Library · hlt

Psalms 92

92:1 Sabbath hnin ham Tingtoeng Laa BOEIPA uem ham neh Khohni namah ming tingtoeng ham tah then pai tih, 92:2 Mincang ah na sitlohnah, hlaem ah na uepomnah doek ham te, 92:3 Thangpa parha, phungding rhotoeng nen khaw rhoep tloe pai. 92:4 BOEIPA namah kah bisai neh ka ko na hoe sak tih na kut dongkah bibi rhangneh ka tamhoe. 92:5 BOEIPA nang kah bibi tah len tangkik tih na kopoek khaw dung tangkik. 92:6 Kotalh hlang loh ming pawt tih aka ang loh hekah he yakming pawh. 92:7 Halang rhoek te baelhing bangla cawn uh tih khooi cakhaw amih boethae aka saii boeih tah a yoeyah la mitmoeng ni. 92:8 Tedae BOEIPA nang tah kumhal duela na sang pai. 92:9 BOEIPA nang kah thunkha rhoek te na thunkha rhoek vanbangla milh uh vetih boethae aka saii rhoek boeih khaw pamhma uh ni. 92:10 Te dongah ka ki he cung ki bangla na pomsang tih situi thai neh nan yuh. 92:11 Ka taengah aka thoo rhalmah te ka mik loh a paelki tih thaehuet rhoek khaw ka hna loh a yaak coeng. 92:12 Aka dueng tah rhophoe bangla cawn vetih Lebanon kah lamphai bangla rhoeng ni. 92:13 BOEIPA im kah a phung tah mamih Pathen kah vongup ah muem uh ni. 92:14 A sam a pok vaengah thaihsu pueng vetih kuirhang thinghing la om uh ni. 92:15 Kai kah lungpang BOEIPA tah thuem tih a khuiah dumlai om pawh tila doek ham om pai.