Library · hlt

Psalms 83

83:1 Asaph kah Tingtoeng Laa Pathen aw, nang taengah dingsueknah tal nim. Pathen aw omlip boel lamtah mong boeh. 83:2 Na thunkha rhoek loh hue a sak tih na lunguet rhoek loh lu a dangrhoek uh soeh ke. 83:3 Na pilnam te baecenol neh muet uh tih na khoem rhoek taengah uento uh thae. 83:4 Anmih vik loh, “Halo uh lamtah namtom bangla amih ke thup sih. Te daengah ni Israel ming a thoelh uh voel pawt eh?,” a ti uh. 83:5 Nang kah a voel ah lungbuei thikat la toidal uh thae tih moi aka bop rhoek tah, 83:6 Edom dap rhoek neh Moab Ishmael, Hagri, 83:7 Gebal, Ammon, Philistia Amalek, neh Tyre kah khosa hmaih rhoek, 83:8 Amih te Assyria loh a koei pataeng tih Lot koca ham bantha la coeng uh. Selah 83:9 Amih te Kishon soklong kah Midian, Sisera neh Jabin bangla saii lah. 83:10 Endor ah mitmoeng uh tih diklai ah aek la poeh uh. 83:11 Amih kah hlangcong rhoek te Oreb neh Zeeb, Zebah bangla, a boeimang boeih te Zalmunna bangla khueh lah. 83:12 Amih loh, “Pathen kah toitlim te mamih ham huul uh sih,” a ti uh. 83:13 Ka Pathen aw amih te humhae bangla, khohli hmai kah divawt bangla khueh lah. 83:14 Hmai loh duup a dom tih hmaisai loh tlang a hlawp bangla han coeng sak. 83:15 Amih te na hlipuei neh hloem van lamtah amih te na cangpalam neh let sak lah. 83:16 Amih maelhmai te yah bai lamtah BOEIPA nang ming te toem uh saeh. 83:17 Amih te yahpok uh saeh lamtah let uh saeh. A yoeyah la a hmai tal uh saeh lamtah milh uh saeh. 83:18 Te dongah diklai pum ah nang tah na ming Yahweh tih, namah bueng te Sangkoek tila ming uh saeh.