Library · hlt

Psalms 139

139:1 Aka mawt ham David kah Tingtoenglung BOEIPA aw kai nan khe tih nan ming coeng. 139:2 Namah loh ka ngol ka pai khaw na ming tih ka mangtaengnah te a hla lamloh na yakming. 139:3 Ka yiin tih ka yalh ah khaw nan dangrhoek tih ka longpuei khaw boeih na hmaiben coeng. 139:4 BOEIPA aw boeih na ming bangla ka lai dongah ol a om moenih he. 139:5 A hnuk a hmai la kai nan thingthung tih kai soah na kut nan tloeng thil. 139:6 Mingnah loh mangvawt la mangvawt coeng tih kai lakah a pomdoep te tah ka pha moenih. 139:7 Na Mueihla taeng lamloh melam ka pongpa vetih na mikhmuh lamloh melam ka yong eh? 139:8 Vaan la ka luei cakhaw namah hnap, Saelkhui ah thingkong ka phaih cakhaw namah hnap na om. 139:9 Mincang phae ka phuel tih tuitun rhalvang ah kho ka sak. 139:10 Teah pataeng na kut loh kai m'mawt vetih na bantang kut loh kai n'tuuk ni. 139:11 “Khohmuep loh kai n'thing,” ka ti ngawn cakhaw khoyin he ka taengvai ah vangnah la poeh. 139:12 Khohmuep pataeng namah taengah hmuep pawh. Te dongah khoyin te khothaih bangla, tamyin khaw khosae bangla sae ni. 139:13 Namah loh ka kuel khaw na lai tih a nu bungko khuiah kai nan cun coeng. 139:14 Namah te kang hiin dongah ni kang uem. Na bibi khaw khobaerhambae la khobaerhambae coeng tih ka hinglu loh phaeng a ming. 139:15 Ka thaa khaw namah taeng lamloh a thuh moenih. A huephael ah n'saii tih diklai laedil ah n'hlom. 139:16 Ka pumho he na mik loh a hmuh coeng. Te boeih te na cabu khuila a daek uh vaengah khohnin khaw saii uh hlan tih amih te pakhat khaw om hlan. 139:17 Te dongah Pathen namah na mangtaengnah tah kai ham bahoeng a phutlo tih a hnun bahoeng ting. 139:18 Te te ka tae ham khaw laivin lakah puh. Ka haenghang vaengah kai khaw namah taengla ka om pueng. 139:19 Pathen aw halang ke na rhaem oeh atah hlang thii he kai taeng lamloh khoe mai. 139:20 Namah te tangkhuepnah neh a thui tih na rhal rhoek loh a poeyoek la a phueih. 139:21 BOEIPA nang aka thiinah rhoek pawt nim ka thiinah tih nang aka tloelh rhoek taengah ka ko a oek? 139:22 Ka taengah thunkha la a om uh dongah amih te hmuhuetnah neh a khuetnah ka thiinah. 139:23 Pathen aw kai n'khe lamtah ka thinko ming lah. Kai noemcai lamtah ka mangvawtnah he ming lah. 139:24 Tedae ka khuikah tloh longpuei hmu lamtah kumhal longpuei ah kai m'mawt lah.