Library · hlt

Psalms 111

111:1 BOEIPA te thangthen lah.Aka thuem rhoek kah tingtunnah neh rhaengpuei lakliah thinko boeih neh BOEIPA ka uem ni. 111:2 BOEIPA kah bibi a len rhoek te aka huem rhoek boeih loh a tlap uh. 111:3 A bisai dongah mueithennah neh rhuepomnah om tih a duengnah khaw a yoeyah la cak. 111:4 Lungvatnah neh thinphoei BOEIPA te poekkoepnah ham ni amah kah khobaerhambae khaw a saii. 111:5 Amah aka rhih rhoek te maeh a paek tih a paipi te a kumhal duela a thoelh. 111:6 Namtom rhoek kah rho te a pilnam taengah paek ham ni a bibi neh a thadueng khaw a doek. 111:7 A kut dongkah a bibi he oltak neh tiktamnah om tih a olrhi rhoek khaw boeih cak. 111:8 Oltak neh a thuem la aka saii rhoek tah kumhal duela pai yoeyah. 111:9 A pilnam taengah tlannah a thak pah. A paipi cim kumhal duela a uen dongah a ming khaw a rhih om pai. 111:10 BOEIPA hinyahnah he tah cueihnah a tongnah la om tih a olkhueng aka vai rhoek boeih taengah lungmingnah then om. Amah koehnah a yoeyah la pai.