Library · hlt

Psalms 50

50:1 Asaph kah Tingtoenglung Pathen, BOEIPA Pathen loh a thui tih, khocuk lamkah khotlak duela, diklai a tuentah. 50:2 Pathen kah a sakthen a soepnah loh Zion lamkah ha sae. 50:3 Mamih kah Pathen te halo tih omlip pawh. A hmai ah hmai loh a hlawp tih a taengvai ah boehoeng khohli. 50:4 A pilnam te laitloek ham a sosang kah vaan rhoek neh diklai te a tuentah. 50:5 Hmueih neh ka paipi aka saii, ka hlangcim rhoek kai taengla tingtun uh lah. 50:6 Pathen amah loh lai a tloek dongah a duengnah te vaan rhoek long khaw a thui uh. Selah 50:7 Ka pilnam aw ya van lah. Israel taengah ka voek vetih Pathen kamah, nangmih kah Pathen loh nangmih taengah ka laipai ni. 50:8 Nang kah hmueih neh na hmueihhlutnah dongah nang kan tluung moenih. Ka hmai ah om taitu ngawn. 50:9 Na im kah vaitotal khaw, na vongtung kah kikong khaw ka doe moenih. 50:10 Duup kah mulhing boeih neh tlang thawngkhat kah rhamsa boeih ke kamah koe ni. 50:11 Tlang kah vaa boeih te ka ming tih kohong kah satlung khaw kamah taengah om coeng. 50:12 Lunglai neh a khuikah boeih te kamah taengah om tih ka lamlum cakhaw nang taengah ka thui mahpawh. 50:13 Vaito lueng saa te ka caak vetih kikong thii te ka ok aya? 50:14 Uemonah te Pathen taengah nawn lamtah na olcaeng te Khohni taengah thuung lah. 50:15 Te dongah citcai tue vaengah kai n'khue lah. Nang kan pumcum vetih kai nan thangpom ni. 50:16 Tedae Pathen loh halang te, “Ka oltlueh aka tae ham neh na ka dongah ka paipi aka khuen nang te bahamlae? 50:17 Thuituennah na hmuhuet tih ka ol he na hnukla na voeih. 50:18 Hlanghuen na hmuh vaengah, anih taeng neh na hamsum dongkah, samphaih rhoek taengah na ngaingaih. 50:19 Boethae ham na ka na hnonah tih na lai kah thailatnah neh na sun. 50:20 Na pacaboeina taengah na ngol tih na cal van dae na manu ca te boekoekthingka na paek. 50:21 Hekah he na saii vaengah ka omlip hatah namah bangla om khaw om ni tila na poek. Nang te kan tluung vetih na mikhmuh ah kan yan ni. 50:22 He he Pathen aka hnilh rhoek loh yakming uh laeh. Kam poel vetih aka huul om pawt ve. 50:23 Uemonah aka nawn loh kai n'thangpom tih longpuei a rhoek a bah dongah Pathen kah daemnah te anih ka tueng ni,” a ti.