Library · hlt

Psalms 94

94:1 Tawnlohnah Pathen BOEIPA aw, tawnlohnah Pathen nang ha sae lah. 94:2 Diklai laitloek nang thoo lamtah thinthah rhoek ke a tiing la thuung lah. 94:3 Me hil nim a halang uh ve? BOEIPA aw halang rhoek loh me hil nim a sundaep uh ve? 94:4 Boethae aka saii boeih loh a cal uh vaengah mangkhak la hoem ol a thaa uh. 94:5 BOEIPA namah kah pilnam te a phop uh tih na rho khaw a phaep uh. 94:6 Nuhmai neh yinlai te a ngawn uh tih cadah rhoek te a sah uh. 94:7 Tedae, “BOEIPA loh hmuh pawt tih Jakob Pathen loh a yakming moenih,” a ti uh. 94:8 Pilnam khuikah ngukngak rhoek loh yakming uh laeh. Aka ang rhoek loh n'cangbam venim? 94:9 Hna aka buen loh ya pawt vetih mik aka hlinsai loh paelki mapawt nim? 94:10 Namtom rhoek aka toel tih mingnah neh hlang aka cang puei loh tluung het mahpawt nim? 94:11 Hlang kah a kopoek he a honghi ni tila BOEIPA loh a ming. 94:12 BOEIPA loh na toel tih na olkhueng neh na tuk na kil hlang tah a yoethen tih, 94:13 halang ham vaam a vueh pah vaengah pataeng yoethae tue khui lamkah anih te na mong sak. 94:14 BOEIPA loh a pilnam te phap sut pawt tih a rho khaw hnoo mahpawh. 94:15 Duengnah dongah laitloeknah a khoep vetih lungbuei aka thuem boeih tah a hnukah bang uh ni. 94:16 Thaehuet rhoek te kai taengah u long lae a tlai thil eh? Boethae aka saii te kai taengah ulonglae a pai thil eh? 94:17 BOEIPA kah bomnah kai taengah om pawt koinih ka hinglu he mikpalap ah tuihoeng la om sut ni. 94:18 “Ka kho paloe coeng he,” ka ti vaengah BOEIPA nang kah sitlohnah loh kai n'duel. 94:19 Ka ko khuiah ka mangvawtnah loh ka kum vaengah namah kah hloephloeinah loh ka hinglu a naepnoi sak. 94:20 thakthaenah te oltlueh neh aka yen talnah ngolkhoel te nang neh na patai uh rhoi thai aya? 94:21 Aka dueng kah hinglu te a hlap uh tih ommongsitoe thii te a taeng uh. 94:22 Tedae BOEIPA tah kai ham imsang la, ka Pathen tah ka hlipyingnah lungpang la om. 94:23 Te dongah amih kah boethae te amamih taengah mael vetih amamih kah boethae dongah amamih te a biit ni. Mamih kah BOEIPA Pathen loh amih te a biit ni.