Library · hlt

Psalms 135

135:1 BOEIPA te thangthen uh. BOEIPA ming te thangthen uh. BOEIPA kah sal rhoek thangthen uh. 135:2 Te rhoek tah mamih Pathen im vongup kah BOEIPA im ah pai uh. 135:3 BOEIPA tah a then dongah BOEIPA mah thangthen uh. A ming te a naepnoi la tingtoeng uh. 135:4 Jakob te BOEIPA amah ham, Israel khaw a lungthen la a coelh. 135:5 Kai loh Yahweh neh mamih Boeipa tah Pathen boeih lakah len tila ka ming. 135:6 BOEIPA loh a ngaih boeih te tah vaan ah khaw, diklai ah khaw, tuitunli neh tuidung khui boeih ah khaw a saii. 135:7 Diklai khobawt lamkah khomong aka caeh sak loh rhaek neh khotlan khaw a saii tih a thakvoh khui lamkah khohli te a poh. 135:8 Amah loh Egypt hlang neh rhamsa caming rhoek te a ngawn. 135:9 Miknoek neh kopoekrhai te namah Egypt khui ah khaw, Pharaoh taeng neh a sal rhoek boeih taengah khaw a tueih. 135:10 Amah loh namtom rhoek te muep a ngawn tih manghai boei rhoek khaw a ngawn. 135:11 Amori manghai Sihon, Bashan manghai Og neh Kanaan ram boeih te khaw a thup. 135:12 Te dongah amih kah khohmuen rho te a pilnam Israel taengah rho la a paek. 135:13 BOEIPA namah ming tah kumhal duela, BOEIPA namah poekkoepnah te cadilcahma phoeikah cadilcahma duela om pai saeh. 135:14 BOEIPA loh a pilnam a tang sak vetih a sal rhoek te a hloep ni. 135:15 Namtom rhoek kah ngun neh sui muei he hlang kut bibi ni. 135:16 Amih kah a ka om dae cal uh thai pawh. A mik om uh dae hmu uh thai pawh. 135:17 A hna te om uh dae hnakaeng uh thai pawh. A ka khuiah khaw a hil om pawh. 135:18 Mueirhol aka saii neh amih dongah aka pangtung boeih tah mueirhol bangla om uh ni. 135:19 Israel imkhui loh BOEIPA te yoethen pae lah. Aaron imkhui loh BOEIPA te yoethen pae lah. 135:20 Levi imkhui loh BOEIPA te yoethen pae lah. BOEIPA aka rhih rhoek loh BOEIPA te yoethen pae lah. 135:21 Zion lamloh BOEIPA te yoethen pae lah. Jerusalem kah khosa rhoek loh BOEIPA thangthen lah.