Proverbs 23
23:1 Aka taemrhai taengah buh ang ham na ngol vaengah, na mikhmuh kah aka om te tah, na yakming rhoe na yakming ham om.
23:2 Hinglu neh na boei atah na olrhong ni tumca neh na nuen.
23:3 Laithae buh la a om dongah amih kah antui te ngaidam boeh.
23:4 Boei ham khaw kohnue boeh, na yakmingnah nen khaw toeng dae.
23:5 A taengah na mik na hoih la na hoih nama? Tedae om hae mahpawh. A phae cawn, cawn vetih, atha bangla vaan ah a ding lamni a ding eh.
23:6 Moeithae kah buh te caak pah boeh. Anih kah antui te khaw ngaidam rhoela ngaidam boeh.
23:7 A hinglu neh aka nainong bangla amah loh nang taengah, “Ca van, o van,” a ti tangloeng. Tedae, a lungbuei tah nang taengah a khueh moenih.
23:8 Namah kah kamat ca na caak te na lok hae vetih, na ol ding ni na poeih rhung eh.
23:9 Hlang ang hna ah thui pah boeh. Na olthui dongkah lungmingnah te a hnoelrhoeng hae ni.
23:10 Khosuen kah rhi te rhawt boeh, cadah kah khohmuen te khaw cuk thil boeh.
23:11 Amah, amih aka tlan tah tlungluen tih, amih kah tuituknah te nang taengah ni han suk eh.
23:12 Thuituennah he na lungbuei ah, mingnah ol he na hna ah dueh lah.
23:13 Thuituennah dongah camoe te hloh boeh. Cungcik neh anih na boh akhaw duek aih mahpawh.
23:14 Nang loh caitueng neh na taam cakhaw, a hinglu ni saelkhui lamkah na huul pah.
23:15 Ka ca, na lungbuei ni a. cueih atah, kai khaw ka lungbuei a kohoe van ni.
23:16 Ka kuel pataeng sundaep ngawn ni ta, na hmuilai loh vanat la a thui vaengah te.
23:17 Hlangtholh rhoek taengah na lungbuei te thatlai boel saeh. Tedae BOEIPA mah hnin takuem ah hinyahnah.
23:18 Khohmai he a om pueng oeh dongah na ngaiuepnah khaw muei mahpawh.
23:19 Ka ca nang loh hnatun lamtah cueih lah. Te vaengah na lungbuei kah a longpuei khaw uem van saeh.
23:20 Amih yumii taengah, maehkai taengah om boeh.
23:21 Yumii neh carhut long tah khodaeng a pang vetih, ihdut long khaw hnipen ni a. bai eh.
23:22 Nang aka cun na pa ol te hnatun lamtah, na nu khaw a patong vaengah hnoelrhoeng boeh.
23:23 Oltak he vawtthaih lamtah cueihnah, thuituennah, yakmingnah khaw yoi boeh.
23:24 Omngaih coeng, omngaih coeng, hlang dueng aka cun a napa tah omngaih rhoela omngaih coeng. Hlang cueih aka cun khaw a soah a kohoe coeng.
23:25 Na nu neh na pa te a kohoe saeh lamtah nang aka cun khaw omngaih saeh.
23:26 Ka ca na lungbuei te kamah taengla m'pae. Na mik loh ka longpuei he a ngaingaih la khueinah saeh.
23:27 Pumyoi he vaam a dung, kholong nu khaw tangrhom caek la om.
23:28 Anih khaw dingca bangla rhongngol tih, hlang rhoek taengah hnukpoh la a thap pah.
23:29 Anunae, unim ca te, ngaisahueng la unim ca te, unimca olpungkacan neh hohmuhnah, kohuetnah aka khueh te unim ca? Lungli lungla la tloh aka yook te unim, a mik aka lingduk te unim.
23:30 Misurtui dongah aka bol, yu hoem hamla aka pong dae ni te.
23:31 Misurtui te sungsa dongah a thimyum la a lang vaengah, a mikhmuh boengloeng khuiah vanat la a caeh vaengah khaw so boeh.
23:32 A hmailong ah rhul kah a tuk bangla, rhulthae kah a phuh bangla om ni.
23:33 Na mik loh a lang la a hmuh vetih, na lungbuei long khaw calaak ol ni a thui eh.
23:34 Tuitun tuilung kah aka yalh bangla, cungkui soi ah aka yalh bangla na om ni.
23:35 Kai he n'taam uh dae a tloh moenih, kai n'thoek uh dae ka yaak moenih. Me vaengah nim ka haenghang vetih a tloe neh ka khoep ham ka hmuh ve,” na ti hae ni.