah aka tlap loh hlang a paekboe sak tih, lungming cueihnah khaw boeih a thaih thil. 18:2 Lungcuei taengah hlang ang naep pawh, tedae amah kah lungbuei hliphen ham ni lat a om. 18:3 Halang ha pawk vaengah nueihbu neh, yah neh kokhahnah la pai bal. 18:4 Hlang ka lamkah olka tah tui dung bangla, soklong ah aka phuet cueihnah thunsih la om. 18:5 Halang kah a hmai khueh khaw then pawh, laitloeknah aka dueng te aka phaelh ham rhung ni. 18:6 Hlang ang kah hmuilai tah tuituknah ham ha pawk uh tih, a bohnah te a ka loh a khue. 18:7 Hlang ang kah a ka tah amah kah porhaknah neh a hmuilai te a hinglu ham hlaeh la om. 18:8 Thet ol he didii bangla om tih, a bung khui la tluektluek kun. 18:9 A bibi dongah aka uelh khaw kutpo boei kah a manuca la om. 18:10 BOEIPA ming tah sarhi ham rhaltoengim ni, hlang dueng tah a taengla yong tih a hoep a tlang. 18:11 Hlanglen kah a boeirhaeng tah amah ham sarhi aka tak khorha la om tih, a ngaihlih vaengah vongtung tluk a sang sak. 18:12 Hlang he lungbuei aka sang taengah pocinah a lamhma pah tih, kodonah taengah thangpomnah a lamhma pah. 18:13 A hnatun hlan ah ol aka thuung tah anglat ni. Amah khaw te nen te mingthae a phueih. 18:14 Hlang he a tlohtat vaengah a mueihla loh a cangbam dae, mueihla a rhawp te u long a khoeng eh? 18:15 Aka yakming kah lungbuei loh mingnah a lai tih aka cueih kah a hna loh mingnah a tlap. 18:16 Hlang kah kutdoe he amah ham long a khui sak pah tih, amah te tanglue kah mikhmuh ah a mawt. 18:17 A hui te ha pawk la ha pawk hlan tih amah a khe hlan atah, amah kah tuituknah dongah lamhma la aka dueng khaw om. 18:18 Hohmuhnah te hmolunh loh a paa sak tih, aka tlung rhoi khaw rhak a phih. 18:19 Boekoek boeina tah sarhi aka tak khorha lakah olpungkacan la om tih, hohmuhnah khaw impuei thohkalh bangla om. 18:20 Hlang tah a laithaih lamloh a bung hah tih, a hmuilai kah a vueithaih khaw kum. 18:21 Lai kut dongah dueknah neh hingnah om tih, amah aka lungnah long ni a thaih te a caak eh. 18:22 Yuu aka lo long tah hnothen a dang tih, BOEIPA taengkah kolonah a dang bal. 18:23 Khodaeng loh huithuinah neh a voek dae, hlanglen loh a tlung neh a doo. 18:24 Hlang he a hui rhoek loh thaehuet thil cakhaw, a manuca lakah a lungnah tih aka ben khaw om van.