Psalms 29
29:1 David kah Tingtoenglung Pathen ca rhoek BOEIPA te paan uh lah. Thangpomnah, sarhi neh BOEIPA te paan uh lah.
29:2 A ming thangpomnah he BOEIPA koe la ming uh. Aka cim rhuepomnah neh BOEIPA taengah bakop uh lah.
29:3 BOEIPA ol tah tui soah om. Thangpomnah Pathen tah kho la hum. BOEIPA tah tui puei soah om.
29:4 BOEIPA ol tah thadueng neh, BOEIPA ol tah rhuepomnah neh om.
29:5 BOEIPA ol loh lamphai thing a koi tih BOEIPA loh Lebanon kah lamphai thing a khaem.
29:6 Lebanon vaitoca neh Sirion cung ca bangla n'cungpet sak.
29:7 BOEIPA ol loh hmaisai hmai khaw a muk.
29:8 BOEIPA ol loh khosoek khaw a huek. BOEIPA loh Kadesh khosoek a hinghuen.
29:9 BOEIPA ol loh sayuk rhuinu te a huek tih duup khaw a tlaai sak dongah a cungkuem loh a bawkim ah thangpomnah a thui uh.
29:10 BOEIPA tah tuilii soah ngol tih BOEIPA tah kumhal ham manghai la ngol.
29:11 BOEIPA loh a pilnam taengah sarhi a paek. BOEIPA loh a pilnam te ngaimongnah neh yoethen a paek .