Library · hlt

Psalms 77

77:1 Jeduthun te aka mawt ham Asaph kah Jeduthun tingtoenglung Pathen taengah ka ol ka huel tih ka pang. Pathen taengah ka ol ka huel tih kai taengla a hna han kaeng. 77:2 Ka citcai tue vaengah ka Boeipa ka toem. Khoyin ah ka ban ka lam tih kha tlaih pawh. Ka hinglu hloep ham a aal. 77:3 Pathen ka ngaidam tih ka ko. Lolmang ka taeng vaengah ka mueihla rhae. 77:4 Ka mikhmuh ah miklung nan buem tih kai n'cahoeh he ka thui lek pawh. Selah 77:5 Khosuen hlamat kum kah khohnin te ka poek. 77:6 Khoyin ah ka rhotoeng ka ngaidam. Ka thinko ah lolmang ka taeng tih ka mueihla a sat. 77:7 Ka Boeipa loh kumhal duelam nim n'hlahpham vetih koekthoek kan doe bal eh ti voel pawt nim? 77:8 A sitlonah loh a yoeyah la a toeng vetih a olkhueh loh cadilcahma phoeikah cadilcahma ham bawtpat pawn a ya? 77:9 Pathen loh sitlohthamlam ham a hnilh tih a haidamnah te thintoek loh a uep bal nim? Selah 77:10 Ka nue coeng ka ti vaengah he Khohni kah bantang kut loh n'talh. 77:11 BOEIPA kah khoboe tah ka ngaidam rhoe ka ngaidam pai tih hlamat lamkah na khobaerhambae khaw ka ngaidam. 77:12 Te dongah na bisai boeih te ka thuep vetih na bibi boeih te lolmang ka taeng puei ni. 77:13 Pathen namah kah longpuei cim ah mebang pathen lae Pathen bangla aka tanglue bal? 77:14 “Khobaerhambae aka saii Pathen namah loh pilnam rhoek taengah na sarhi khaw na tueng sak. 77:15 Na pilnam Jakob neh Joseph koca te bantha neh na tlan. Selah 77:16 Tui rhoek loh Pathen namah m'hmuh uh. Tui rhoek loh namah m'hmuh uh vaengah kilkul uh tih a laedil pataeng tlai. 77:17 Khomai loh tui han hawk. Khomong khaw a ol hum. Na thaltang rhoek khaw thui. 77:18 Humhae khui lamkah na khohum ol ah rhaek la phaa tih lunglai khaw tlai coeng, diklai khaw hinghuen coeng. 77:19 Tuitunli dongkah na longpuei neh tui puei dongah khaw na lamkat patoeng, lamkat patoeng om dae na kholaeh ming uh pawh. 77:20 Na pilnam te Moses kut, Aaron kut neh tuping bangla na mawt.