Library · hlt

Psalms 33

33:1 Aka dueng rhoek aw BOEIPA dongah koehnah a rhoeprhui neh a thuem la tamhoe uh. 33:2 BOEIPA te rhotoeng neh uem uh lah. Thangpa parha neh amah te tingtoeng uh lah. 33:3 Amah taengah tamlung neh detdet tum lamtah laa thai sa uh lah. 33:4 BOEIPA kah olka tah thuem tih, a bibi boeih khaw uepomnah la om. 33:5 Duengnah neh tiktamnah aka lungnah, BOEIPA kah sitlohnah he diklai ah baetawt. 33:6 BOEIPA kah olka loh vaan rhoek neh, a ka lamkah a hil loh vaan caempuei boeih ke a saii uh. 33:7 Tuitunli kah tui rhoek te som bangla na calui tih, tuidung thakvoh khuiah na khueh. 33:8 Amah kah diklai pum loh BOEIPA te rhih uh saeh. Lunglai boeih kah khosa rhoek loh amah taengah bakuep uh saeh. 33:9 Amah loh a thui tih amah la coeng. Amah loh a uen tih amah khak pai. 33:10 BOEIPA loh namtom kah silsuep te ahnalval pah tih, pilnam kah a kopoek te a tawmta pah. 33:11 BOEIPA kah a cilsuep tah thawnpuei phoeikah thawnpuei patoeng kah a lungbuei kopoek ah kumhal duela cak. 33:12 A Pathen Yahweh kah namtu tah a yoethen, pilnam khaw amah kah rho la a coelh. 33:13 BOEIPA loh hlang capa boeih te vaan lamkah a paelki tih a hmuh. 33:14 A ngol hmuen lamloh diklai khosa boeih te a dawn. 33:15 Amih kah lungbuei tun aka hlinsai loh, amih kah bibi boeih te a yakming. 33:16 Manghai he tatthai hlangrhalh hlangping loh khang pawt tih, thadueng cangpai long khaw a huul moenih. 33:17 Loeihnah ham marhang khaw a hong tih, anih kah thadueng a kum neh poenghal mahpawh. 33:18 Amah aka rhih so neh a sitlohnah dongah aka hangdang rhoek sokah BOEIPA mik aih ke. 33:19 Amih kah hinglu te dueknah lamkah huul ham neh khokha kut khui lamkah hing sak ham ni. 33:20 BOEIPA tah mamih kah bomkung neh mamih photling la a om dongah mamih kah hinglu loh a rhingda. 33:21 A cimcaihnah ming dongah m'pangtung uh dongah mamih lungbuei tah amah dongah a kohoe. 33:22 Nang dongah ka hangdang uh vanbangla kai soah BOEIPA nang kah sitlohnah ha om saeh.