Library · hlt

Psalms 89

89:1 Ezrakhi Ethan kah Hlohlai BOEIPA kah sitlohnah te, cadilcahma phoeikah cadilcahma duela, kumhal ah ka hlai ni. Namah kah uepomnah te, ka ka neh ka tukkil ni. 89:2 Sitlohnah loh vaan a khoeng tih, a khuiah na uepomnah na soepboe te kumhal ah ka thui ni. 89:3 Ka coelh taengah moi ka boh tih ka sal David taengah ka toemngam coeng. 89:4 Na tiingan te kumhal duela ka thoh vetih na ngolkhoel te cadilcahma phoeikah cadilcahma ham ka hol pah ni. Selah 89:5 Te dongah BOEIPA nang kah khobaerhambae te vaan rhoek loh, na uepomnah khaw a cim hlangping khuiah a uem uh. 89:6 BOEIPA neh khomong dongah unim aka tluk tih vaan hlang khuiah BOEIPA te u long nim a puet? 89:7 Pathen taengah tah, boeiping hlangcim kah baecenol nen khaw a sarhing pai. Te dongah a kaepvai boeih lakah a rhih om pai. 89:8 Caempuei Pathen, BOEIPA namah bangla unim aka om?. BOEIPA tah tlung tih na kaepvai ah na uepomnah om. 89:9 Tuitunli kah a hoemdamnah te aka taemrhai khaw namah ni. Tuilae a thoh vaengah amih te na domyok sak. 89:10 Nang loh Rahab na ngawn bangla na bantha neh na phop tih na thunkha rhoek te na sarhi neh na yaal. 89:11 Vaan rhoek khaw nang kah, diklai khaw nang kah bal. Lunglai neh anih dongkah aka om boeih namah loh na suen. 89:12 Tlangpuei neh bantang khaw namah loh na suen. Tabor neh Hermon loh na ming neh tamhoe rhoi. 89:13 Na ban te thayung thamal sai tih na kut khaw tanglue. Te dongah na bantang kut tah a pomsang. 89:14 Na ngolkhoel hmuen la duengnah neh tiktamnah om tih sitlohnah neh oltak loh na hmai ah n'doe. 89:15 BOEIPA kah tamlung aka ming tih na mikhmuh kah vangnah khuiah aka pongpa pilnam tah a yoethen pai saeh. 89:16 Na ming neh hnin takuem omngaih uh tih na duengnah neh pomsang uh. 89:17 Amih kah boeimangnah sarhi la nang na om dongah na kolonah neh ka ki khaw na pomsang rhoela na pomsang coeng. 89:18 BOEIPA tah kaimih kah photling, Israel kah a cim, kaimih kah manghai ni. 89:19 Saivai atah, na hlangcim rhoek te mangthui neh na voek tih, “Pilnam khui lamkah ka coelh hlangrhalh taengah bomkung ka mop pah tih ka pomsang coeng. 89:20 Ka sal David te ka hmuh coeng tih kamah kah situi cim neh ka koelh coeng. 89:21 Ka kut te anih taengah tawn uh tih ka ban loh anih a thoh ni. 89:22 Anih te thunkha loh phae pawt vetih dumlai ca long khaw phaep mahpawh . 89:23 Tedae a rhal te anih mikhmuh ah ka phop pah vetih a lunguet khaw ka vuek pah ni. 89:24 Te vaengah anih taengah kai kah uepomnah neh sitlohnah om vetih ka ming neh a ki khaw pomsang uh ni. 89:25 A kut te tuitunli soah, a bantang kut te tuiva rhoek soah ka khueh pah ni. 89:26 Anih loh kai te, “Nang tah ka napa, ka Pathen neh kai ham khangnah lungpang,” lan'khue ni. 89:27 Kai long khaw anih te caming omthang neh diklai manghai rhoek kah a sangkoek la ka khueh ni. 89:28 Kamah kah sitlohnah te anih ham kumhal duela ka ngaithuen rhoe ka ngaithuen pah vetih, ka paipi he anih taengah cak ni. 89:29 Te dongah a tiingan te a yoeyah la ka thoh pah vetih a ngolkhoel loh vaan khohnin bangla om ni. 89:30 A ca rhoek loh ka olkhueng he a hnoo uh tih ka tiktamnah dongah a pongpa uh pawt atah, 89:31 ka khosing te a poeih uh tih ka olpaek te a ngaithuen uh pawt atah, 89:32 amih kah boekoek te mancai neh, amih thaesainah te khaw tlohthae neh ka cawh thil van ni. 89:33 Tedae ka sitlohnah he anih taeng lamloh ka phae pah pawt vetih ka uepomnah te rhi ka lat pah mahpawh. 89:34 Ka paipi he ka poeih pawt vetih ka hmui lamkah aka thoeng khaw ka thovael mahpawh. 89:35 Ka cimcaihnah neh vai ka toemngam tangtae te David taengah khaw ka laithae mahpawh. 89:36 Anih kah tiingan te kumhal duela om vetih a ngolkhoel loh kai hmaiah khomik bangla om ni. 89:37 Hl a bangla kumhal ah cikngae vetih khomong soah uepom laipai la om ni,” na ti. Selah 89:38 Tedae na hlahpham tih na hnawt coeng dongah na koelh hlang te na poe. 89:39 Na salpa kah paipi te na hai tih a rhuisam khaw diklai neh na poeih pah. 89:40 Anih kah tanglung khaw boeih na phae pah tih a hmuencak rhoek khaw porhaknah la na khueh pah. 89:41 Longpuei kah aka pongpa boeih loh anih te a rheth uh dongah a imben rhoek kah kokhahnah coeng. 89:42 A rhal rhoek kah bantang kut te na pomsang pah tih a thunkha boeih kah ko na hoe sak. 89:43 A cunghang taeh khaw na kolong pah sak tih caemtloek vaengah khaw na duel pawh. 89:44 A caihcilnah te na kangkuen sak tih a ngolkhoel te diklai la na voeih pah. 89:45 A cacawn tue na rhaem pah tih, yah neh na thing. Selah 89:46 BOEIPA nang mevaeng hil nim na thuh uh vetih, na kosi loh hmai bangla a yoeyah la rhong ve? 89:47 Hlang ca rhoek boeih na suen he a poeyoek mai la. Te dongah mebang khosaknah dongah khaw kai he m'poek lah. 89:48 Mebang hlang nim aka hing tih dueknah hmuh pawt ham, saelkhui kut lamkah a hinglu te aka poeng aka hal thai? Selah 89:49 Ka Boeipa aw, lamhma kah na sitlohnah te ta? David taengah na uepomnah neh na toemngam te. 89:50 Ka Boeipa aw na sal sokah kokhahnah he poek lah. Pilnam kah tuituknah boeih he ka kodang ah ka phueih he. 89:51 BOEIPA aw, na thunkha rhoek loh m'veet uh coeng te, na koelh hlang kah kholaeh khaw a veet uh coeng te. 89:52 BOEIPA tah kumhal duela a yoethen pai. Amen phoeiah Amen.